Connect with us

Movie Reviews

வடசென்னை – விமர்சனம்

Published

on

vadachennai-review

தமிழ் சினிமாவில் வாழ்வியல் படங்கள் என்றாலே மதுரை, கோவை, நெல்லை ஆகிய வட்டாரப் படங்கள்தான் அதிகம் வரும். சென்னை என்று சொன்னாலே அது வடசென்னை பற்றிய படமாகத்தான் இருக்கும். தற்போதைய மத்திய சென்னை, தென் சென்னை ஆகியவை வடசென்னைக்குப் பிறகு உருவானவைதான்.

வடசென்னையை மையமாக வைத்து பல படங்கள் வந்துள்ளன. அவை கொலை, ரத்தம் என்று வன்முறை அதிகம் சார்ந்த திரைப்படங்களாக மட்டுமே இருந்தன. மக்களின் வாழ்வியலைச் சொல்லும் படங்கள், அவர்களின் பிரச்சினைகளைப் பற்றிப் பேசும் படங்கள் வந்தது குறைவுதான்.

இந்த ‘வடசென்னை’ படத்தை ஒரு வாழ்வியல் சார்ந்த படமாக, மக்களின் பிரச்சினைகளைப் பற்றிப் பேசும் படமாக இயக்குனர் வெற்றிமாறன் கொடுத்திருக்கிறார். ஆரம்பம் முதல் கடைசி வரை நாமும் வடசென்னைக்குள் நுழைந்துவிட்ட ஒரு உணர்வு ஏற்படுகிறது.

முதல் பாதியில் சிறைச்சாலையும், அவர்கள் வசிக்கும் பகுதியும் எது செட், எது நிஜம் என்று தெரியாத அளவிற்கு ஒளிப்பதிவாளர் வேல்ராஜ், கலை இயக்குனர் ஜாக்கி ஆகியோர் நம்மை அந்தப் பகுதிவாசியாகவே மாற்றிவிடுகிறார்கள்.

ஒரு வழக்கில் சிறைக்கு வருகிறார் தனுஷ். அவரை சிறைக்குள்ளிருக்கும் பவன் ஆட்கள் மிரட்டிக் கொண்டேயிருக்கிறார்கள். இதனால், பவனின் எதிர்கோஷ்டியான செந்தில் தயவு தனக்குக் கிடைத்தால் நல்லது என நினைக்கிறார் தனுஷ். கேரம் பிளேயரான தனுஷ், அதை வைத்தே கிஷோரை நெருங்கி நட்பு கொள்கிறார். சிறைக்குள் ஒரு நாள் நடக்கும் கேரம் போட்டியில் கிஷோரையே கொலை செய்ய முயற்சிக்கிறார். தனுஷால் குத்து வாங்கும் கிஷோர் நரம்பு பாதிக்கப்பட்டு பேசவும் முடியாமல் நடக்கவும் முடியாமல் பாதிக்கப்படுகிறார். தனுஷ் ஏன் கிஷோரைக் கொலை செய்ய முயற்சித்தார். அவர்களுக்குள் என்ன பகை என்பதுதான் படத்தின் மீதிக் கதை.

கதையாகச் சொல்ல வேண்டும் என்றால் எப்படி வேண்டுமானாலும் யாரை வைத்து வேண்டுமானாலும் சொல்லலாம். அந்த அளவிற்கு படத்தில் உள்ள முக்கியக் கதாபாத்திரங்களுக்குள் கதையும், சம்பவங்களும் பின்னிப் பிணைந்திருக்கிறது.

கிஷோர், சமுத்திரக்கனி, பவன் அனைவருமே கடத்தல் தொழில் செய்யும் அமீரிடம் வேலை பார்த்தவர்கள். ஒரு சந்தர்ப்பத்தில் அமீரால் அவமானப்படுத்தப்பட அவரைக் கொலை செய்து மூவருமே பெரிய ஆளாகிறார்கள். அந்தக் கொலையாலேயே கிஷோரும், சமுத்திரக்கனியும் பிரிகிறார்கள். பவன், சமுத்திரக்கனியின் நண்பர். இவர்களுக்கும் தனுஷுக்கும் என்ன சம்பந்தம் என்பதும் படத்தின் சஸ்பென்ஸ்.

