Connect with us

Movie Reviews

சார்லி சாப்ளின் 2 – விமர்சனம்

Published

on

charlie-chaplin-2-review

இயக்குனர் ஷக்தி சிதம்பரம் சில பல வருடங்களுக்கு முன்பு சில நகைச்சுவைப் படங்களைக் கொடுத்து ரசிக்க வைத்தவர். சத்யராஜுக்கு ‘என்னம்மா கண்ணு’ என்ற படத்தின் மூலம் மீண்டும் நாயகனாக அவர் வர ஒரு ரீ-என்ட்ரி கொடுத்தவர்.

17 ஆண்டுகளுக்குப் பின் இந்த ‘சார்லி சாப்ளின் 2’ இரண்டாம் பாகத்தைக் கொடுத்திருக்கிறார். முதல் பாகத்துடன் ஒப்பிடும் போது இரண்டாம் பாகத்தில் நகைச்சுவை கொஞ்சம் குறைவுதான் என்றாலும், இடைவேளைக்குப் பின் அதை முடிந்தவரை ஈடு செய்திருக்கிறார்.

நண்பனின் பேச்சைக் கேட்டு, திருமணம் செய்து கொள்ள உள்ள காதலி நிக்கி கல்ரானியைத் திட்டி ஒரு வீடியோ அனுப்பி விடுகிறார் பிரபுதேவா. அந்த வீடியோவைப் பார்த்து விட்டால் எங்கே திருமணம் நின்று விடுமோ என பயந்து, அந்த வீடியோவை நிக்கி பார்ப்பதற்கு முன்பாக அழித்துவிட முயற்சிக்கிறார் பிரபுதேவா. அதை அவர் செய்தாரா இல்லையா என்பதுதான் படத்தின் கதை.

இந்தக் காலத்தில் அதிகம் பயன்பாட்டில் உள்ள வாட்சப், வீடியோ பதிவு என அப்டேட்டடான ஒரு கருவை எடுத்துக் கொண்டிருக்கிறார் இயக்குனர். பிரபுதேவாவிற்குக் காமெடி கைவந்த கலை. இந்தப் படத்திலும் அப்பாவித்தனமான முகத்துடன் காமெடியை ரசித்து செய்திருக்கிறார்.

நிக்கி கல்ரானியிடம் காமெடிப் படம், காமெடி கதாபாத்திரம் என சொல்லிவிட்டார்கள் போலிருக்கிறது. படம் முழுவதும் சிரித்துக் கொண்டேயிருக்கிறார்.

படத்தின் இரண்டாவது நாயகியாக அடா சர்மா. தன் திருமணத்தை நிறுத்திய பிரபுதேவாவைப் பழி வாங்கத் துடிக்கும் கதாபாத்திரம். தமிழ்நாட்டுப் பெண், தமிழ் பேசுவாரா என்று தெரியவில்லை. இருப்பினும் நடிப்பிலும் நடனத்திலும் பாஸ்மார்க் வாங்கி விடுகிறார்.

பிரபு வழக்கம் போல, குணச்சித்திரத்திலும், நகைச்சுவையிலும் கனகச்சிதம். பிரபுதேவாவின் நண்பர்களில் சந்தனா கவனிக்க வைக்கிறார். விவேக் பிரசன்னா, அரவிந்த் ஆகாஷ் இருவரில் விவேக் பிரசன்னாவுக்கு வசனங்களாவது இருக்கிறது.

அம்ரிஷ் இசையில் ஏற்கெனவே சூப்பர்ஹிட்டான ‘சின்ன மச்சான்’ பாடலில், பிரபுதேவாவும், நிக்கியும் நடனத்தில் அசத்தியிருக்கிறார்கள்.

கதை, லாஜிக் எனப் பார்க்காமல் டைம் பாஸ் செய்ய வேண்டும் என்று நினைப்பவர்களுக்கான படம் இது.

