Connect with us

Movie Reviews

சர்வம் தாள மயம் – விமர்சனம்

Published

on

sarvam-thala-mayam-review

இயக்குனர் ராஜீவ் மேனன் ‘கண்டு கொண்டேன் கண்டு கொண்டேன்’ படத்தை இயக்கிய 18 வருடங்களுக்குப் பிறகு மிகப் பெரும் இடைவெளியில் இந்த ‘சர்வம் தாள மயம்’ படத்தை இயக்கியிருக்கிறார்.

இதற்கு முன் நடனம், விளையாட்டு, இசை என பல விதங்களில் பார்த்த கதைதான். ஆனாலும், இயல்பான காட்சிகளால், கதாபாத்திரங்களால் படத்தை ரசிக்க வைக்கிறார் ராஜீவ் மேனன்.

மாட்டுத் தோலை வைத்து மிருதங்கம் செய்யும் ஒடுக்கப்பட்ட சமுதாயத்தைச் சேர்ந்த குமரவேல் மகன் ஜி.வி.பிரகாஷ்குமார். டிரம்ஸ் வாசிப்பவருக்கு ஒரு முறை நெடுமுடி வேணு மிருதங்கம் வாசிக்கும் கச்சேரியைப் பார்க்கும் வாய்ப்பு  கிடைக்கிறது. அன்றிலிருந்து மிருதங்கம் கற்றுக் கொள்ள வேண்டும் என்று ஆசைப்படுகிறார். நெடுமுடி வேணுவை விடாமல் தொந்தரவு செய்து அவரிடம் சிஷ்யனாகவும் சேர்ந்து விடுகிறார். கற்றுக் கொண்டு வரும் நேரத்தில் நண்பன் ஒருவன் செய்த அரசியலால் அவரால் விரட்டப்படுகிறார். இந்தியாவைச் சுற்றி பல இசைக் கருவிகளைக் கற்கும் ஜிவி பிரகாஷை மீண்டும் சிஷ்யனாக சேர்த்துக் கொள்கிறார் வேணு. இந்தக் கால இசை உலகத்திலிருந்து ஓரம் கட்டப்படும் வேணு, தன் சிஷ்யன் மூலம் தான் யார் என்பதை இந்த உலகத்திற்கு மீண்டும் காட்டுகிறார். இதுதான் படத்தின் கதை.

வாழ்க்கை முறையில் பொருத்தமில்லாத ஒரு குருவுக்கும், சிஷ்யனுக்குமான இசை உறவை மிகவும் ரசனையாகக் காட்டியிருக்கிறார் ராஜீவ் மேனன். அதே சமயம் இடைவேளைக்குப் பின் அவ்வளவு திறமைசாலியான இசை மேதை நெடுமுடி வேணுவையும் டிவி நிகழ்ச்சிக்காக அழைத்து வருவது நியாயமா ?. ஒரு கிளாசிக்கல் படமாகப் போய்க் கொண்டிருப்பது டிவி நிகழ்ச்சி என வந்ததும் ஒரு சாதாரண படம் போல இறங்கியது போலாகிவிட்டது.

ஜி.வி. பிரகாஷ் இதுவரை நடித்துள்ள படங்களைக் காட்டிலும் இந்தப் படத்தில் அவருடைய கதாபாத்திரத்திற்கு பொருத்தமான நடிப்பை வெளிப்படுத்தியிருக்கிறார். பேச்சில் சென்னைத் தமிழும், செயலில் துடிப்பும், மிருதங்கம் கற்பதில் ஆர்வமும் என அந்த பீட்டர் கதாபாத்திரமாகவே மாறியிருக்கிறார். இந்தப் படம் அவரை அடுத்த கட்டத்திற்கு அழைத்துச் செல்லும்.

படத்தின் முக்கியமான கதாபாத்திரமான மிருதங்க வித்வான் வேம்பு ஐயர் கதாபாத்திரத்தில் மலையாள நடிகர் நெடுமுடி வேணு. தன் திறமை மீது அசாத்திய நம்பிக்கை வைத்திருக்கும் ஒரு மேதை இப்படித்தான் இருப்பார் என்பதை அப்படியே கண்முன் கொண்டு வந்து நிறுத்துகிறார். அவருடைய பேச்சு, உடல் மொழி, பார்வை அனைத்துமே ஒரு கம்பீரத்துடன் இருக்கிறது.

