Connect with us

Movie Reviews

பரியேறும் பெருமாள் – விமர்சனம்

Published

on

pariyerum-perumal-review

2018ம் ஆண்டில் சில அறிமுக இயக்குனர்களின் படங்கள் தமிழ் சினிமா மீதான நம்பிக்கையை அதிகம் விதைத்துள்ளது.

அந்த விதத்தில் இந்த ‘பரியேறும் பெருமாள்’ படத்தைத் தன் முதல் படமாகக் கொடுத்துள்ள இயக்குனர் மாரி செல்வராஜ் திரையுலக ரசிகர்களின் கவனத்தை நிச்சயம் ஈர்ப்பார்.

கதைக்களம், கதாபாத்திரங்கள், காட்சிகள், வசனங்கள் என அனைத்திலுமே யதார்த்தம் இழையோடுகிறது. ஒரு படத்தில் இடம் பெற்றுள்ள கதாபாத்திரங்களின் பெயர்கள் நம் மனதில் இடம் பிடிப்பதுதான் அந்தப் படத்தின் உண்மையான வெற்றி.

இந்தப் படத்தின் முதன்மைக் கதாபாத்திரங்களான பரியேறும் பெருமாள், ஜோ என்கிற ஜோதி மகாலட்சுமி ஆகிய இரண்டும் படம் பார்த்துவிட்டு வெளியில் வந்து பல மணி நேரமாகியும் நம் மனதில் அப்படியே உட்கார்ந்துவிடுகிறது.

கதாபாத்திரங்களுக்காகத்தான் நட்சத்திரத் தேர்வு இருக்க வேண்டும் என்பதை இந்தப் படம் அழுத்தமாக உணர்த்தியிருக்கிறது. முதன்மைக் கதாபாத்திரங்கள் முதல் ஊரில் உள்ள ஒருவர் என ஒரே காட்சியில் வருபவர் கூட எந்த சினிமாத்தனம் இல்லாமல் தேர்வு செய்து நடிக்க வைக்கப்பட்டிருக்கிறார்.

அதிலும், நாயகனின் அப்பா கதாபாத்திரம் இதுவரை தமிழ் சினிமாவில் வராத ஒன்று. அதற்காக தேர்வு செய்யப்பட்டு நடிக்க வைக்கப்பட்ட தங்கராஜ் அவருடைய நடிப்பில் மனதை கனக்கச் செய்துவிடுகிறார்.

நெல்லைச் சீமையின் புளியங்குளம் கிராமத்து இளைஞராகவே மாறிவிட்டார் கதிர். ஒரு பழைய லுங்கி, டீ சர்ட் என எளிமையான உடையுடன் அவருடைய கதாபாத்திரத்தை வலிமையாகச் செய்திருக்கிறார். உடல்மொழி, முகபாவம், வசன உச்சரிப்பு என பரியேறும் பெருமாள் கதாபாத்திரத்தில் அவருடைய நடிப்பு ஏற்றமாக அமைந்துள்ளது.

ஜோ என்கிற ஜோதிலட்சுமி ஆக ஆனந்தி. இப்படி ஒரு இயல்பான அழகுடன் ஆர்பாட்டம் இல்லாமல், ஆடம்பரம் இல்லாமல், அலட்டல் இல்லாமல் தமிழ் சினிமா கதாநாயகியின் கதாபாத்திரத்தைப் பார்ப்பதற்கு எவ்வளவு ஆனந்தமாக உள்ளது. கதிர் மீது இருப்பது என்ன என்பது குறித்து கண்ணை மூடிக் கொண்டு அவர் பேசும் காட்சியில் கண்கலங்காமல் இருக்க முடியாது.

சாதி, மதம், அந்தஸ்து பார்க்காமல் வருவதுதான்  நட்பு என்பதை யோகி பாபு கதாபாத்திரம் மூலம் உணர்த்தியிருக்கிறார் இயக்குனர்.

சாதி வெறி பிடித்த அப்பாவாக மாரிமுத்து, அண்ணனாக லிஜிஷ், ஆணவக் கொலை செய்யும் பெரியவர் கராத்தே வெங்கடேசன், கல்லூரி முதல்வர் பூ ராம், அப்பாவாக நடிக்க வரும் சண்முகராஜன் என மற்ற கதாபாத்திரங்கள் கூட மனதில் இடம் பிடிக்கின்றன.