Movie Reviews

மெஹந்தி சர்க்கஸ் – விமர்சனம்

Published

on

மெஹந்தி சர்க்கஸ் விமர்சனம்

காதலித்தவர்கள், காதலில் ஊறியவர்களால் மட்டுமே ஒரு சிறந்த காதல் படத்தைக் கொடுக்க முடியும். இந்த ‘மெஹந்தி சர்க்கஸ்’ படத்தை, சினிமா மீது ரசனையான காதல் கொண்ட அறிமுக இயக்குனர் சரவண ராஜேந்திரன் இயக்கியிருக்கிறார்.

இளையராஜா இசையமைத்த படங்களில் கூட அவருடைய பாடல்களை திரும்பத் திரும்ப இந்த அளவிற்குப் பயன்படுத்தியிருக்க மாட்டார்கள். ஆனால், இந்தப் படத்தில் இளையாராஜாவின் பாடல்கள் நமக்கு ஒரு கதாபாத்திரமாகவே உள்ளுக்குள் இறங்கிவிடுகின்றன.

1989ல் வெளிவந்த ‘இதயத்தை திருடாதே’ படத்தில் இடம் பெற்ற ‘ஓ பாப்பா லாலி’ பாடலை 30 வருடங்கள் கழித்து இந்த 2019ல் திரையில் மீண்டும் கேட்டாலும் ஏதோ நேற்று வெளிவந்த ஒரு பாடல் போலவே ஒலிக்கிறது. அந்த அளவிற்கு காட்சிகளுக்குத் தகுந்தபடி இளையராஜாவின் பாடல்களை இந்தப் படத்தில் ஆங்காங்கே பயன்படுத்தியிருப்பது இயக்குனரின் ரசனையை வெளிக்காட்டுகிறது.

சாதி வெறி பிடித்த மாரிமுத்துவின் மகன் ரங்கராஜ், கொடைக்கானலில் ராஜகீதம் என்ற பெயரில் சினிமா பாடல்களை ரெக்கார்டிங் செய்து தரும் கடையை நடத்துகிறார். அந்த ஊரில் சர்க்கஸ் நடத்த வரும் வட இந்தியப் பெண்ணான ஸ்வேதா திரிபாதியின் அழகு ரங்கராஜை காதலில் வீழ்த்துகிறது. சிலபல சந்திப்புகளுக்குப் பின் காதலர்கள் ஆகிறார்கள் ரங்கராஜ், ஸ்வேதா. இவர்கள் காதல் மாரிமுத்துவுக்குத் தெரியவர, ஓடிப் போன காதலர்களைக் கண்டு பிடித்து மீண்டும் ஊருக்கு அழைத்து வந்து இருவரையும் பிரித்து வைக்கிறார். ஸ்வேதாவின் சர்க்கஸ் கூட்டம் அந்த ஊரை விட்டே கிளம்புகிறது. காதலர்கள் பிரிகிறார்கள். 20 வருடங்களுக்குப் பிறகு ஸ்வேதாவின் மகள், தன் அம்மாவின் காதலன் ரங்கராஜைத் தேடி கொடைக்கானல் வருகிறார். அதன் பின் என்ன நடக்கிறது என்பதுதான் படத்தின் கதை.

காதல் கதை என்றாலே அதில் புதுமுகங்கள் நடித்தாலும், காதலை சொல்ல வேண்டிய விதத்தில் சொன்னால் அவர்களை ரசிகர்கள் ஏற்றுக் கொள்வார்கள். அதை இயக்குனர் சரியான கதாபாத்திரங்களாக வடிவமைத்து, காதலையும் சொல்லியிருப்பதால் ரங்கராஜ், ஸ்வேதா இருவருமே புதுமுகங்கள் என்பதையும் மீறி நம் மனதில் இடம் பிடிக்கிறார்கள். அதிலும், ஸ்வேதாவின் கள்ளம் கபடமற்ற சிரிப்பு அடிக்கடி கண்முன் வந்து போகிறது.