ஜி.வி.பிரகாஷ் காதலியாக அபர்ணா பாலமுரளி. கதைக்கேற்ற, கதாபாத்திரத்திற்கேற்ற நடிகையைத் தேர்ந்தெடுத்திருக்கிறார் இயக்குனர். எந்த ஒரு காட்சியிலும் மிகையில்லாத நடிப்பு.

நெடுமுடி வேணுவின் மதிப்பை குறைக்கச் செய்யத் துடிப்பவர்களாக அண்ணன், தங்கை வினித், திவ்யதர்ஷினி. வினித்திற்காவது வேணுவை பழி வாங்க ஒரு முன்கதை உண்டு. ஆனால், திவ்யதர்ஷினிக்கு அவர் மீது ஏன் அவ்வளவு வெறுப்பு என்பதற்குக் காரணமில்லை. டிவி இசை நிகழ்ச்சிகள் இப்படித்தான் நடக்கின்றன என அவரை வைத்தே வெளிச்சம் போட்டுக் காட்டுகிறார்கள். டிவி நிகழ்ச்சி நடுவரான வினித்தின் சிஷ்யர் எப்படி அதே போட்டியில் கலந்து கொள்வார் எனத் தெரியவில்லை. எந்த டிவி நிறுவனமும் அதற்கு சம்மதிக்க மாட்டார்கள்.

அப்பாவி அப்பாவாக குமரவேல், அவ்வளவு யதார்த்தமான நடிப்பு. நெடுமுடி வேணு மனைவியாக சாந்தா தனஞ்செயன். சிறு கதாபாத்திரங்களில் நடித்துள்ளவர்கள் கூட நடிக்கிறோம் என்பது இல்லாமல் நடிக்கிறார்கள்.

ஏஆர் ரகுமான் இசையில் கதையுடன் இணைந்த பாடல்கள்.  ‘வரலாமா உன்னருகில்…’ அதிகம் ரசிக்க வைக்கிறது.

இசை என்பது அனைவருக்கும் பொதுவானது. சாதி, மதத்தை முறி ஆர்வமுள்ள யாரும் கற்றுக் கொண்டு திறமைசாலியாகலாம் என்ற கருத்திற்காக ‘சர்வம் தாள மயம்’ ரசிப்பு மயம்.

Movie Reviews

தேவ் – விமர்சனம்

Published

on

dev-movie-review

ஒரு ஆக்ஷன் படம்னா ஆக்ஷன் இருக்கணும், சென்டிமென்ட் படம்னா சென்டிமென்ட் இருக்கணும், காதல் படம்னா காதல் இருக்கணும். இந்த ‘தேவ்’ படமும் ஒரு காதல் படம்தான். படம் முழுக்க நாயகனும், நாயகியும் காதலிச்சிட்டே இருக்கிற படம்.

காதல் படம்னாலே வில்லன்கள் கண்டிப்பா இருப்பாங்க. ஆனா, இந்தக் காதல் படத்துல வில்லனே கிடையாது. காதலுக்கு காதலிக்கிற நாயகிதான் கொஞ்சமே கொஞ்சமான வில்லி. அதுவும் அவங்க குணத்தால, சுயநலத்தால வர வில்லத்தனம்.

அழ வேண்டாம், அதிகமா சிரிக்க வேண்டாம், அப்படியே ஒரு டிராவல் பண்ற மாதிரி ஜாலியா ஒரு படம் பார்க்கணும்னு நினைக்கிறவங்களுக்கு இந்தப் படம் பிடிக்கும்.

ஊரைச் சுத்தறது, அதையும் பிடிச்ச மாதிரி ஜாலியா, சாகசம் பண்ணிக்கிட்டே சுத்தறது நாயகன் கார்த்திக்கு ரொம்பவே பிடிக்கும். கூடவே, தன் பிரண்ட்ஸ் விக்னேஷ், அம்ருதா அவங்களோடதான் சுத்துவாரு. சின்ன வயசுல இருந்தே அடிக்கடி ரொம்ப தொந்தரவு பண்றானே, அவனை எதுலயாவது சிக்க வைக்கணும்னு நினைக்கிற பிரண்ட் விக்னேஷ், காதல்ல சிக்க வச்சிடறாரு. பேஸ்புக் மூலமா யார் பத்துக்குள்ள முதல்ல வராங்களோ அவங்கதான் காதலின்னு பிரண்ட்ஸ் சொல்றாங்க. அப்படி வந்து நிக்கிறவங்கதான் ரகுல் ப்ரீத் சிங். அமெரிக்காவுல வசிக்கிற தமிழ்நாட்டைச் சேர்ந்த இளம் பிசினஸ் உமன். ரகுலைக் காதலிக்க வைக்க கார்த்தி என்ன பண்றாரு, அவங்க காதல் சேர்ந்துதா இல்லையாங்கறதுதான் இந்த ‘தேவ்’.

