Connect with us

Movie Reviews

சரவணன் இருக்க பயமேன் விமர்சனம்

Published

on

saravanan irukka bayamen

ஒரு மிகப் பெரும் அரசியல் கட்சியின் வாரிசாகக் கருதப்படும் உதயநிதி ஸ்டாலின், இப்படி ஒரு ‘காமெடி’ அரசியல் கட்சியின் மாநிலத் தலைவர் கதாபாத்திரத்தில் நடிக்க எப்படி சம்மதித்தார் என்பதுதான் நமது முதல் கேள்வி.

அதிலும் அந்தக் கட்சியின் பதவியைக் கூட நண்பர் சூரியை விரட்டி விட்டு கைப்பற்றுகிறார்கள்.

‘மனிதன்’ படம் மூலம் மெச்சூரிட்டியான படங்களில், கதாபாத்திரங்களில் நடித்து தன்னுடைய இமேஜை உயர்த்திக் கொண்டவர், இப்படி ஒரு ‘மட்டமான’ கதை கொண்ட படத்தில் நடித்திருக்கவே கூடாது. படத்தின் முழு கதையையும், காட்சிகளையும் கேட்டுதான் நடிக்க சம்மதித்தாரா என்ற கேள்வி படம் பார்க்கும் ஒவ்வொருவருக்கும் எழும்.

ஒரு காமெடி கூட்டத்தை வைத்துக் கொண்டு, இமான் இசையில் இனிமையான இரண்டு பாடல்களை வைத்துக் கொண்டு, நடிகர், நடிகைகள் என்ன பேசுகிறார்களோ, பேசட்டும், அப்படியே படத்தை முடித்து விடலாம் என இயக்குனர் எழில் நினைத்துவிட்டார் போலிருக்கிறது.

ஜாலியாக ஊரைச் சுற்றிக் கொண்டிருக்கும் உதயநிதி ஸ்டாலின், ஒரு தேசிய கட்சியின் மாநிலத் தலைவர் என்ற பொறுப்பை, சூரியிடமிருந்து தட்டிப் பறித்துக் கொள்கிறார். சிறு வயதில் ஊரை விட்டுப் போன அவர்களது குடும்ப நண்பரின் மகள் ரெஜினா மீண்டும் ஊருக்கு வருகிறார். சிறிய வயதில் எப்படி சண்டை போட்டுக் கொண்டார்களோ, அப்படியே மீண்டும் சண்டை போட்டுக் கொள்கிறார்கள் உதயநிதியும், ரெஜினாவும்.

ஆனால், உதயநிதிக்கு ரெஜினா மீது காதல். இருந்தாலும் ரெஜினாவுக்கும், அந்த ஊர் காமெடி பெரிய மனிதர் (?) மன்சூரலிகான் மகன் சாம்ஸ்-க்கும் திருமணம் நிச்சயிக்கிறார்கள். இந்த சந்தர்ப்பத்தில் உதயநிதியின் முன்னாள் கல்லூரித் தோழியான சிருஷ்டி டாங்கே, உதயநிதிக்கு ஆவியாக காட்சி தருகிறார். தன் தோழி ஆவியிடம் தன் காதலுக்கு உதவி கேட்கிறார் உதயநிதி. கதை சொன்னது போதும் என நீங்கள் கேட்பது புரிகிறது…இதன் பின் என்ன என்பதுதான் படத்தின் மீதிக் கதை.

உதயநிதி ஸ்டாலின், படத்தில் நடிக்க சம்மதித்துவிட்டோம், நடித்து முடித்து விடுவோம் என்ற ரீதியில் நடித்தது போலத்தான் தெரிகிறது. அவருடைய முந்தைய படங்களில் நடித்ததை விட இந்தப் படத்தில் சரிபாதி தான் நடித்திருக்கிறார். ஆனால், இரண்டு டூயட்களில் மட்டும் சானல்களில் அடிக்கடி பாடல்களைப் போடவார்களே என கவனமாக நடித்திருக்கிறார்.

