Connect with us

Reviews

பரதேசி – விமர்சனம்

Published

on

Image00012

ம் அனைவரிடத்திலும் ஒரு கெட்ட பழக்கம் உண்டு. நம்ம வீட்டுப் பையன் என்னதான் படித்து நல்ல மதிப் பெண் வாங்கினாலும் , அடுத்த வீட்டுப் பையனுடன்தான் ஒப்பிட்டுப் பேசுவோம்.

ஹாலிவுட் படங்கள், ஈரான் படங்கள், கொரியன் படங்கள், ஜப்பான் படங்கள், பெங்காலி படங்கள், மலையாளப் படங்கள் என பல படங்களைப் பற்றிப் பேசும் அன்பர்களுக்கு ஒரு வேண்டுகோள்.

தயவு செய்து ‘பரதேசி’ படத்தைப் பாருங்கள். தமிழ் சினிமாவின் பெருமைக்காக பாலா பதிவு செய்துள்ள இந்த படத்தைப் பற்றி பாராட்டிப் பேசுங்கள்.

இல்லை, நான் அந்த ஸ்டார், இந்த ஸ்டார், என வெவ்வேறு ஸ்டார்களின் படங்களைப் பற்றித்தான் பாராட்டிப் பேசுவேன் என்று சொன்னால் தமிழ் சினிமாவின் தரம் என்றுமே உயராது.

கடந்த பல வருடங்களாக யதார்த்த தமிழ் திரைப்படங்களின் படைப்பாளியாக பேசப்பட்டு வரும் இயக்குனர் மகேந்திரனுக்கு அடுத்து பாலா என்கிற படைப்பாளி தமிழ் சினிமாவின் தரத்தை உயர்த்த அதிகமாகவே போராடிக் கொண்டிருக்கிறார் என்றே சொல்லத் தோன்றுகிறது.

இன்று நாம் யாரும் பாராட்டிப் பேசாமல் போனாலும், இன்னும் பல வருடங்கள் கழித்து, தமிழ் சினிமாவைப் பற்றிப் பேசும் போது பாலா என்ற இயக்குனர் நிச்சயம் பேசப்படுவார். அதுவே, இயக்குனர் பாலாவுக்குக் கிடைக்கப் போகும் மாபெரும் வெற்றி.

1939ம் ஆண்டு நடக்கும் கதை. பஞ்சத்தில் அடிபட்டு பின் தங்கிய நிலையில் உள்ள ஒரு கிராமத்தில் ‘தண்டோரா’ போட்டுக் கொண்டு வீடு வீடாக சென்று பிச்சை எடுத்து பிழைப்பை ஓட்டுபவர் அதர்வா. இவருக்கும் அதே கிராமத்தில் இருக்கும் வேதிகாவுக்கும் காதல்.

பிச்சை எடுப்பவனுக்கு என் பெண்ணை தர மாட்டேன் என வேதிகாவின் அம்மா பிரச்சனையை எழுப்பி பஞ்சாயத்தைக் கூட்டுகிறார். அப்போது, மலைப்பிரதேச தேயிலைத் தோட்டத்துக்கு  வேலை பார்க்க ஆட்களை கூலிக்கு அழைத்துச் செல்லும் ‘கங்காணி’ ஜெர்ரி அந்த ஊருக்கு வருகிறார்.

பஞ்சம் பிழைப்பதற்காக அதர்வாவும் ஊரிலிருந்து ஒரு கூட்டமும் தேயிலைத் தோட்டத்தில் வேலை பார்க்க பயணமாகிறார்கள். இவர்கள் அங்கே கொத்தடிமைகளாக்கப்பட்டு என்னென்ன கொடுமைகளை அனுபவிக்கிறார்கள் என்பதுதான் படத்தின் மீதி கதை.

‘ஒட்டுப் பொறுக்கி என்கிற ராசா’வாக அதர்வா. சதுரவட்டை ஹேர்ஸ்டைலும், கோணியை மேலாடையாகவும், ஒரு நான்கு முழ வேட்டியை கீழாடையாகவும் அணிந்து கொண்டு , கையில் தண்டோராவுடன், ‘இது நியாயமா…….’ என அறிமுகமாகும் முதல் காட்சியிலேயே இந்த படத்தில் அவருக்குக் கிடைத்துள்ள முக்கியத்துவத்தை உணர்ந்து நடித்திருக்கிறார்.