‘பையா’ படத்துக்கு அப்புறமா ஒரு ஜாலியான கேரக்டர்ல கார்த்தி. சிட்டியோ, வில்லேஜோ, பணக்காரனோ, ஏழையோ, மிடில் கிளாஸோ எல்லா கேரக்டர்லயும் தன்னை அழகா செட் பண்ணிக்கிறாரு கார்த்தி. இந்தப் படத்துல 20 காஸ்ட்லி பைக் சொந்தமா வச்சிருக்கிற ஒரு பணக்கார வீட்டுப் பையன். பைக்லயே மும்பை வரைக்கும் போய் காதலியைப் பார்த்து காதலை சொல்ற கேரக்டர். படிக்கிறதுக்கும் நல்லா இருக்கு, கார்த்தி பண்றதும் நல்லா இருக்கு. ஆனால், கார்த்தியோட நடிப்புக்கு இயக்குனர் ரஜத் இன்னும் தீனி போட்டிருக்கலாம்.

ரகுல் ப்ரீத் சிங், பார்த்ததுமே ஒரு திமிரான பொண்ணுன்னு சொல்ற மாதிரிதான் இருக்காங்க. அவங்க கண்கள்தான் கார்த்தியை காதல்ல விழ வைக்குதுன்னு சீன் வச்சிருக்காங்க. காதலி என்பதையும் மீறி படம் முழுவதும் அவரை பிசினஸ் உமனாக மட்டுமே பார்க்க முடிகிறது. அந்தக் கேரக்டரில் அப்படியே மூழ்கி விட்டார் போலிருக்கிறது. காதலியாக காதலிலும் கொஞ்சம் மூழ்கியிருக்கலாம்.

தமிழ் சினிமாவில், நாயகனுக்கு பிரண்டாக ஒரு பெண்ணை நடிக்க வைத்து மச்சி, மச்சான் என அழைக்க வைத்த முதல் படமாக இதுதான் இருக்கும். அவ்வளவு நெருக்கமான தோழியாக அம்ருதா, அப்படியே கதாபாத்திரமாகவே மாறியிருக்கிறார். இப்படிப்பட்ட பிரண்ட் தான் பல இளைஞர்களின் கனவாகவும் இருக்கிறது. விக்னேஷ் போன்ற நண்பர்களும் பலருடைய வாழ்வில் உண்டு. ஆனால், படத்தில் விக்னேஷ் சிரிக்க வைப்பார் என்று பார்த்தால் கொஞ்சம் ஏமாற்றமே.

கார்த்தியின் அப்பாவாக பிரகாஷ் ராஜ், ரகுலின் அம்மாவாக ரம்யா கிருஷ்ணன். இந்தக் காலத்து அப்பா, அம்மா. தங்கள் பிள்ளைகளின் விருப்பமே தங்கள் விருப்பம் என நினைப்பவர்கள்.

ஹாரிஸ் ஜெயராஜ் இசையில் ‘அனங்கே…’ பாடலின் வரிகளும், குரல்களும் இனிமை. இந்தப் பாடலும், மற்ற பாடல்களும் கேட்ட உடனேயே ஹாரிஸ் இசை என்று எளிதில் சொல்லிவிடலாம். காதலைக் குழைத்து இன்னும் சில பாடல்களை அமைத்திருக்கலாம்.

வேல்ராஜின் ஒளிப்பதிவுக்கு நிறைய காட்சிகளை உருவாக்கிக் கொடுத்திருக்கிறார் இயக்குனர். சூரியன் உதிப்பதும், எவரெஸ்ட் உயரமும், வெளிநாட்டு சாலைகளும் படத்திற்கு வேறு ஒரு கலரைக் கொடுக்கின்றன.

பிரிந்தால்தான் காதலும் சேரும் என்பதுதான் இன்றைய 2019 தேவ் காதல்.