ரெஜினா, வழக்கம் போல தமிழ் சினிமாவின் லூசுப் பெண் கதாநாயகியாகவே தெரிகிறார். இவருக்குள் சிருஷ்டியின் ஆவி புகுந்து கொள்வது எல்லாம் எந்த விதத்தில் சேர்ப்பது என்றே தெரியவில்லை.

ஒரு பாட்டு, நான்கைந்து காட்சிகள் அத்துடன் சிருஷ்டியின் வேலை முடிந்து விடுகிறது.

படத்தின் நகைச்சுவைப் பகுதிக்கு சூரி தான் பொறுப்பு என்று நீங்கள் நினைத்தால் அது தவறு. ஒரு காட்சியிலாவது சிரிக்க வைப்பார் என்று பார்த்தால் பொறுமையை சோதிக்கிறார். யோகி பாபு மட்டும் இல்லை என்றால் அந்த ஒரு சில காட்சிகளில் கூட சிரித்திருக்க மாட்டோம்.

ரவி மரியா, ரோபோ சங்கர் சிறப்புத் தோற்றமெல்லாம் ஐயகோ, ஆள விடுங்க சாமி என சொல்ல வைக்கிறது.

இமான் இசையில் ‘எம்புட்டு இருக்குது, லாலா கடை சாந்தி’ பாடல்கள்தான் படத்திற்கு அடையாளம். அந்தப் பாடல்களை அடிக்கடி டிவியில் போடப் போகிறார்கள்.

அப்புறம் என்ன ?, படம் பார்க்கலாமா என்று கேட்கிறீர்களா..?.

‘பாகுபலி 2’ பார்த்த கண்களால், இந்த ‘சரவணன் இருக்க பயமேன்’ படத்தையும் பார்க்க வைத்துவிட்டார்களே…

Uncategorized

அயோக்யா – விமர்சனம்

4 Tamil Cinema Rating – 3.5/5

Published

on

அயோக்யா - விமர்சனம் - 4 Tamil Cinema

வெங்கட் மோகன் இயக்கத்தில், சாம் சி.எஸ். இசையமைப்பில், விஷால், ராஷி கண்ணா, பார்த்திபன், கே.எஸ். ரவிக்குமார் மற்றும் பலர் நடிக்க வெளிவந்திருக்கும் படம் ‘அயோக்யா’.

பெண்களுக்கு எதிரான வன்கொடுமையைப் பற்றியும், அதற்கான உடனடித் தீர்வையும் சொல்லும் படம். தெலுங்கில் வெளிவந்து பெரும் வெற்றி பெற்ற ‘டெம்பர்’ படத்தை தமிழில் ரீமேக் செய்திருக்கிறார்கள். ஒரிஜனல் படத்தில் உள்ள கிளைமாக்சை மட்டும் மாற்றியிருக்கிறார்கள்.

அயோக்கியத்தனமாக செயல்படும் ஒரு இன்ஸ்பெக்டர் ஒரு பெண்ணுக்காக எப்படி மிக மிக யோக்கியத்தனமாக மாறுகிறார் என்பதுதான் படத்தின் ஒரு வரிக் கதை.

விஷால் ஒரு அனாதை. போலீசார்தான் அதிகாரத்தில் உள்ளவர்கள், அவர்கள் நினைத்தால் எவ்வளவு வேண்டுமானாலும் சம்பாதிக்கலாம் என சிறு வயதிலேயே அவர் மனதில் ஆழமாகப் பதிகிறது. பொய் சான்றிதழ் கொடுத்து இன்ஸ்பெக்டர் ஆகவும் ஆகிறார். சென்னையில் பல கடத்தல் வேலைகளைச் செய்யும் பார்த்திபன் அவருடைய தொழிலுக்கு தொந்தரவு செய்யாத இன்ஸ்பெக்டர் வேண்டும் என்பதற்காக அவருடைய ஏரியாவில் விஷாலை வேலைக்கு மாற்றிக் கொண்டு வருகிறார்.

பார்த்திபனுக்காக செய்யும் வேலைகளுக்கு பதிலுக்கு தன் பல தேவைகளைப் பூர்த்தி செய்து கொள்கிறார் விஷால். ஆனால், ஒரு பெண் கொலை வழக்கில் பார்த்திபனுக்கும், விஷாலுக்கும் பிரச்சினை வருகிறது. அதன் பின் என்ன நடக்கிறது என்பதுதான் படத்தின் மீதிக் கதை.