அன்பு என்ற கதாபாத்திரத்தில் தனுஷ். தான் ஏற்று நடிக்கும் கதாபாத்திரத்திற்கேற்ப தன்னை மாற்றிக் கொள்வதில் தனுஷ் எப்போதுமே தனிச் சிறப்புடன் இருப்பார். அது இந்தப் படத்தில் அதிகமாக இருக்கிறது. அப்படி என்றால் அவர் இந்தப் படத்தையும், அன்பு கதாபாத்திரத்தையும் எந்த அளவிற்கு நேசித்திருப்பார் என்று தெரிந்து கொள்ளலாம். இந்த முதல் பாகம் முழுவதும் அன்புவின் வளர்ச்சிதான் சொல்லப்பட்டிருக்கிறது, அன்புவின் எழுச்சியைப் பார்ப்பதற்கு இரண்டாம் பாகத்திற்காகக் காத்திருக்க வேண்டும். தாமதிக்காமல் சீக்கிரமே கொடுத்துவிடுங்கள்.

தமிழ் சினிமாவில் தனக்கென ஒரு தனி இடத்தை ஐஸ்வர்யா ராஜேஷ் உருவாக்கிவிட்டார் என்றுதான் சொல்ல வேண்டும். பத்மா கதாபாத்திரத்தில் பத்து மடங்கு உயர்ந்து தெரிகிறார். வாயைத் திறந்தால் அசிங்கமான கெட்ட வார்த்தைதான் வருகிறது. அதிலும் படத்தின் துவக்கத்தில் அவர் சொல்லும் அந்த கெட்ட வார்த்தை சென்சாருக்கு எப்படி தப்பித்ததோ தெரியவில்லை. பாவாடை சட்டை, பாவாடை தாவணி, புடவை என ஐஸ்வர்யாவிற்கும் படத்தில் வளர்ச்சி உண்டு.

ஆன்ட்ரியாவை தமிழ் சினிமா அவ்வப்போது இப்படி பயன்படுத்திக் கொள்கிறதே என மகிழ்ச்சிதான். மேற்கத்திய பாணி நடிகையை வடசென்னைவாசியாகவே மாற்றிவிட்டார்கள். கணவனைப் பறி கொடுத்த ஆத்திரத்தை அவர் வெளிப்படுத்தும் விதம் மிரட்டல். இரண்டாம் பாகத்தில் ஆன்ட்ரியாவின் ஆவேசத்தை இன்னும் எதிர்பார்க்கலாம் போலிருக்கிறது.

கிஷோர், சமுத்திரக்கனி படத்தில் மட்டும் போட்டியாளர்கள் இல்லை, நடிப்பிலும் போட்டி போடுகிறார்கள். இவர்களுடன் கூடவே டேனியல் பாலாஜி, பவன், சுப்பிரமணிய சிவா, ராதாரவி என ஒவ்வொரு கதாபாத்திரத்திற்கான தேர்வும், அதில் அவர்களது நடிப்பும் அவ்வளவு யதார்த்தம்.

சந்தோஷ் நாராயணன் இசையில் பின்னணி இசை படத்திற்கு தனி பலம். சென்னை வாசம் வீசும் கானா பாடல்கள் படத்தில் ஸ்பெஷல். கொஞ்சமாக வருவது மட்டும்தான் குறை.

சிறைச்சாலை, குப்பம் என இரண்டு இடங்களில்தான் படத்தின் கதை பெரும்பாலும் நகர்கிறது. தனித் தனியாக ஒவ்வொரு கதாபாத்திரம் உருவாக்கப்பட்ட விதம், அவற்றின் பின்னணி, அவற்றுக்கான சம்பந்தம் ஆகியவை திரைக்கதையில் அருமையான கோர்வையாக இணைக்கப்பட்டிருக்கிறது.

வழக்கமான சினிமாவிலிருந்து மாறுபட்ட ஒரு சினிமாவாக இந்த ‘வடசென்னை’ தெரிகிறது. ரசிகர்களுக்கான படம் என்று சொல்வதைவிட ரசனைக்கான படம் என ‘வடசென்னை’ படத்தைக் கொண்டாடலாம்.

வடசென்னை – வரவேற்பு

Movie Reviews

மெஹந்தி சர்க்கஸ் – விமர்சனம்

Published

on

மெஹந்தி சர்க்கஸ் விமர்சனம்

காதலித்தவர்கள், காதலில் ஊறியவர்களால் மட்டுமே ஒரு சிறந்த காதல் படத்தைக் கொடுக்க முடியும். இந்த ‘மெஹந்தி சர்க்கஸ்’ படத்தை, சினிமா மீது ரசனையான காதல் கொண்ட அறிமுக இயக்குனர் சரவண ராஜேந்திரன் இயக்கியிருக்கிறார்.