அப்பாவி மாதிரி சுற்றி வந்தாலும், வேதிகாவை ‘நான் உன்னை நினைக்கிறேன்’ என சரியாக கரெக்ட் செய்து விடுகிறார். போகப் போக அவர் கதாபாத்திரத்திற்குள் நாமும் முழுமையாக சரணடைந்து விடுகிறோம். மூன்றாவது படத்திலேயே நல்ல வாய்ப்பு. ‘பரதேசி’யை உடும்புப் பிடியாக பிடித்து விட்டார் அதர்வா. (அடுத்த படத்துல பேமென்ட்டை ஏத்திடாதீங்க).

செவத்தப் பொன்னு வேதிகா இங்கு கருத்தப் பொன்னு ‘அங்கம்மா’. மேக்கப் போட்டதே தெரியாத மாதிரியான மேக்கப். ஒப்பனைக் கலைஞருக்கு நமது வாழ்த்துக்கள். ஆரம்பத்தில் சில காட்சிகளில் கொஞ்சம் ஓவராகவே நடித்து விட்டார் வேதிகா. அவ்வளவு ஆர்வம், அங்கம்மா கதாபாத்திரத்தில்.

ஒரு சிறுமிக்குத் தாயாக நடித்ததற்காகவே தன்ஷிகாவை தனியாகப் பாராட்டலாம். கொஞ்சமான காட்சிகளில் வருவது போல் தோன்றினாலும் நல்ல படைப்புகளில் தானும் இருக்க வேண்டும் என்பதை ‘மரகதம்’ கதாபாத்திரம் மூலம் அழுத்தமாகவே உணர்த்தியிருக்கிறார்.

கங்காணி – ஜெர்ரி, தங்கராசு – உதய் கார்த்திக், கருத்தக் கன்னி – ரித்விகா, குரூஸ் – மோகன், அதர்வாவின் பாட்டி – கச்சம்மாள், டாக்டர பரிசுத்தம் – சிவசங்கர் மாஸ்டர், மற்றும் படத்தில் கூட்டத்தில் ஒருவராக வந்து செல்பவர்கள் உட்பட அனைவருமே பாராட்டுக்குரியவர்கள். அதிலும், ஆரம்பப் பாடல் ஒன்றில் ஒரு மேளத்தை ஆர்வத்துடன் அடிக்கும் சிறுவன் கூட கவனத்தை ஈர்க்கிறான்.

ஜி.வி. பிரகாஷ்குமார் இசையில் ‘அவத்தப் பையா….’, ‘செங்காடே….’ ‘செந்நீர்தானா….’ பாடல்கள் கதையோட்டத்துடன் பொருத்தமாக அமைந்து வைரமுத்துவின் பாடல் வரிகளாலும் ரசிக்க வைக்கின்றன.

செழியன் ஒளிப்பதிவும், கிஷோரின் படத்தொகுப்பும், நாஞ்சில் நாடன் வசனமும், சி.எஸ். பாலசுந்தரத்தின் வசனமும், பூர்ணிமா ராமசாமியின் உடை வடிவமைப்பும் ‘பரதேசி’க்கு சரியான பக்க பலங்கள்.

இவ்வளவு பாராட்டி எழுதித் தள்ளுகிறீர்களே, ஒரு குறை கூட சொல்ல மாட்டீர்களா என நீங்கள் கேட்பது எங்களுக்கும் புரிகிறது.

இதற்குப் பதில்,

‘தங்கத்திலே ஒரு குறையிருந்தாலும் தரத்தினில் குறைவதுண்டோ…’ என்ற பாடல்தான் மனதில் எழுகிறது.

‘பரதேசி’ – தமிழ் திரைப்பட வரலாற்றில் ஒரு அருமையான பதிவு.