ஆக்ஷன் ஹீரோ கதாபாத்திரம் என்றால் கேட்கவே வேண்டாம். விஷால் வெளுத்து வாங்குகிறார். அயோக்கியத்தனம் செய்யும் ஒருவன் இப்படித்தான் இருப்பான் என யாரையும் மதிக்காமல் சுற்றி வருகீறார். அப்படிப்பட்டவரை காதலும், ஒரு பெண்ணின் கொலையும் மாற்றுகிறது. கிளைமாக்சை தன் இமேஜுக்காகவே விஷால் மாற்றியிருப்பார் போலிருக்கிறது. நெகிழ வைக்கும் கிளைமாக்ஸ்தான் என்றாலும் நம்பவே முடியாத ஒரு கிளைமாக்ஸ்.

‘நானும் ரௌடிதான்’ படத்திற்குப் பிறகு பார்த்திபனின் வில்லத்தனம் ரசிக்க வைக்கிறது. விஷாலை அசால்ட்டாக ஹேண்டில் செய்கிறார். இருவருக்குமிடையிலான வசன சண்டை ரசிக்க வைக்கிறது.

ராஷி கண்ணா விஷாலின் காதலியாக அழகுப் பதுமையாக வந்து போகிறார். கே.எஸ்.ரவிக்குமாரின் கதாபாத்திரமும் அதில் அவருடைய நடிப்பும் போலீஸ் மீதான மரியாதையை இன்னும் அதிகமாக்குகிறது.

சாமி சிஎஸ் பின்னணி இசையில் அசத்துகிறார். ஒளிப்பதிவும், சண்டைக் காட்சிகளும் படத்திற்கு பக்கபலம்.

பக்காவான கமர்ஷியல் படத்தை சில லாஜிக் மீறல்களுடன் கொடுத்து ரசிக்க வைத்திருக்கிறார் இயக்குனர் வெங்கட் மோகன்.

அயோக்யா – ஆக்ஷன் படம்யா…

Continue Reading

Movie Reviews

கீ – விமர்சனம்

4TamilCinema – Rating – 3/5

Published

on

கீ விமர்சனம் - 4 Tamil Cinema

காளீஸ் இயக்கத்தில் விஷால் சந்திரசேகர் இசையமைப்பில், ஜீவா, நிக்கி கல்ரானி, அனைகா சோதி, கோவிந்த் பத்மசூர்யா, ஆர் ஜோ பாலாஜி மற்றும் பலர் நடித்திருக்கும் படம் ‘கீ’.

சைபர் கிரைம் பற்றிய ஒரு படம். நமது மொபைல் போன்களை ஹேக்கர்கள் யார் வேண்டுமானாலும் ஹேக் செய்து நம் ரகசியங்களைத் தெரிந்து கொள்ளலாம் என அதிர்ச்சியான கதையைக் கொண்ட படம்.

பேஸ்புக், டிவிட்டர் உள்ளிட்ட சமூக வலைத்தளங்களில் நாம் பதிவிடும் அனைத்துமே எந்த ரகசியமும், ஒளிவு மறைவும் இல்லாமல் யார், யாருக்கோ பரப்பி வைக்கிறது என்பதை வெட்ட வெளிச்சமாகச் சொல்லியிருக்கிறார்கள். அப்படி நம்மைப் பற்றி பரவும் விஷயங்கள் சமயங்களில் நமக்கு எதிராகவே திரும்பும் என்பதையும் அதிர்ச்சிகரமான உண்மையுடன் சொல்லியிருக்கும் படம்தான் கீ.

இந்தப் படத்தை டெக்னாலஜி படமாக மட்டும் சொல்லாமல் காமெடி, காதல், சென்டிமென்ட் என சேர்த்து சொல்ல இயக்குனர் ஆசைப்பட்டதால் மெயின் கதையிலிருந்து படம் கொஞ்சம் நகர்ந்து சுவாரசியத்தைக் கொஞ்சம் குறைக்க வைக்கிறது.