Continue Reading

Movie Reviews

கோகோ மாக்கோ – விமர்சனம்

Published

on

goka-mako-review

டிஜிட்டல் வளர்ச்சி வந்த பிறகு திரைப்படத்திற்கென இருந்த இலக்கணம் இல்லாமல் போய்விட்டது. பல புதியவர்கள் அவர்கள் எழுதும் சாதாரண கதையைக் கூட திரைப்படங்களாக வெளியிடுகிறார்கள்.

அவற்றில் சில வித்தியாசமாக அமைகின்றன. சில படங்கள் இன்னும் கூடுதலாக விஷயங்களைச் சேர்த்திருக்கலாம் என எண்ண வைக்கின்றன.

இந்த ‘கோகோ மாக்கோ’ என்றால் என்ன அர்த்தம் என்று கூட தெரியவில்லை. ‘கோக்கு மாக்காக’ செய்வதைத்தான் படத்தின் தலைப்பாக வைத்திருப்பார்கள் போலிருக்கிறது.

தலைப்பில் வைத்த நகைச்சுவை உணர்வை படம் முழுவதும் வைத்திருந்தால் ஒரு நகைச்சுவைப் படத்தை ரசித்த திருப்தியாவது இருந்திருக்கும்.

இசையில் சாதிக்க வேண்டும் என்று நினைக்கும் ஒரு இளம் இசையமைப்பாளரின் ஆல்பத்தை ஒரு இசை நிறுவனம் வெளியிட சம்மதிக்கிறது. அதற்காக மியூசிக் வீடியோ ஒன்றைத் தயார் செய்ய முடிவு செய்கிறார். சாலைப் பயணம் மேற்கொள்ளும் ஒரு காதல் ஜோடியின் பயணத்தை அவர்களுக்கே தெரியாமல் கேமரா வைத்து எடுத்து அதை வீடியோ ஆல்பமாக உருவாக்குகிறார்கள். அந்த ஆல்பம் வெளியானதா, காதல் ஜோடியின் சாலைப் பயணம் என்ன ஆனது என்பதுதான் படத்தின் கதை.

படம் முழுவதையும் ‘கோ-ப்ரோ’ கேமராவில் எடுத்திருக்கிறார்கள். இளம் காதல் ஜோடியாக நடித்திருப்பவர்கள் நிஜக் காதல் ஜோடி போலவே யதார்த்தமாய நடித்திருக்கிறார்கள். அவர்களைப் பின் தொடர்ந்து படம் எடுக்கும் சாம்ஸ் மற்றும் அவரது உதவியாளர் காமெடி என்ற பெயரில் நம் பொறுமையை சோதிக்கிறார்கள்.

இசையமைப்பாளர், படத் தொகுப்பாளர் என நண்பர்களாக நடிப்பவர்கள் கூட ஓரளவிற்கு சிரிக்க வைக்கிறார்கள். ஆனால், அவர்களது நடிப்பு நாடகத்தனமாக உள்ளது.

சீனியர் நடிகர்களான ஒய்ஜி மகேந்திரா, சந்தான பாரதி, டெல்லி கணேஷ், அஜய் ரத்தினம் ஆகியோர்தான் படத்தில் தெரிந்த முகங்கள்.

ஒன்றரை மணி நேரத்தில் படத்தை முடித்துவிட்டார்கள். டெக்னிக்கலாக புதிய முயற்சி என்பதால் பாராட்டலாம். கூடவே கதை, திரைக்கதை ஆகியவற்றை திரைப்படத்திற்காக யோசிக்காமல் ஒரு குறும்பட அளவில் யோசித்திருக்கிறார்கள். அடுத்த படத்தில் சரி செய்து கொள்வது நல்லது.

Continue Reading

Movie Reviews

தில்லுக்கு துட்டு 2 – விமர்சனம்

Published

on

dhillukku-dhudu-2-review

தமிழ் சினிமாவில் நகைச்சுவைப் படங்களும், நகைச்சுவைக் காட்சிகளும் நிறையக் குறைந்துவிட்டது என்று வருத்தப்படும் ரசிகர்களுக்காகவே எடுக்கப்பட்டுள்ள படம்தான் ‘தில்லுக்கு துட்டு 2’.

இப்படி சிரித்து எவ்வளவு நாளாயிற்று என்று படத்தைப் பார்த்துவிட்டு வெளியில் வரும் ரசிகர்கள் கண்டிப்பாகச் சொல்வார்கள். ஒரு இடைவெளிக்குப் பிறகு மீண்டும் பழைய சந்தானத்தைப் பார்ப்பது எவ்வளவு ஆறுதல்.