படத்தில் மற்ற கதாபாத்திரங்களில் நடித்துள்ளவர்கள் கூட பொருத்தமான தேர்வு. ரங்கராஜ் அப்பா மாரிமுத்து, ஸ்வேதாவின் அப்பா சன்னி சார்லஸ், கணவர் ஜாதவ், பாதிரியார் வேல ராமமூர்த்தி, நண்பன் ஆர்ஜே விக்னேஷ் அவரவர் கதாபாத்திரங்களில் நிறைவு.

இளையராஜாவின் பாடல்கள் படத்தில் அடிக்கடி ஒலிப்பதால், அவற்றையும் மீறி சிறந்த பாடல்களைக் கொடுக்க வேண்டும் என ஷான் ரோல்டன் உழைத்திருக்கிறார். பின்னணி இசையில் தனி கவனம் செலுத்தியிருக்கிறார். செல்வகுமார் ஒளிப்பதிவில் கொடைக்கானல் அழகு அற்புதம்.

காதல் உணர்வை இன்னும் உள்ளுக்குள் இறக்கும்படியான காட்சிகளை வைத்திருக்கலாமோ என்று மட்டும் படம் முடிந்த பின் நமக்குள் ஒரு கேள்வி எழுகிறது. கதாபாத்திரங்கள், கதைக் களம் ஆகியவற்றில் செலுத்திய கவனத்தை, திரைக்கதையில் இன்னும் செதுக்கியிருக்கலாம் என்பது மட்டுமே சிறு குறையாகத் தெரிகிறது.

ஆனாலும், கைகளுக்கு அழகு மெஹந்தி, காதலுக்கு அழகு இந்த மெஹந்தி சர்க்கஸ்.

Continue Reading

Movie Reviews

காஞ்சனா 3 – விமர்சனம்

Published

on

காஞ்சனா 3 விமர்சனம்

‘காஞ்சனா’ படம் என்றாலே முதல் பாகமோ, இரண்டாம் பாகமோ டிவியில் போடுகிறார்கள் என்றாலே நமது வீட்டில் உள்ள குழந்தைகள் அந்தப் படத்தைப் பார்க்க உட்கார்ந்துவிடுவார்கள்.

பேய்ப் படத்தைக் கூட காமெடி படமாகக் கொடுத்து ரசிக்க வைத்தவர்தான் ராகவா லாரன்ஸ். காஞ்சனா வரிசையில் 3வது படம், முனி வரிசையில் 4வது படம் என இந்த ‘காஞ்சனா 3’ படத்தையும் நகைச்சுவை, சென்டிமென்ட், ஆக்ஷன், பேய் பயம் என நகர்த்தி இரண்டரை மணி நேரமும் ரசிக்க வைக்கிறார் ராகவா லாரன்ஸ்.

மாற்றுத் திறனாளிகள், அனாதைகள் என பலரையும் தன் ஆசிரமத்தில் வளர்ந்து ஆளாக்கும் ராகவா லாரன்சை ஒரு மந்திரியும், அவரது மகனும் ஒரு தவறைச் செய்யச் சொல்கிறார்கள். ஆனால், அதைச் செய்ய மறுக்கும் ராகவாவைவையும், அவரது காதலியையும் லாரி ஏற்றிக் கொலை செய்கிறார்கள். ராகவா லாரன்ஸ், அவரது காதலி ஆகியோரது ஆவி, முந்தைய பாகங்களைப் போல ராகவா லாரன்ஸ் உடம்புக்குள் புகுந்து தன்னைக் கொன்றவர்களை எப்படி பழி வாங்குகிறது என்பதுதான் படத்தின் கதை.