ஜீவா ஒரு ஜாலியான கல்லூரி மாணவர். எந்தவிதமான கம்ப்யூட்டரையும், மொபைல் போனையும் அவருடைய ‘பாட்ஷா’ வைரசால் ஹேக் செய்துவிடுவார். அவருடைய தோழியாகப் பழக ஆரம்பிக்கும் அனைகாவின் கொலைக்குப் பிறகு அவருக்கும் ஹேக் செய்து பணம் சம்பாதிப்பதையே தொழிலாக வைத்திருக்கம் கோவிந்த் பத்மசூர்யாவுக்கும் இடையே மோதல் வருகிறது. பத்மசூர்யா சம்பந்தப்பட்ட ரகசியத்தை ஜீவா வைத்திருக்கிறார். அதைக் கைப்பற்ற பத்மசூர்யா துடிக்கிறார். இதன் பின்ன என்ன நடக்கிறது என்பதுதான் படத்தின் கதை.

ஒரு வழக்கமான இளம் நாயகன் கதாபாத்திரத்தில் ஜீவா. ஜாலியாக நடித்துவிட்டுப் போகிறார். காதல், காமெடி, ஆக்ஷன் என அனைத்தையும் அவர் கதாபாத்திரத்தில் வைத்துவிட்டார் இயக்குனர். இந்தக் கதைக்கு முற்றிலும் ஆக்ஷன் சம்பந்தமாகவே வைத்திருந்தால் இன்னும் சிறப்பாக இருந்திருக்கும்.

நிக்கிக்கு அவ்வளவாக வாய்ப்பில்லை. ஜீவாவின் பெற்றோர்களாக ராஜேந்திர பிரசாத், சுகாசினி சென்டிமென்ட்டில் நனைய வைக்கிறார்கள். ஆர்ஜே பாலாஜி ஆங்காங்கே சிரிக்க வைக்கிறார்.

விஷால் சந்திரசேகரின் இசையில் பின்னணி இசை ஓகே. பாடல்களில் இன்னும் கவனம் செலுத்தியிருக்க வேண்டும்.

இந்தக் காலத்திற்கேற்ற வித்தியாசமான கதை. அதை இன்னும் சுவாரசியமாக ஆக்ஷனுடன் சொல்லியிருந்தால் பெரிய த்ரில்லர் படமாக அமைந்திருக்கும்.

கீ – இன்னும் கொடுத்திருக்கலாம்.

Continue Reading

Movie Reviews

மெஹந்தி சர்க்கஸ் – விமர்சனம்

Published

on

மெஹந்தி சர்க்கஸ் விமர்சனம்

காதலித்தவர்கள், காதலில் ஊறியவர்களால் மட்டுமே ஒரு சிறந்த காதல் படத்தைக் கொடுக்க முடியும். இந்த ‘மெஹந்தி சர்க்கஸ்’ படத்தை, சினிமா மீது ரசனையான காதல் கொண்ட அறிமுக இயக்குனர் சரவண ராஜேந்திரன் இயக்கியிருக்கிறார்.

இளையராஜா இசையமைத்த படங்களில் கூட அவருடைய பாடல்களை திரும்பத் திரும்ப இந்த அளவிற்குப் பயன்படுத்தியிருக்க மாட்டார்கள். ஆனால், இந்தப் படத்தில் இளையாராஜாவின் பாடல்கள் நமக்கு ஒரு கதாபாத்திரமாகவே உள்ளுக்குள் இறங்கிவிடுகின்றன.

1989ல் வெளிவந்த ‘இதயத்தை திருடாதே’ படத்தில் இடம் பெற்ற ‘ஓ பாப்பா லாலி’ பாடலை 30 வருடங்கள் கழித்து இந்த 2019ல் திரையில் மீண்டும் கேட்டாலும் ஏதோ நேற்று வெளிவந்த ஒரு பாடல் போலவே ஒலிக்கிறது. அந்த அளவிற்கு காட்சிகளுக்குத் தகுந்தபடி இளையராஜாவின் பாடல்களை இந்தப் படத்தில் ஆங்காங்கே பயன்படுத்தியிருப்பது இயக்குனரின் ரசனையை வெளிக்காட்டுகிறது.