இளையராஜா இசையமைத்த படங்களில் கூட அவருடைய பாடல்களை திரும்பத் திரும்ப இந்த அளவிற்குப் பயன்படுத்தியிருக்க மாட்டார்கள். ஆனால், இந்தப் படத்தில் இளையாராஜாவின் பாடல்கள் நமக்கு ஒரு கதாபாத்திரமாகவே உள்ளுக்குள் இறங்கிவிடுகின்றன.

1989ல் வெளிவந்த ‘இதயத்தை திருடாதே’ படத்தில் இடம் பெற்ற ‘ஓ பாப்பா லாலி’ பாடலை 30 வருடங்கள் கழித்து இந்த 2019ல் திரையில் மீண்டும் கேட்டாலும் ஏதோ நேற்று வெளிவந்த ஒரு பாடல் போலவே ஒலிக்கிறது. அந்த அளவிற்கு காட்சிகளுக்குத் தகுந்தபடி இளையராஜாவின் பாடல்களை இந்தப் படத்தில் ஆங்காங்கே பயன்படுத்தியிருப்பது இயக்குனரின் ரசனையை வெளிக்காட்டுகிறது.

சாதி வெறி பிடித்த மாரிமுத்துவின் மகன் ரங்கராஜ், கொடைக்கானலில் ராஜகீதம் என்ற பெயரில் சினிமா பாடல்களை ரெக்கார்டிங் செய்து தரும் கடையை நடத்துகிறார். அந்த ஊரில் சர்க்கஸ் நடத்த வரும் வட இந்தியப் பெண்ணான ஸ்வேதா திரிபாதியின் அழகு ரங்கராஜை காதலில் வீழ்த்துகிறது. சிலபல சந்திப்புகளுக்குப் பின் காதலர்கள் ஆகிறார்கள் ரங்கராஜ், ஸ்வேதா. இவர்கள் காதல் மாரிமுத்துவுக்குத் தெரியவர, ஓடிப் போன காதலர்களைக் கண்டு பிடித்து மீண்டும் ஊருக்கு அழைத்து வந்து இருவரையும் பிரித்து வைக்கிறார். ஸ்வேதாவின் சர்க்கஸ் கூட்டம் அந்த ஊரை விட்டே கிளம்புகிறது. காதலர்கள் பிரிகிறார்கள். 20 வருடங்களுக்குப் பிறகு ஸ்வேதாவின் மகள், தன் அம்மாவின் காதலன் ரங்கராஜைத் தேடி கொடைக்கானல் வருகிறார். அதன் பின் என்ன நடக்கிறது என்பதுதான் படத்தின் கதை.

காதல் கதை என்றாலே அதில் புதுமுகங்கள் நடித்தாலும், காதலை சொல்ல வேண்டிய விதத்தில் சொன்னால் அவர்களை ரசிகர்கள் ஏற்றுக் கொள்வார்கள். அதை இயக்குனர் சரியான கதாபாத்திரங்களாக வடிவமைத்து, காதலையும் சொல்லியிருப்பதால் ரங்கராஜ், ஸ்வேதா இருவருமே புதுமுகங்கள் என்பதையும் மீறி நம் மனதில் இடம் பிடிக்கிறார்கள். அதிலும், ஸ்வேதாவின் கள்ளம் கபடமற்ற சிரிப்பு அடிக்கடி கண்முன் வந்து போகிறது.

படத்தில் மற்ற கதாபாத்திரங்களில் நடித்துள்ளவர்கள் கூட பொருத்தமான தேர்வு. ரங்கராஜ் அப்பா மாரிமுத்து, ஸ்வேதாவின் அப்பா சன்னி சார்லஸ், கணவர் ஜாதவ், பாதிரியார் வேல ராமமூர்த்தி, நண்பன் ஆர்ஜே விக்னேஷ் அவரவர் கதாபாத்திரங்களில் நிறைவு.

இளையராஜாவின் பாடல்கள் படத்தில் அடிக்கடி ஒலிப்பதால், அவற்றையும் மீறி சிறந்த பாடல்களைக் கொடுக்க வேண்டும் என ஷான் ரோல்டன் உழைத்திருக்கிறார். பின்னணி இசையில் தனி கவனம் செலுத்தியிருக்கிறார். செல்வகுமார் ஒளிப்பதிவில் கொடைக்கானல் அழகு அற்புதம்.