சந்தோஷ் நாராயணனின் இசை, ஸ்ரீதரின் ஒளிப்பதிவு இந்த பெருமாளுக்கு சங்கு, சக்கரமாக அமைந்துள்ளன.

புளியங்குளம் கிராமத்திலிருந்து திருநெல்வேலி சட்டக் கல்லூரிக்கு சட்டம் படிக்கச் செல்லும் கதிர், சாதிய ஏற்றத் தாழ்வுகளால் அவமானப்படுத்தப்படுகிறார். அவர் மீது காதல் கொள்கிறார் வேற்று சாதியைச் சேர்ந்த ஆனந்தி. இந்தக் காதல் விவகாரத்தில் கதிரைக் கொல்லத் துடிக்கிறார்கள் ஆனந்தியின் அப்பாவும், அண்ணனும். அவர்களை எதிர்த்து தன் வழியிலேயே தான் யார் என்பதைப் புரிய வைக்கிறார் கதிர். இவ்வளவு நேர்மையான ஒரு காதல் கதை தமிழ் சினிமாவில் இதுவரை வந்திருக்குமா என்பதும் சந்தேகம்தான்.

படத் தயாரிப்பாளர் இயக்குனர் பா.ரஞ்சித் ஒரு தயாரிப்பாளராக, இயக்குனர் மாரி செல்வராஜை அறிமுகப்படுத்தி தமிழ் சினிமாவில் மேலும் பல புதிய யதார்த்த படைப்புகள் வருவதற்கு வழி செய்திருக்கிறார். தயாரிப்பாளரின் நம்பிக்கையை இயக்குனர் மாரியும் காப்பாற்றியிருக்கிறார். மாரியின் எண்ணத்திற்கு படத்தில் நடித்துள்ளவர்களும் நல்ல உருவம் கொடுத்திருக்கிறார்கள்.

சாதிக் கொடுமை பற்றிய ஒரு படத்தை அந்தந்த சாதிகளின் பெயரைச் சொல்லாமலேயே படம் பார்க்கும் ஒவ்வொரு ரசிகனுக்கும் அந்த தாக்கத்தை ஏற்படுத்தியிருக்கிறார்.

இன்னும் பல வருடங்களுக்கு இந்த ‘பரியேறும் பெருமாள்’ ஒரு ‘மேற்கோள்’ படமாக இருக்கும் என்பது நிச்சயம்.

பரியேறும் பெருமாள் – வெற்றி உலா

Movie Reviews

தேவ் – விமர்சனம்

Published

on

dev-movie-review

ஒரு ஆக்ஷன் படம்னா ஆக்ஷன் இருக்கணும், சென்டிமென்ட் படம்னா சென்டிமென்ட் இருக்கணும், காதல் படம்னா காதல் இருக்கணும். இந்த ‘தேவ்’ படமும் ஒரு காதல் படம்தான். படம் முழுக்க நாயகனும், நாயகியும் காதலிச்சிட்டே இருக்கிற படம்.

காதல் படம்னாலே வில்லன்கள் கண்டிப்பா இருப்பாங்க. ஆனா, இந்தக் காதல் படத்துல வில்லனே கிடையாது. காதலுக்கு காதலிக்கிற நாயகிதான் கொஞ்சமே கொஞ்சமான வில்லி. அதுவும் அவங்க குணத்தால, சுயநலத்தால வர வில்லத்தனம்.

அழ வேண்டாம், அதிகமா சிரிக்க வேண்டாம், அப்படியே ஒரு டிராவல் பண்ற மாதிரி ஜாலியா ஒரு படம் பார்க்கணும்னு நினைக்கிறவங்களுக்கு இந்தப் படம் பிடிக்கும்.

ஊரைச் சுத்தறது, அதையும் பிடிச்ச மாதிரி ஜாலியா, சாகசம் பண்ணிக்கிட்டே சுத்தறது நாயகன் கார்த்திக்கு ரொம்பவே பிடிக்கும். கூடவே, தன் பிரண்ட்ஸ் விக்னேஷ், அம்ருதா அவங்களோடதான் சுத்துவாரு. சின்ன வயசுல இருந்தே அடிக்கடி ரொம்ப தொந்தரவு பண்றானே, அவனை எதுலயாவது சிக்க வைக்கணும்னு நினைக்கிற பிரண்ட் விக்னேஷ், காதல்ல சிக்க வச்சிடறாரு. பேஸ்புக் மூலமா யார் பத்துக்குள்ள முதல்ல வராங்களோ அவங்கதான் காதலின்னு பிரண்ட்ஸ் சொல்றாங்க. அப்படி வந்து நிக்கிறவங்கதான் ரகுல் ப்ரீத் சிங். அமெரிக்காவுல வசிக்கிற தமிழ்நாட்டைச் சேர்ந்த இளம் பிசினஸ் உமன். ரகுலைக் காதலிக்க வைக்க கார்த்தி என்ன பண்றாரு, அவங்க காதல் சேர்ந்துதா இல்லையாங்கறதுதான் இந்த ‘தேவ்’.