சிறு வயதிலேயே வைட்டமின் டி குறைவால் தலை முடி வெள்ளையாகிப் போன ‘காளி’ என்ற கதாபாத்திரத்தில் ராகவா லாரன்ஸ். இவர்தான் ஆசிரமம் நடத்துபவர். அந்தப் பகுதி குப்பத்து மக்களுக்கு தெய்வம் போன்றவர். ஆக்ஷனில் அதிரடி காட்டுகிறார் இந்த காளி. முந்தைய பாகங்களில் இருந்த அதே பயந்த சுபாவம் கொண்ட மற்றொரு கதாபாத்திரத்தில் இரண்டாவது ராகவா லாரன்ஸ். இவருக்கு முறைப் பெண்களைக் காதலிப்பது மட்டும்தான் வேலை. பேய் புகுந்து கொண்டபின் அவர் நடிக்கும் நடிப்பு, தியேட்டரில் அடேங்கப்பா என கைதட்டுகிறார்கள்.

ஓவியா, வேதிகா, நிக்கி டம்போலி என மூன்று ஹீரோயின்கள். மூவருமே கிளாமரில் போட்டி போட்டு நடித்திருக்கிறார்கள். ராகவா லாரன்சைத் துரத்தித் துரத்தி காதலிப்பது மட்டுமே இவர்களது வேலை. நான்காவது கதாநாயகியாக வெள்ளைக்கார நடிகை ஒருவர். இவர் தமிழ்ப் பெண்ணைப் போல ஆடையணிந்து துளியும் கிளாமர் காட்டாமல் நடித்திருக்கிறார்.

‘காஞ்சனா’ முதல் பாகத்தில் நகைச்சுவையில் கலக்கிய கோவை சரளா, தேவதர்ஷினி, ஸ்ரீமன் கூட்டணி மீண்டும் இந்த மூன்றாம் பாகத்தில் கூட்டணி அமைத்து தியேட்டரை அதகளப்படுத்துகிறது. குட்டீஸ்களுக்காகவே இவர்களது காமெடி.

அண்ணன், தம்பி வில்லன்களாக தருண் அரோரா, கபீர் சிங். படத்தில் சூரியும் துணை நடிகர் போல சில காட்சிகளில் வருகிறார். ஆனால், அவரால் சிரிக்க வைக்க முடியவில்லை.

டூபாடு வழங்கிய பாடல்கள். முற்றிலும் கமர்ஷியலை மனதில் கொண்டு தேர்வு செய்யப்பட்ட பாடல்கள். பின்னணி இசையில் தமன் வாசித்துத் தள்ளுகிறார்.

படத்தில் இடம் பெற்றுள்ள சண்டைக் காட்சிகள் ஒவ்வொன்றும் அதிரடி. குறிப்பாக கிளைமாக்ஸ் சண்டைக் காட்சி மிகப் பிரம்மாண்டம்.

மூவர் ஹீரோயின் அணியின் கிளாமரை மட்டும் படத்தில் குறைத்திருக்கலாம். லாஜிக் பற்றியெல்லாம் கேள்வி கேட்காமல் கோடை விடுமுறையை குடும்பத்துடன் இந்தப் படத்தைப் பார்த்துக் கொண்டாடலாம்.

Continue Reading

Movie Reviews

வெள்ளைப் பூக்கள் – விமர்சனம்

Published

on

வெள்ளைப் பூக்கள் விமர்சனம்

அமெரிக்காவில் வசிக்கும் தமிழர்கள் தயாரித்து, இயக்கி உருவாக்கியுள்ள படம். படத்தில் பணியாற்றியுள்ள பல தொழில்நுட்பக் கலைஞர்களும் அதில் அடக்கம்.

தமிழ் சினிமாவின் மீதுள்ள காதலால் இப்படி ஒரு படத்தைக் கொடுத்த அவர்களது முயற்சிக்கு நமது வாழ்த்துகள்.