காதல் உணர்வை இன்னும் உள்ளுக்குள் இறக்கும்படியான காட்சிகளை வைத்திருக்கலாமோ என்று மட்டும் படம் முடிந்த பின் நமக்குள் ஒரு கேள்வி எழுகிறது. கதாபாத்திரங்கள், கதைக் களம் ஆகியவற்றில் செலுத்திய கவனத்தை, திரைக்கதையில் இன்னும் செதுக்கியிருக்கலாம் என்பது மட்டுமே சிறு குறையாகத் தெரிகிறது.

ஆனாலும், கைகளுக்கு அழகு மெஹந்தி, காதலுக்கு அழகு இந்த மெஹந்தி சர்க்கஸ்.

Continue Reading

Movie Reviews

காஞ்சனா 3 – விமர்சனம்

Published

on

காஞ்சனா 3 விமர்சனம்

‘காஞ்சனா’ படம் என்றாலே முதல் பாகமோ, இரண்டாம் பாகமோ டிவியில் போடுகிறார்கள் என்றாலே நமது வீட்டில் உள்ள குழந்தைகள் அந்தப் படத்தைப் பார்க்க உட்கார்ந்துவிடுவார்கள்.

பேய்ப் படத்தைக் கூட காமெடி படமாகக் கொடுத்து ரசிக்க வைத்தவர்தான் ராகவா லாரன்ஸ். காஞ்சனா வரிசையில் 3வது படம், முனி வரிசையில் 4வது படம் என இந்த ‘காஞ்சனா 3’ படத்தையும் நகைச்சுவை, சென்டிமென்ட், ஆக்ஷன், பேய் பயம் என நகர்த்தி இரண்டரை மணி நேரமும் ரசிக்க வைக்கிறார் ராகவா லாரன்ஸ்.

மாற்றுத் திறனாளிகள், அனாதைகள் என பலரையும் தன் ஆசிரமத்தில் வளர்ந்து ஆளாக்கும் ராகவா லாரன்சை ஒரு மந்திரியும், அவரது மகனும் ஒரு தவறைச் செய்யச் சொல்கிறார்கள். ஆனால், அதைச் செய்ய மறுக்கும் ராகவாவைவையும், அவரது காதலியையும் லாரி ஏற்றிக் கொலை செய்கிறார்கள். ராகவா லாரன்ஸ், அவரது காதலி ஆகியோரது ஆவி, முந்தைய பாகங்களைப் போல ராகவா லாரன்ஸ் உடம்புக்குள் புகுந்து தன்னைக் கொன்றவர்களை எப்படி பழி வாங்குகிறது என்பதுதான் படத்தின் கதை.

சிறு வயதிலேயே வைட்டமின் டி குறைவால் தலை முடி வெள்ளையாகிப் போன ‘காளி’ என்ற கதாபாத்திரத்தில் ராகவா லாரன்ஸ். இவர்தான் ஆசிரமம் நடத்துபவர். அந்தப் பகுதி குப்பத்து மக்களுக்கு தெய்வம் போன்றவர். ஆக்ஷனில் அதிரடி காட்டுகிறார் இந்த காளி. முந்தைய பாகங்களில் இருந்த அதே பயந்த சுபாவம் கொண்ட மற்றொரு கதாபாத்திரத்தில் இரண்டாவது ராகவா லாரன்ஸ். இவருக்கு முறைப் பெண்களைக் காதலிப்பது மட்டும்தான் வேலை. பேய் புகுந்து கொண்டபின் அவர் நடிக்கும் நடிப்பு, தியேட்டரில் அடேங்கப்பா என கைதட்டுகிறார்கள்.

ஓவியா, வேதிகா, நிக்கி டம்போலி என மூன்று ஹீரோயின்கள். மூவருமே கிளாமரில் போட்டி போட்டு நடித்திருக்கிறார்கள். ராகவா லாரன்சைத் துரத்தித் துரத்தி காதலிப்பது மட்டுமே இவர்களது வேலை. நான்காவது கதாநாயகியாக வெள்ளைக்கார நடிகை ஒருவர். இவர் தமிழ்ப் பெண்ணைப் போல ஆடையணிந்து துளியும் கிளாமர் காட்டாமல் நடித்திருக்கிறார்.

