Connect with us

Trending

ஸ்பைடர் விமர்சனம்

Published

on

spyder-review

ஏ.ஆர். முருகதாஸ் இயக்கத்தில் தெலுங்கின் முன்னணி இளம் கதாநாயகனான மகேஷ் பாபு தமிழில் அறிமுகமாகிறார் என்ற அறிவிப்பு வந்ததுமே ‘ஸ்பைடர்’ படம் மீதான அறிவிப்பு ஆரம்பமானது. அது நாளுக்கு நாள் அதிகரித்து பட வெளியீட்டு வரை இருந்தது.

தமிழ், தெலுங்கில் எடுக்கப்பட்ட இந்தப் படம் இரு மொழி ரசிகர்களையும் எதிர்பார்ப்புக்கு ஏற்றபடி முழுமையாக திருப்திப்படுத்தவில்லை என்றே சொல்ல வேண்டும்.

ஏ.ஆர். முருகதாஸ் இயக்கிய வெற்றிப் படங்களில் ரமணா, கஜினி, துப்பாக்கி ஆகிய படங்களுடன் இந்தப் படத்தை சேர்க்க முடியாது. ‘கத்தி’ படத்திற்கு அடுத்த இடத்தை வேண்டுமானால் கொடுக்கலாம்.

புலனாய்வுத் துறையில் மக்களின் தொலைபேசி உரையாடல்களை ஒட்டு கேட்கும் குழுவில் திறமைசாலியாக இருக்கிறார் மகேஷ் பாபு. அவர் கண்டுபிடித்த சாப்ட்வேர் மூலம் உதவி என்று கேட்பவர்கள் கண்டறியப்பட்டு அவரால் உதவியைப் பெறுகிறார்கள். ஒரு முறை அப்படி ஒட்டு கேட்கும் போது ஒரு பெண்ணின் உதவிக்காக, அவருடைய தோழி பெண் கான்ஸ்டபிள் ஒருவரை அனுப்புகிறார். ஆனால், அவர்கள் இருவருமே கொல்லப்படுகிறார்கள். அதோடு அவர்கள் உடல்களையும் துண்டு துண்டாக வெட்டி போட்டிருக்கிறார்கள். அந்தக் கொலைகளுக்குக் காரணமாக இருப்பவர்கள் யார் என்பதை தேடும் வேலையில் இறங்குகிறார். அந்த கொலைகாரனை மகேஷ் பாபு எப்படி கண்டுபிடிக்கிறார் என்பதுதான் படத்தின் விறுவிறுப்பான மீதிக் கதை.

மகேஷ் பாபுவின் ஸ்டைலுக்கேற்ப படத்தினை அவ்வளவு ஸ்டைலிஷாக கொடுத்திருக்கிறார் இயக்குனர் முருகதாஸ். அலட்டல் இல்லாத அதே சமயம் அழுத்தமான மகேஷ் பாபுவின் நடிப்பு தமிழ் ரசிகர்களுக்குத் தாராளமாகவே பிடித்திருக்கிறது. ஆனால், மகேஷ் பாபுவின் அதிரடி ஆக்ஷன் காட்சிகளை அதிகம் எதிர்பார்க்கும் தெலுங்கு ரசிகர்களுக்கு அது அதிகம் பிடிக்க வாய்ப்பில்லை. படத்தில் மகேஷ் பாபுவின் கை அதிகம் பேசுவதை விட அவருடைய மூளைதான் அதிகம் பேசுகிறது. வில்லனை பிடிக்க அவர் தீட்டும் திட்டங்கள் கொஞ்சம் சினிமாத்தனமாக இருந்தாலும் சுவாரசியமாக இருக்கிறது.

ஒரு நாயகனுக்கு சரியான வில்லன் அமைந்தால்தான் நாயகனின் ஹீரோயிசமும் அதிகம் வெளிப்படும். அந்த விதத்தில் மகேஷ் பாபுக்கு சரியான வில்லனாக அமைந்திருக்கிறார் எஸ்.ஜே. சூர்யா. அவருடைய பார்வையும், விஷமப் புன்னகையும் அவருடைய ‘சுடலை’ கதாபாத்திரத்தில் சூப்பர் என்று சொல்ல வைக்கிறது.

தமிழ் சினிமாவில் வழக்கமாக வரும் லூசுத்தனமான கதாபாத்திரம் கொண்ட நாயகியாக ரகுல் ப்ரீத் சிங். டாக்டருக்குப் படிக்கிறவர் என்றாலும் ‘அந்த’ விஷயத்துக்காக ஆசைப்படுகிறார் என்பதெல்லாம் கொஞ்சம் ஓவர்தான். ஆனாலும், நல்ல கதாபாத்திரம் வரும் காலத்தில் கிடைத்தால் தமிழில் முன்னணிக்கு வருவார் என்று மட்டும் தெரிகிறது.