அறிமுக இயக்குனர் விவேக் இளங்கோவன், தமிழ் சினிமாவில் உள்ள முன்னணி ஹீரோக்களை நடிக்க வைப்பதை விட, தன் கதையின் நாயகனாக வித்தியாசமான ஒரு கதாபாத்திரத்தில் நகைச்சுவை நடிகர் விவேக்கை நடிக்க வைத்திருக்கிறார். அதற்கே அவருக்கு ஒரு தனி வணக்கம் வைக்க வேண்டும்.

அதிலும் கதையின் நாயகன் கதாபாத்திரம் ஒரு ஓய்வு பெற்ற போலீஸ் அதிகாரி. உடல் வலிமையைவிட மூளை வலிமையை அந்தக் கதாபாத்திரம் மூலம் வெளிப்படுத்தியிருக்கிறார் இயக்குனர்.

அமெரிக்கப் பெண்ணைக் காதலித்து திருமணம் செய்து கொண்டதால் அமெரிக்காவில் வசிக்கும் மகன் மீது கோபம் கொண்டு அங்கு செல்லாமல் இருக்கும் விவேக், மேலதிகாரி சொன்னதால் அமெரிக்கா செல்கிறார். அங்கு அடுத்தடுத்து சில க்ரைம் சம்பவங்கள் நடக்கின்றன. பக்கத்து வீட்டுப் பெண், ஒரு இளைஞர் காணாமல் போக விசாரணையில் திறமைசாலியான விவேக், அந்த வழக்கை அமெரிக்க போலீசுக்குத் தெரியாமல் விசாரிக்க ஆரம்பிக்கிறார். ஒரு சந்தர்ப்பத்தில் அவர் மகனே கடத்தப்பட அதிர்ச்சியடைகிறார். அத்தனை கடத்தல்களைச் செய்தது யார் என்பதை விவேக் எப்படி கண்டுபிடிக்கிறார் என்பதுதான் படத்தின் கதை.

30 வருடங்களாக நகைச்சுவைக் கதாபாத்திரங்களில் நடித்து வரும் விவேக், கடந்த சில வருடங்களில் ஒரு சில படங்களில் கதாநாயகனாக நடித்திருந்தார். ஆனால், அவற்றைக் காட்டிலும் இந்தப் படத்தில் தனக்குப் பொருத்தமான ஒரு கதாபாத்திரத்தைத் தேர்வு செய்து அதில் அவருடைய வழக்கமான நகைச்சுவையை தவிர்த்துவிட்டு, குணச்சித்திரக் கதாபாத்திரத்தில் மிக இயல்பாக நடித்திருக்கிறார். விசாரணை என்ற பெயரில் பேசுவதை மட்டும் கொஞ்சம் குறைத்திருக்கலாம்.

விவேக்கின் அமெரிக்க நண்பராக சார்லி, மகனாக தேவ், மருமகளாக பெய்ஜ் ஹென்டர்சன் படத்தில் முக்கிய கதாபாத்திரங்களில் நடித்திருக்கிறார்கள்.

அமெரிக்காவில் உள்ள சியாட்டில் நகரில் முழு கதையும் நகர்கிறது. நாம் அதிகமாகப் பார்க்காத அமெரிக்க கிராமத்து அழகையும், சியாட்டில் நகர அழகையும் அருமையாக படமாக்கியிருக்கிறார் ஒளிப்பதிவாளர் ஜெரால்ட் பீட்டர். ராம்கோபால் பின்னணி இசையும் படத்திற்கு பலமாக அமைந்துள்ளது.

கமல்ஹாசன் நடித்த ‘வேட்டையாடு விளையாடு’ படம் போல ஒரு பரபரப்பான க்ரைம் திரில்லர் இந்தப் படம். புதியவர்களின் புதிய முயற்சிக்கு தமிழ் சினிமா ரசிகர்களும் ஆதரவு தந்தால் இம்மாதிரியான இன்னும் பல வித்தியாசமான படைப்புகள் வெளிவரும்.

Continue Reading
Advertisement

Tamil Movies Database

Trending

error: Content is protected !!