Movie Reviews

அக்னி தேவி – விமர்சனம்

Published

on

அக்னி தேவி விமர்சனம்

ஒரு கொலை, அதற்கான காரணம் என்ன, பின்னணி என்ன, என்பதைக் கண்டுபிடிக்க முயலும் ஒரு போலீஸ் அதிகாரியின் விசாரணைதான் இந்த ‘அக்னி தேவி’.

இயக்குனர்கள் ஜேபிஆர் – ஷாம் சூர்யா இணைந்து இந்தப் படத்தை இயக்கியிருக்கிறார்கள். படத்தின் நாயகன் பாபி சிம்ஹாவே இந்தப் படம் வெளிவரக் கூடாது என வழக்கு தொடுத்து படத்தின் வெளியீட்டைத் தடுக்க முயற்சித்த சம்பவம் இந்தப் படத்தில் உள்ள கதையை விட விறுவிறுப்பான ஒரு உண்மைச் சம்பவம்.

போலீஸ் அதிகாரி பாபிசிம்ஹாவை பேட்டி எடுக்க வரும், ஒரு தொலைக்காட்சி பெண் நிருபர் கொலை செய்யப்படுகிறார். அந்தப் பெண் நிருபர், பாபியின் மனைவி ரம்யா நம்பீசன் வேலை செய்யும் டிவியில் வேலை பார்ப்பவர். அதனால், அந்தக் கொலையை விசாரிக்கச் செல்கிறார் பாபி சிம்ஹா. விசாரணையில் பல திடுக்கிடும் உண்மைகளை அவர் கண்டறிகிறார். குற்றவாளியான பெண் அரசியல்வாதி மதுபாலாவை சட்டத்தின் முன் நிறுத்த முயல்கிறார் பாபி. ஆனால், ஆட்சி, அதிகாரம், பதவி ஆகியவற்றால் தடுக்கப்படுகிறார். முடிவு என்ன என்பதுதான் படத்தின் கிளைமாக்ஸ்.

பொதுவாகவே, ஒரு போலீஸ் கதாபாத்திரத்தில் ஒரு ஹீரோ நடித்தால் அந்தக் கதாபாத்திரத்திற்காகவாவது விறைப்பாக இருப்பார்கள். ஆனால், அக்னி என்று பெயர் வைத்த போலீஸ் அதிகாரி கதாபாத்திரத்தில் பாபியின் நடிப்பில் துளி கூட அனல் தெறிக்கவில்லை. ஏதோ, ஒரு கடமைக்கு நடித்தது போலவே இருக்கிறது. தேசிய விருது பெற்ற ஒரு நடிகர் இப்படியா நடிப்பது..?.

பாபிக்குப் பிறகு படத்தில் அதிக காட்சிகளில் வருவது மதுபாலா. பெண் அரசியல்வாதியாக நடித்திருக்கிறார். ஹிந்தி சீரியல் வில்லி மாதிரி இருக்கிறார். அவரைப் பார்த்து அவரது கட்சிக்காரர்கள் கும்பிடுவதும், கைகட்டி நிற்பதும் தமிழக அரசியலை ஞாபகப்படுத்துகிறது. மதுபாலாவை படத்தில் மாற்றுத் திறனாளியாகக் காட்டுகிறார்கள். அது எதற்கு என்று தெரியவில்லை. உட்கார்ந்து கொண்டே நடிப்பதால் ஓவராகவே நடித்திருக்கிறார் மதுபாலா.

பாபியின் நிழலாய் கூடவே இருக்கும் உதவி அதிகாரியாக சதீஷ். பாபியின் பிரிந்து வாழும் மனைவியாக ரம்யா நம்பீசன். இருவருக்கும் இடையே சில காட்சிகளை வைத்து பின்னர் எடுக்காமல் விட்டுவிட்டார்கள் போலிருக்கிறது.

ஜேக்ஸ் பிஜாய் பின்னணி இசையில் த்ரில்லர் படத்திற்குண்டான பரபரப்பை விட இரைச்சல்தான் இருக்கிறது. இம்மாதிரியான படங்களில் டெக்னிக்கல் விஷயங்கள்தான் இயக்குனருக்குக் கை கொடுக்க வேண்டும்.