சந்தானத்தின் காமெடி சரவெடி ஒவ்வொரு காட்சியிலும் இருக்கிறது. படத்தின் ஆரம்பத்திலிருந்து கடைசி வசனம் வரை சந்தானத்தின் காமெடி சரக்கு நமக்கு நிச்சயம் போதையை ஏற்படுத்தும். படத்தில் அடிக்கடி சந்தானம் சரக்கடித்துக் கொண்டிருந்தாலும் காமெடி சரக்கில் அவர் எந்தக் குறையும் வைக்கவில்லை. குடிக்கும் காட்சிகளை படங்களில் குறைத்துக் கொள்வது அனைவருக்கும் நல்லது.

இயக்குனர் ராம்பாலா ‘தில்லுக்கு துட்டு’ படத்தை விட இந்த இரண்டாம் பாகத்தில் கூடுதலாக நகைச்சுவைக் காட்சிகளை வைத்திருக்கிறார். சில படங்களைப் பார்க்கும் போது எப்போது முடியும் என்று இருக்கும். ஆனால், இந்தப் படம் முடியும் போது, அடடா..அதற்குள் முடித்துவிட்டார்களே, இன்னும் கொஞ்ச நேரம் சிரிக்க வைத்திருக்கலாமே என்று எண்ணத் தோன்றுகிறது. அது இயக்குனருக்குக் கிடைத்த வெற்றி.

தான் நாயகனாக நடிப்பதற்குரிய இப்படிப்பட்டக் கதைகளைத் தேடிப் பிடித்து நடிப்பதுதான் சந்தானத்திற்கு சிறப்பு. மற்ற படங்களை ஒதுக்கி வைத்துவிட்டு, இந்தப் படத்தை ஆரம்பித்து சீக்கிரமே முடித்து வெளியிட்டு இந்தப் புது வருடத்தில் புது வெற்றியுடன் ஆரம்பித்துவிட்டார். வருடத்திற்கு இப்படி மூன்று படங்களிலாவது நடித்து மக்களை மகிழ்ச்சியடைய வையுங்கள் சந்தானம், புண்ணியமாப் போகும்.

நாயகியாக ஷ்ரிதா சிவதாஸ். கேரள தேசத்துப் பெண்கள் என்றாலே தமிழக இளைஞர்களுக்கு ஒரு கிறக்கம் வந்துவிடும். அந்த அளவிற்கு இந்தப் படத்திலும் சிரித்த முகத்துடன், குடும்பக் குத்து விளக்காக நம்மைக் கவர்கிறார் ஷ்ரிதா.

ஷ்ரிதா சந்தானத்தின் காதல் ஜோடி என்றால், நான் கடவுள் ராஜேந்திரன் காமெடி ஜோடியாக கலக்குகிறார். இரண்டு பேரும் படம் முழுவதும் இணை பிரியாமல் இருக்கிறார்கள். கவுண்டமணி, செந்தில் ஜோடி போல இந்த சந்தானம், ராஜேந்திரன் காமெடி ஜோடி கலக்குகிறது.

ஊர்வசி, பிபின், சிவசங்கர், டி.எம். கார்த்திக், பிரசாந்த் ராஜ் ஆகியோர் மற்ற கதாபாத்திரங்களில் சிறப்பாக நடித்து கூடுதல் சிரிப்பை வரவழைக்கிறார்கள்.

ஷபிர் இசையில் ‘மவனே யாரு கிட்ட’ லோக்கல் பாடலாகவும், ’காத்தாடி போல’ பாடல் மெலடியாகவும் ஒலிக்கிறது.

பேய்ப் படம் என்பதால் எந்த லாஜிக்கையும் பார்க்கத் தேவையில்லை. காமெடிப் படமாக இருந்தாலும் ஏமாற்றும் சாமியார்களை வெளிச்சம் போட்டுக் காட்டுகிறது படம்.

இரண்டு மணி நேரம் சிரித்து ரசிக்க வேண்டும் என்றால் துட்டு செலவாகிறது என்று பார்க்காமல் ‘தில்லுக்கு துட்டு 2’ போகலாம். தியேட்டரில் சிரித்து விட்டு வந்தால் உடலுக்கும், மனதுக்கும் நல்லது.

Continue Reading
Advertisement

Tamil Movies Database

No feed items found.

Trending