‘பையா’ படத்துக்கு அப்புறமா ஒரு ஜாலியான கேரக்டர்ல கார்த்தி. சிட்டியோ, வில்லேஜோ, பணக்காரனோ, ஏழையோ, மிடில் கிளாஸோ எல்லா கேரக்டர்லயும் தன்னை அழகா செட் பண்ணிக்கிறாரு கார்த்தி. இந்தப் படத்துல 20 காஸ்ட்லி பைக் சொந்தமா வச்சிருக்கிற ஒரு பணக்கார வீட்டுப் பையன். பைக்லயே மும்பை வரைக்கும் போய் காதலியைப் பார்த்து காதலை சொல்ற கேரக்டர். படிக்கிறதுக்கும் நல்லா இருக்கு, கார்த்தி பண்றதும் நல்லா இருக்கு. ஆனால், கார்த்தியோட நடிப்புக்கு இயக்குனர் ரஜத் இன்னும் தீனி போட்டிருக்கலாம்.

ரகுல் ப்ரீத் சிங், பார்த்ததுமே ஒரு திமிரான பொண்ணுன்னு சொல்ற மாதிரிதான் இருக்காங்க. அவங்க கண்கள்தான் கார்த்தியை காதல்ல விழ வைக்குதுன்னு சீன் வச்சிருக்காங்க. காதலி என்பதையும் மீறி படம் முழுவதும் அவரை பிசினஸ் உமனாக மட்டுமே பார்க்க முடிகிறது. அந்தக் கேரக்டரில் அப்படியே மூழ்கி விட்டார் போலிருக்கிறது. காதலியாக காதலிலும் கொஞ்சம் மூழ்கியிருக்கலாம்.

தமிழ் சினிமாவில், நாயகனுக்கு பிரண்டாக ஒரு பெண்ணை நடிக்க வைத்து மச்சி, மச்சான் என அழைக்க வைத்த முதல் படமாக இதுதான் இருக்கும். அவ்வளவு நெருக்கமான தோழியாக அம்ருதா, அப்படியே கதாபாத்திரமாகவே மாறியிருக்கிறார். இப்படிப்பட்ட பிரண்ட் தான் பல இளைஞர்களின் கனவாகவும் இருக்கிறது. விக்னேஷ் போன்ற நண்பர்களும் பலருடைய வாழ்வில் உண்டு. ஆனால், படத்தில் விக்னேஷ் சிரிக்க வைப்பார் என்று பார்த்தால் கொஞ்சம் ஏமாற்றமே.

கார்த்தியின் அப்பாவாக பிரகாஷ் ராஜ், ரகுலின் அம்மாவாக ரம்யா கிருஷ்ணன். இந்தக் காலத்து அப்பா, அம்மா. தங்கள் பிள்ளைகளின் விருப்பமே தங்கள் விருப்பம் என நினைப்பவர்கள்.

ஹாரிஸ் ஜெயராஜ் இசையில் ‘அனங்கே…’ பாடலின் வரிகளும், குரல்களும் இனிமை. இந்தப் பாடலும், மற்ற பாடல்களும் கேட்ட உடனேயே ஹாரிஸ் இசை என்று எளிதில் சொல்லிவிடலாம். காதலைக் குழைத்து இன்னும் சில பாடல்களை அமைத்திருக்கலாம்.

வேல்ராஜின் ஒளிப்பதிவுக்கு நிறைய காட்சிகளை உருவாக்கிக் கொடுத்திருக்கிறார் இயக்குனர். சூரியன் உதிப்பதும், எவரெஸ்ட் உயரமும், வெளிநாட்டு சாலைகளும் படத்திற்கு வேறு ஒரு கலரைக் கொடுக்கின்றன.

பிரிந்தால்தான் காதலும் சேரும் என்பதுதான் இன்றைய 2019 தேவ் காதல்.