ராஜேஷ்குமார் நாவலைப் படமாக எடுத்திருக்கிறார்கள். அவருடைய நாவலைப் படிப்பதற்கே ஒரு பரபரப்பும், விறுவிறுப்பும் இருக்கும். அதை படமாகப் பார்க்கும் போது எப்படியிருந்திருக்க வேண்டும்…?.

Continue Reading

Movie Reviews

எம்பிரான் விமர்சனம்

Published

on

எம்பிரான் விமர்சனம்

பழகிய காதல், பார்த்தும் பேசாத காதல், பழகாத காதல், பார்க்காத காதல் என பல காதல் கதைகள் தமிழ் சினிமாவில் வந்துள்ளன. காதலை கவித்துவமாகச் சொல்லும் காதல் படங்கள் மறக்க முடியாத படங்களாக அமைந்துள்ளன.

இந்தப் படத்தின் இயக்குனர் கிருஷ்ண பாண்டி, ஒரு அழகான காதல் கதையை எடுத்துக் கொண்டிருக்கிறார். காதலியையும் மிக அழகாகக் காட்டியிருக்கிறார், காதலனையும் பொருத்தமாகக் காட்டியிருக்கிறார். திரைக்கதையில் இன்னும் கொஞ்சம் கூடுதலாக கவனம் செலுத்தியிருந்தால் இந்த ‘எம்பிரான்’ என்றென்றும் மறக்க முடியாத ஒரு காதல் படமாக அமைந்திருக்கும்.

காதலை பொதுவாக நண்பர்கள்தான் சேர்த்து வைப்பார்கள். இதைத்தான் பல தமிழ்ப் படங்களில் காலம் காலமாக பார்த்து வருகிறோம். ஆனால், இந்தப் படத்தில் ஒரு ஆத்மா காதலுக்கு கனவில் தூது போய் காதலை சேர்த்து வைக்கப் பாடுபடுகிறது. இதுதான் இந்தப் படத்தில் உள்ள புதுமையான ஒரு விஷயம்.

ரெஜித் மேனன் கல்யாண வயதில் இருக்கும் ஒரு டாக்டர். அம்மாவுடன் வசித்து வருகிறார். அவரை நீண்ட நாட்களாக காதலித்து வருகிறார் ராதிகா ப்ரீத்தி. ஆனால், தன் காதலைப் பற்றி அவர் ரெஜித்திடம் சொன்னதே இல்லை. அதைச் சொல்வதற்குள் ஒரு விபத்தில் சிக்கி, தன் நினைவுகளை இழந்து, கை, கால் செயலிழந்து படுத்த படுக்கை ஆகிறார். ரெஜித்துக்கு அடிக்கடி கனவில் ஒரு பெண்ணும், ஒரு தாத்தாவும் தொடர்ந்து வந்து கொண்டிருக்கிறார்கள். அந்தக் கனவில் வருவது ராதிகாதான் என்பதைக் கண்டுபிடித்து விடுகிறார். ராதிகா தன்னைக் காதலித்திருப்பதைப் பற்றித் தெரிந்து கொள்கிறார். ராதிகாவிற்கு சிகிச்சை அளித்து அவரை பழையபடி மீட்க நினைக்கிறார். அதில் அவர் வெற்றி பெற்றாரா இல்லையா என்பதுதான் படத்தின் கதை.

ஒரு டாக்டர் என்றால் எப்படி இருக்க வேண்டுமோ அப்படியே இருக்கிறார் ரெஜித் மேனன். லேசான சிரிப்பு, இயல்பான தோற்றம் என அந்தக் கதாபாத்திரத்திற்காகவே தேர்ந்தெடுக்கப்பட்டவர் போலிருக்கிறார்.