பரத் கொஞ்ச நேரமே வந்தாலும் நினைவில் நிற்கிறார். மகேஷ் பாபுவின் நண்பனாக ஆர்.ஜே. பாலாஜி, ஒரு முறை கூட சிரிக்க வைக்கவில்லை.

பிளாஷ் பேக்கில் எஸ்.ஜே. சூர்யாவின் சிறு வயது பையனாக நடித்திருக்கும் அந்த சிறுவன்…அப்ப்ப்ப்……..பா…அவனது சிரிப்பில்தான் என்ன ஒரு குரூரம்.

சூர்யாவைத் தேடி அப்படி அலையும் மகேஷ் பாபு அவர் உயிருக்குப் போராடும் போது கூட சூர்யாவைக் குறி பார்த்து சுடுகிறார். அப்புறம் மாட்டிக் கொண்ட சூர்யா அவ்வளவு பாதுகாப்பிலிருந்து தப்பிக்கிறார். அதன் பின் நீளும் கதை தேவையில்லை என்றாலும் அந்த இடியும் கட்டிடத்தில் நடக்கும் சண்டைக் காட்சிகள் தியேட்டரில் கைதட்டலை அள்ளுகின்றன.

ஹாரிஸ் ஜெயராஜ் இசையமைப்பில் வழக்கமான மெட்டுக்களில் பாடல்கள். படத்தின் விறுவிறுப்பைக் கூட்டாத பின்னணி இசை. பல காட்சிகளில் என்னமோ ஏதோ என்று வாசித்திருக்கிறார் என்ற உணர்வு.

கொஞ்சம் சினிமாத்தனமான காட்சிகளை தவிர்த்துப் பார்த்தால் ‘ஸ்பைடர்’ படத்தை தாராளமாக ரசிக்கலாம்.

Trending

யு டியூப் பாடல் வரிகள் வீடியோவில் ‘சொடக்கு’ நம்பர் 1

Published

on

tsk-sodakku

யு டியூப் வந்த பிறகு, அதில் பலரும் அவர்களது படங்களின் வீடியோக்களைச் சேர்த்து அவரவர் படங்களை விளம்பரப்படுத்திக் கொண்டிருக்கிறார்கள்.

யார் டீசர், டிரைலர், பாடல்கள் அதிகப் பார்வைகளைப் பெறும் என்பதிலும் போட்டி நிலவி வருகிறது.

டீசர், டிரைலரில் இருந்த அந்த போட்டி இப்போது பாடல்களுக்கும் தொற்றிக் கொண்டது. ஒரு படம் வெளிவருவதற்கு முன்பாக அந்தப் படத்தின் பாடல்களை லிரிக் வீடியோவாக, அதாவது பாடல் வரிகள் என்னவென்று தெரிந்து கொள்ளும் விதத்தில் புகைப்படங்கள் அடங்கிய வீடியோ வெளியிடுவது சமீபத்திய டிரென்ட்.

அதில் இதுவரை ‘மெர்சல்’ படத்தில் இடம் பெற்ற ‘ஆளப் போறான் தமிழன்’… பாடலின் லிரிக் வீடியோதான் அதிகப் பார்வைகளைப் பெற்று முதலிடத்தில் இருந்தது. அந்த சாதனையை தற்போது ‘தானா சேர்ந்த கூட்டம்’ படத்தில் இடம் பெற்ற ‘சொடக்கு மேல…’ பாடல் முறியடித்துள்ளது.

‘சொடக்கு…’ பாடல் இதுவரை 4,15,62,752 பார்வைகளையும், ‘ஆளப் போறான்…’ பாடல் இதுவரை 4,15,32,688 பார்வைகளையும் பெற்றுள்ளது. இருந்தாலும் லைக் விஷயத்தில் ஆளப் போறான் பாடலை சொடக்கு பாடலால் மிஞ்ச முடியவில்லை.

சொடக்கு லிரிக் வீடியோ

ஆளப் போறான் தமிழன் லிரிக் வீடியோ

Continue Reading

Trending

ஸ்டெர்லைட் போராட்டம், சுத்தமில்லாத நீரைக் குடித்த சரத்குமார்

Published

on

sarathkumar-sterlite

தூத்துக்குடியில் அமைந்துள்ள ஸ்டெர்லைட் ஆலைக்கு எதிரான போராட்டம் இன்று 48வது நாளை எட்டியுள்ளது. இந்த போராட்டத்திற்கு ஆதரவாக பலரும் களத்தில் குதித்து மக்களுக்கு ஆதரவு தெரிவித்து வருகின்றனர்.