சாதி வெறி பிடித்த மாரிமுத்துவின் மகன் ரங்கராஜ், கொடைக்கானலில் ராஜகீதம் என்ற பெயரில் சினிமா பாடல்களை ரெக்கார்டிங் செய்து தரும் கடையை நடத்துகிறார். அந்த ஊரில் சர்க்கஸ் நடத்த வரும் வட இந்தியப் பெண்ணான ஸ்வேதா திரிபாதியின் அழகு ரங்கராஜை காதலில் வீழ்த்துகிறது. சிலபல சந்திப்புகளுக்குப் பின் காதலர்கள் ஆகிறார்கள் ரங்கராஜ், ஸ்வேதா. இவர்கள் காதல் மாரிமுத்துவுக்குத் தெரியவர, ஓடிப் போன காதலர்களைக் கண்டு பிடித்து மீண்டும் ஊருக்கு அழைத்து வந்து இருவரையும் பிரித்து வைக்கிறார். ஸ்வேதாவின் சர்க்கஸ் கூட்டம் அந்த ஊரை விட்டே கிளம்புகிறது. காதலர்கள் பிரிகிறார்கள். 20 வருடங்களுக்குப் பிறகு ஸ்வேதாவின் மகள், தன் அம்மாவின் காதலன் ரங்கராஜைத் தேடி கொடைக்கானல் வருகிறார். அதன் பின் என்ன நடக்கிறது என்பதுதான் படத்தின் கதை.

காதல் கதை என்றாலே அதில் புதுமுகங்கள் நடித்தாலும், காதலை சொல்ல வேண்டிய விதத்தில் சொன்னால் அவர்களை ரசிகர்கள் ஏற்றுக் கொள்வார்கள். அதை இயக்குனர் சரியான கதாபாத்திரங்களாக வடிவமைத்து, காதலையும் சொல்லியிருப்பதால் ரங்கராஜ், ஸ்வேதா இருவருமே புதுமுகங்கள் என்பதையும் மீறி நம் மனதில் இடம் பிடிக்கிறார்கள். அதிலும், ஸ்வேதாவின் கள்ளம் கபடமற்ற சிரிப்பு அடிக்கடி கண்முன் வந்து போகிறது.

படத்தில் மற்ற கதாபாத்திரங்களில் நடித்துள்ளவர்கள் கூட பொருத்தமான தேர்வு. ரங்கராஜ் அப்பா மாரிமுத்து, ஸ்வேதாவின் அப்பா சன்னி சார்லஸ், கணவர் ஜாதவ், பாதிரியார் வேல ராமமூர்த்தி, நண்பன் ஆர்ஜே விக்னேஷ் அவரவர் கதாபாத்திரங்களில் நிறைவு.

இளையராஜாவின் பாடல்கள் படத்தில் அடிக்கடி ஒலிப்பதால், அவற்றையும் மீறி சிறந்த பாடல்களைக் கொடுக்க வேண்டும் என ஷான் ரோல்டன் உழைத்திருக்கிறார். பின்னணி இசையில் தனி கவனம் செலுத்தியிருக்கிறார். செல்வகுமார் ஒளிப்பதிவில் கொடைக்கானல் அழகு அற்புதம்.

காதல் உணர்வை இன்னும் உள்ளுக்குள் இறக்கும்படியான காட்சிகளை வைத்திருக்கலாமோ என்று மட்டும் படம் முடிந்த பின் நமக்குள் ஒரு கேள்வி எழுகிறது. கதாபாத்திரங்கள், கதைக் களம் ஆகியவற்றில் செலுத்திய கவனத்தை, திரைக்கதையில் இன்னும் செதுக்கியிருக்கலாம் என்பது மட்டுமே சிறு குறையாகத் தெரிகிறது.

ஆனாலும், கைகளுக்கு அழகு மெஹந்தி, காதலுக்கு அழகு இந்த மெஹந்தி சர்க்கஸ்.

Continue Reading
Advertisement

Tamil Movies Database

Trending

error: Content is protected !!