படத்தை தன் அழகால் அதிகம் ரசிக்க வைப்பர் அறிமுக நாயகி ராதிகா ப்ரீத்தி. ஒளிப்பதிவாளருக்கு ராதிகா மீது அவ்வளவு பாசம் போலிருக்கிறது. எண்ணற்ற குளோசப் காட்சிகளை எடுத்துத் தள்ளியிருக்கிறார். ஹீரோவைச் சுற்றி வரும் ஹீரோயின் கதாபாத்திரம் அரிதான ஒன்று. அதை தன் நடிப்பால் சுவாரசியப்படுத்தியிருக்கிறார் ராதிகா ப்ரீத்தி.

படத்தில் நாயகன், நாயகியைத் தவிர, நாயகனின் அப்பா கல்யாணி நடராஜன், நாயகியின் தாத்தா மௌலி ஆகியோர்தான் முக்கிய கதாபாத்திரங்கள். இப்படி நான்கு கதாபாத்திரங்களுக்குள் படம் நகர்ந்துள்ளது.

படத்தில் நகைச்சுவை என்பது மருந்துக்குக் கூட இல்லை. பிரசன்னாவின் இசையில் இரண்டு, மூன்று டூயட் பாடல்கள் இனிமையாக அமைந்திருந்தால் படத்திற்கு இன்னும் சிறப்பைச் சேர்த்திருக்கும்.

சில காட்சிகளின் நீளத்தைக் குறைத்து, சில காட்சிகளில் விறுவிறுப்பைச் சேர்த்திருந்தால் எம்பிரான் இன்னும் பிரமாதமான வரவேற்பைப் பெற்றிருக்கும்.

எம்பிரான் – ஆத்மார்த்தமான காதல்

Continue Reading

Movie Reviews

நெடுநல்வாடை விமர்சனம்

Published

on

நெடுநல்வாடை விமர்சனம்

‘நெடுநல்வாடை’ என்பதை பள்ளியில் படிக்கும் நாட்களில் படித்தது. அதனால், என்ன அர்த்தம் என விக்கிபீடியாவைத் தேடிய போது, “வாடைக்காலத்தில் நிகழ்வதாலும், தலைவனைப் பிரிந்து வாடும் தலைவிக்கு இது நீண்ட (நெடு) வாடையாகவும், போர் வெற்றியைப் பெற்ற தலைவனுக்கு இது ஒரு நல்ல வாடையாகவும் அமைந்தது குறித்தே இது நீண்ட நல்ல வாடை என்னும் பொருளில் நெடுநல்வாடை எனப் பெயர் பெற்றதாகக் கூறுவர்,” எனக் கிடைத்தது.

ஆம், இந்தப் படமும் தலைவனைப் பிரிந்து வாடும் தலைவியின் கதை என்றும் சொல்லாம். தலைவியைப் பிரிந்து வாடும் தலைவனின் கதை என்றும், பேரனைப் பிரிந்து வாடும் தாத்தாவின் என்றும் சொல்லலாம்.

இயக்குனர் செல்வகண்ணன் ஒரு இயல்பான, உணர்வுபூர்மான மண் மணம் மாறாத படத்தைக் கொடுத்திருக்கிறார். இப்படி ஒரு கிராமத்துப் படத்தைப் பார்த்து எவ்வளவு நாட்களாகிவிட்டது. பாரதிராஜாவுக்குப் பிறகு கிராமத்தையே ஒரு உணர்வுடன் காட்டியது செல்வகண்ணன் என்று சொன்னால் அது மிகையில்லை.

அதற்கு அந்தக் கிராமத்து மனிதர்களாக நடித்த பூ ராம், இளங்கோ, அஞ்சலி நாயர், செந்தி, ஐந்து கோவிலான், அஜய் நடராஜ், மைம் கோபி என அனைவருமே காரணம். ஒவ்வொருவரையும் அவரவர் கதாபாத்திரங்களில்தான் பார்க்க முடிகிறது.