Continue Reading

Movie Reviews

கோகோ மாக்கோ – விமர்சனம்

Published

on

goka-mako-review

டிஜிட்டல் வளர்ச்சி வந்த பிறகு திரைப்படத்திற்கென இருந்த இலக்கணம் இல்லாமல் போய்விட்டது. பல புதியவர்கள் அவர்கள் எழுதும் சாதாரண கதையைக் கூட திரைப்படங்களாக வெளியிடுகிறார்கள்.

அவற்றில் சில வித்தியாசமாக அமைகின்றன. சில படங்கள் இன்னும் கூடுதலாக விஷயங்களைச் சேர்த்திருக்கலாம் என எண்ண வைக்கின்றன.

இந்த ‘கோகோ மாக்கோ’ என்றால் என்ன அர்த்தம் என்று கூட தெரியவில்லை. ‘கோக்கு மாக்காக’ செய்வதைத்தான் படத்தின் தலைப்பாக வைத்திருப்பார்கள் போலிருக்கிறது.

தலைப்பில் வைத்த நகைச்சுவை உணர்வை படம் முழுவதும் வைத்திருந்தால் ஒரு நகைச்சுவைப் படத்தை ரசித்த திருப்தியாவது இருந்திருக்கும்.

இசையில் சாதிக்க வேண்டும் என்று நினைக்கும் ஒரு இளம் இசையமைப்பாளரின் ஆல்பத்தை ஒரு இசை நிறுவனம் வெளியிட சம்மதிக்கிறது. அதற்காக மியூசிக் வீடியோ ஒன்றைத் தயார் செய்ய முடிவு செய்கிறார். சாலைப் பயணம் மேற்கொள்ளும் ஒரு காதல் ஜோடியின் பயணத்தை அவர்களுக்கே தெரியாமல் கேமரா வைத்து எடுத்து அதை வீடியோ ஆல்பமாக உருவாக்குகிறார்கள். அந்த ஆல்பம் வெளியானதா, காதல் ஜோடியின் சாலைப் பயணம் என்ன ஆனது என்பதுதான் படத்தின் கதை.

படம் முழுவதையும் ‘கோ-ப்ரோ’ கேமராவில் எடுத்திருக்கிறார்கள். இளம் காதல் ஜோடியாக நடித்திருப்பவர்கள் நிஜக் காதல் ஜோடி போலவே யதார்த்தமாய நடித்திருக்கிறார்கள். அவர்களைப் பின் தொடர்ந்து படம் எடுக்கும் சாம்ஸ் மற்றும் அவரது உதவியாளர் காமெடி என்ற பெயரில் நம் பொறுமையை சோதிக்கிறார்கள்.

இசையமைப்பாளர், படத் தொகுப்பாளர் என நண்பர்களாக நடிப்பவர்கள் கூட ஓரளவிற்கு சிரிக்க வைக்கிறார்கள். ஆனால், அவர்களது நடிப்பு நாடகத்தனமாக உள்ளது.

சீனியர் நடிகர்களான ஒய்ஜி மகேந்திரா, சந்தான பாரதி, டெல்லி கணேஷ், அஜய் ரத்தினம் ஆகியோர்தான் படத்தில் தெரிந்த முகங்கள்.

ஒன்றரை மணி நேரத்தில் படத்தை முடித்துவிட்டார்கள். டெக்னிக்கலாக புதிய முயற்சி என்பதால் பாராட்டலாம். கூடவே கதை, திரைக்கதை ஆகியவற்றை திரைப்படத்திற்காக யோசிக்காமல் ஒரு குறும்பட அளவில் யோசித்திருக்கிறார்கள். அடுத்த படத்தில் சரி செய்து கொள்வது நல்லது.

Continue Reading

Movie Reviews

தில்லுக்கு துட்டு 2 – விமர்சனம்

Published

on

dhillukku-dhudu-2-review

தமிழ் சினிமாவில் நகைச்சுவைப் படங்களும், நகைச்சுவைக் காட்சிகளும் நிறையக் குறைந்துவிட்டது என்று வருத்தப்படும் ரசிகர்களுக்காகவே எடுக்கப்பட்டுள்ள படம்தான் ‘தில்லுக்கு துட்டு 2’.

இப்படி சிரித்து எவ்வளவு நாளாயிற்று என்று படத்தைப் பார்த்துவிட்டு வெளியில் வரும் ரசிகர்கள் கண்டிப்பாகச் சொல்வார்கள். ஒரு இடைவெளிக்குப் பிறகு மீண்டும் பழைய சந்தானத்தைப் பார்ப்பது எவ்வளவு ஆறுதல்.