சமத்துவ மக்கள் கட்சியின் தலைவரும், நடிகருமான சரத்குமார் இன்று நடைபெற்ற போராட்டத்தில் கலந்து கொண்டு மக்களுக்கு அவருடைய ஆதரவைத் தெரிவித்தார்.

மேலும் போராட்டக்களத்தில் குமரெட்டியாபுரம் மக்கள் பயன்படுத்தும் மாசு கலந்த நீரை அருந்தி அவருடைய ஆதங்கத்தை வெளிப்படுத்தினார்.

பல ஆண்டுகளாக நடைபெற்று வரும் ஸ்டெர்லைட் ஆலைக்கெதிரான போராட்டத்தில் குழந்தைகள், சிறுவர்கள், சிறுமியர்கள், பெண்கள் என மக்கள் குடும்பம், குடும்பமாய் ஈடுபட்டு வருகிறார்கள்.

அந்தப் பகுதியில் நிலம், நீர், காற்று ஆகியவை மாசுபட்டு வருவதாக மக்கள் போராடி வருவது குறிப்பிடத்தக்கது.

Continue Reading

Trending

இங்கிலாந்து நாட்டில் விருது வென்ற ‘மெர்சல்’

Published

on

mersal-records-and-awards

இங்கிலாந்து நாட்டில் நடைபெறும் தேசிய திரைப்பட அகாடமி வழங்கும் 2018ம் ஆண்டு விருதுக்கான போட்டியில் சிறந்த அயல்நாட்டுப் படத்துக்கான விருதை ‘மெர்சல்’ படம் வென்றுள்ளது.

சிறந்த வெளிநாட்டுப் படங்களுக்கான போட்டியில் ‘மெர்சல்’ படத்துடன் பிரான்ஸ், ரஷ்யா, ஜெர்மனி, ஸ்வீடன், சிலி, தென்னாப்பிரிக்கா, லெபனான ஆகிய நாடுகளின் படங்களும் போட்டியில் இருந்தன. அவற்றிலிருந்து ‘மெர்சல்’ படம் தேர்வாகியுள்ளது.

சிறந்த துணை நடிகர் விருதுக்காக விஜய்யும் போட்டியில் இருந்தார். ஆனால், அவர் விருதுக்கு தேர்வாகவில்லை.

போட்டியாளர்களில் சிறந்தவர்களைத் தேர்ந்தெடுப்பதற்கான ஆன்லைன் வாக்குப்பதிவு ஜனவரி 15 முதல் ஆரம்பமாகி 20ம் தேதி வரை நடைபெற்றது.

இந்த வருட ஆல்லைன் வாக்குப்பதிவில் 24 லட்சம் பேர் வாக்களித்துள்ளார்கள். மொத்தம் 18 பிரிவுகளுக்கான தேர்வு நடைபெற்றது.

4வது தேதிய திரைப்பட விருதுகளைப் பெற்றவர்களின் விவரம் நேற்றிரவு அறிவிக்கப்பட்டுள்ளது.

இங்கிலாந்து தேசிய திரைப்பட அகாடமி 1999ம் ஆண்டு அமைக்கப்பட்டது. திரையுலகத்தினருக்கான வளர்ச்சியில் அந்த அமைப்பு ஈடுபடுகிறது. பல திரைப்பட விழாக்கள், காட்சிகள், மாநாடுகள், பயிற்சி வகுப்புகள் ஆகியவற்றை இந்த அமைப்பு இங்கிலாந்து, பிரான்ஸ், ஜெர்மனி, அமெரிக்கா ஆகிய நாடுகளில் நடத்தி வருகிறது.

‘மெர்சல்’ படம் விருது பெற்றது தமிழ்த் திரையுலகத்திற்கும் பெருமையான ஒன்று.

தேனாண்டாள் ஸ்டுடியோஸ் தயாரிப்பில், அட்லீ இயக்கத்தில், ஏ.ஆர்.ரகுமான் இசையமைப்பில் விஜய், சமந்தா, காஜல் அகர்வால், நித்யா மேனன் மற்றும் பலர் நடித்த ‘மெர்சல்’ 2017 தீபாவளியை முன்னிட்டு வெளியானது.

Continue Reading
Advertisement

Tamil Movies Database

Trending

error: Content is protected !!