செல்லையா என்ற தாத்தாவாக, பாசமான அப்பாவாக பூ ராம், தாத்தாவின் ஆதரவில் வளர்ந்த கிராமத்து இளைஞன் இளங்கோவாக இளங்கோ, சிறு வயதிலிருந்தே இளங்கோ மீது காதலுடன் இருக்கும் அமுதாவாக அஞ்சலி நாயர், தங்கையின் வாழ்வு முக்கியம், குடும்ப மானம் முக்கியம் என நினைக்கும் அண்ணன் மருதுபாண்டியாக அஜய் நடராஜ், ஊரில் எவ்வளவோ பேர் இருந்தாலும் ஒருவர் மட்டுமே நம் நம்பிக்கைக்குரியவராக இருப்பார், அப்படிப்பட்ட ஒருவர் நம்பியாக ஐந்து கோவிலான், ஒரு பக்கம் வெறுப்பைக் காட்டும் அண்ணன் மைம் கோபி, மறுபக்கம் பாசம் காட்டும் அப்பா, இன்னொரு பக்கம் மகன், மகள் என கிராமத்துத் தாயாக செந்தி என இப்படத்தின் கதாபாத்திரங்களைப் பார்க்கும் போது அதற்காக நடிகர்களா, நடிகர்களுக்காக கதாபாத்திரங்களா என கேட்கத் தோன்றும். அனைவருமே அவரவர் கதாபாத்திரங்களில் அப்படியே வாழ்ந்து நம்மைத் திரையில் கண்கொட்டாமல் பார்க்க வைக்கிறார்கள்.

கணவன் சரி இல்லாததால் அப்பா வீட்டுக்கு தன் இரண்டு குழந்தைகளுடன் வருகிறார் மகள் செந்தி. காதல் கல்யாணம் செய்து கொண்டு ஓடிப் போனாலும், அப்பா பூ ராம் மகளுக்கு ஆதரவு தருகிறார். அண்ணன் மைம் கோபியோ, தங்கை சொத்துக்குப் பங்கு கேட்க வந்துவிடுவாளோ என எதிர்க்கிறார்.  பேரன் இளங்கோ வளர்ந்து பாலிடெக்னிக்கில் படிக்கும் போது அஞ்சலி நாயர் மீது காதல் கொள்கிறார். உன் வாழ்க்கை நிலைமையை நினைத்துப் பார், அதன்பின்தான் காதல் என்கிறார் தாத்தா. பேரன் இளங்கோ தாத்தா பேச்சைக் கேட்கிறாரா, மீறுகிறாரா என்பதுதான் படத்தின் கதை.

ஒரு சாதாரண விவசாயக் குடும்பத்துக்குள் இருக்கும் நடக்கும் நிகழ்வுகளை அந்த வீட்டிற்குப் பக்கத்தில் இருந்தே நாம் பார்ப்பது போன்ற ஒரு உணர்வை படம் முழுவதும் ஏற்படுத்தியிருக்கிறார் இயக்குனர். அந்தக் கிராமத்தில் நாமும் வசிப்பது போல காடு, கழனி, மலை, மேடு, தெரு என நம்மை கூடவே அழைத்துச் செல்கிறார்கள் படம் சம்பந்தப்பட்ட அனைவரும்.

படத்தில் குறைகள் இல்லாமல் இல்லை. சில கேள்விகள் எழாமல் இல்லை. ஆனால், அவற்றையும் மீறி நம்மை படத்துக்குள் ஈர்க்கும் பல விஷயங்கள் இருப்பதால் அவை பெரிதாகக் கண்ணில் படவில்லை.

ஜோஸ் பிரான்க்ளின் இசை, வைரமுத்து பாடல்கள், வினோத் ரத்தினசாமியின் ஒளிப்பதிவு, காசி விஸ்வநாதனின் படத் தொகுப்பு படத்துக்கு கூடுதல் பலத்தைத் தந்திருக்கிறது.

50 தயாரிப்பாளர்கள் ஒன்று சேர்ந்து அவர்களுடைய நண்பன் செல்வகண்ணனுக்காக இந்தப் படத்தைத் தயாரித்திருக்கிறார்கள். அவர்கள் எண்ணமும் பெரிது, இயக்குனரின் கைவண்ணமும் இனிது.

நெடுநல்வாடை போல நூறு திரைப்படங்கள் வந்து தமிழ் சினிமாவை வாழ வைக்கட்டும்.

Continue Reading
Advertisement

Tamil Movies Database

Trending