சந்தானத்தின் காமெடி சரவெடி ஒவ்வொரு காட்சியிலும் இருக்கிறது. படத்தின் ஆரம்பத்திலிருந்து கடைசி வசனம் வரை சந்தானத்தின் காமெடி சரக்கு நமக்கு நிச்சயம் போதையை ஏற்படுத்தும். படத்தில் அடிக்கடி சந்தானம் சரக்கடித்துக் கொண்டிருந்தாலும் காமெடி சரக்கில் அவர் எந்தக் குறையும் வைக்கவில்லை. குடிக்கும் காட்சிகளை படங்களில் குறைத்துக் கொள்வது அனைவருக்கும் நல்லது.

இயக்குனர் ராம்பாலா ‘தில்லுக்கு துட்டு’ படத்தை விட இந்த இரண்டாம் பாகத்தில் கூடுதலாக நகைச்சுவைக் காட்சிகளை வைத்திருக்கிறார். சில படங்களைப் பார்க்கும் போது எப்போது முடியும் என்று இருக்கும். ஆனால், இந்தப் படம் முடியும் போது, அடடா..அதற்குள் முடித்துவிட்டார்களே, இன்னும் கொஞ்ச நேரம் சிரிக்க வைத்திருக்கலாமே என்று எண்ணத் தோன்றுகிறது. அது இயக்குனருக்குக் கிடைத்த வெற்றி.

தான் நாயகனாக நடிப்பதற்குரிய இப்படிப்பட்டக் கதைகளைத் தேடிப் பிடித்து நடிப்பதுதான் சந்தானத்திற்கு சிறப்பு. மற்ற படங்களை ஒதுக்கி வைத்துவிட்டு, இந்தப் படத்தை ஆரம்பித்து சீக்கிரமே முடித்து வெளியிட்டு இந்தப் புது வருடத்தில் புது வெற்றியுடன் ஆரம்பித்துவிட்டார். வருடத்திற்கு இப்படி மூன்று படங்களிலாவது நடித்து மக்களை மகிழ்ச்சியடைய வையுங்கள் சந்தானம், புண்ணியமாப் போகும்.

நாயகியாக ஷ்ரிதா சிவதாஸ். கேரள தேசத்துப் பெண்கள் என்றாலே தமிழக இளைஞர்களுக்கு ஒரு கிறக்கம் வந்துவிடும். அந்த அளவிற்கு இந்தப் படத்திலும் சிரித்த முகத்துடன், குடும்பக் குத்து விளக்காக நம்மைக் கவர்கிறார் ஷ்ரிதா.

ஷ்ரிதா சந்தானத்தின் காதல் ஜோடி என்றால், நான் கடவுள் ராஜேந்திரன் காமெடி ஜோடியாக கலக்குகிறார். இரண்டு பேரும் படம் முழுவதும் இணை பிரியாமல் இருக்கிறார்கள். கவுண்டமணி, செந்தில் ஜோடி போல இந்த சந்தானம், ராஜேந்திரன் காமெடி ஜோடி கலக்குகிறது.

ஊர்வசி, பிபின், சிவசங்கர், டி.எம். கார்த்திக், பிரசாந்த் ராஜ் ஆகியோர் மற்ற கதாபாத்திரங்களில் சிறப்பாக நடித்து கூடுதல் சிரிப்பை வரவழைக்கிறார்கள்.

ஷபிர் இசையில் ‘மவனே யாரு கிட்ட’ லோக்கல் பாடலாகவும், ’காத்தாடி போல’ பாடல் மெலடியாகவும் ஒலிக்கிறது.

பேய்ப் படம் என்பதால் எந்த லாஜிக்கையும் பார்க்கத் தேவையில்லை. காமெடிப் படமாக இருந்தாலும் ஏமாற்றும் சாமியார்களை வெளிச்சம் போட்டுக் காட்டுகிறது படம்.

இரண்டு மணி நேரம் சிரித்து ரசிக்க வேண்டும் என்றால் துட்டு செலவாகிறது என்று பார்க்காமல் ‘தில்லுக்கு துட்டு 2’ போகலாம். தியேட்டரில் சிரித்து விட்டு வந்தால் உடலுக்கும், மனதுக்கும் நல்லது.

Continue Reading
Advertisement

Tamil Movies Database

No feed items found.

Trending