‘காஞ்சனா’ முதல் பாகத்தில் நகைச்சுவையில் கலக்கிய கோவை சரளா, தேவதர்ஷினி, ஸ்ரீமன் கூட்டணி மீண்டும் இந்த மூன்றாம் பாகத்தில் கூட்டணி அமைத்து தியேட்டரை அதகளப்படுத்துகிறது. குட்டீஸ்களுக்காகவே இவர்களது காமெடி.

அண்ணன், தம்பி வில்லன்களாக தருண் அரோரா, கபீர் சிங். படத்தில் சூரியும் துணை நடிகர் போல சில காட்சிகளில் வருகிறார். ஆனால், அவரால் சிரிக்க வைக்க முடியவில்லை.

டூபாடு வழங்கிய பாடல்கள். முற்றிலும் கமர்ஷியலை மனதில் கொண்டு தேர்வு செய்யப்பட்ட பாடல்கள். பின்னணி இசையில் தமன் வாசித்துத் தள்ளுகிறார்.

படத்தில் இடம் பெற்றுள்ள சண்டைக் காட்சிகள் ஒவ்வொன்றும் அதிரடி. குறிப்பாக கிளைமாக்ஸ் சண்டைக் காட்சி மிகப் பிரம்மாண்டம்.

மூவர் ஹீரோயின் அணியின் கிளாமரை மட்டும் படத்தில் குறைத்திருக்கலாம். லாஜிக் பற்றியெல்லாம் கேள்வி கேட்காமல் கோடை விடுமுறையை குடும்பத்துடன் இந்தப் படத்தைப் பார்த்துக் கொண்டாடலாம்.

Continue Reading

Movie Reviews

வெள்ளைப் பூக்கள் – விமர்சனம்

Published

on

வெள்ளைப் பூக்கள் விமர்சனம்

அமெரிக்காவில் வசிக்கும் தமிழர்கள் தயாரித்து, இயக்கி உருவாக்கியுள்ள படம். படத்தில் பணியாற்றியுள்ள பல தொழில்நுட்பக் கலைஞர்களும் அதில் அடக்கம்.

தமிழ் சினிமாவின் மீதுள்ள காதலால் இப்படி ஒரு படத்தைக் கொடுத்த அவர்களது முயற்சிக்கு நமது வாழ்த்துகள்.

அறிமுக இயக்குனர் விவேக் இளங்கோவன், தமிழ் சினிமாவில் உள்ள முன்னணி ஹீரோக்களை நடிக்க வைப்பதை விட, தன் கதையின் நாயகனாக வித்தியாசமான ஒரு கதாபாத்திரத்தில் நகைச்சுவை நடிகர் விவேக்கை நடிக்க வைத்திருக்கிறார். அதற்கே அவருக்கு ஒரு தனி வணக்கம் வைக்க வேண்டும்.

அதிலும் கதையின் நாயகன் கதாபாத்திரம் ஒரு ஓய்வு பெற்ற போலீஸ் அதிகாரி. உடல் வலிமையைவிட மூளை வலிமையை அந்தக் கதாபாத்திரம் மூலம் வெளிப்படுத்தியிருக்கிறார் இயக்குனர்.

அமெரிக்கப் பெண்ணைக் காதலித்து திருமணம் செய்து கொண்டதால் அமெரிக்காவில் வசிக்கும் மகன் மீது கோபம் கொண்டு அங்கு செல்லாமல் இருக்கும் விவேக், மேலதிகாரி சொன்னதால் அமெரிக்கா செல்கிறார். அங்கு அடுத்தடுத்து சில க்ரைம் சம்பவங்கள் நடக்கின்றன. பக்கத்து வீட்டுப் பெண், ஒரு இளைஞர் காணாமல் போக விசாரணையில் திறமைசாலியான விவேக், அந்த வழக்கை அமெரிக்க போலீசுக்குத் தெரியாமல் விசாரிக்க ஆரம்பிக்கிறார். ஒரு சந்தர்ப்பத்தில் அவர் மகனே கடத்தப்பட அதிர்ச்சியடைகிறார். அத்தனை கடத்தல்களைச் செய்தது யார் என்பதை விவேக் எப்படி கண்டுபிடிக்கிறார் என்பதுதான் படத்தின் கதை.

30 வருடங்களாக நகைச்சுவைக் கதாபாத்திரங்களில் நடித்து வரும் விவேக், கடந்த சில வருடங்களில் ஒரு சில படங்களில் கதாநாயகனாக நடித்திருந்தார். ஆனால், அவற்றைக் காட்டிலும் இந்தப் படத்தில் தனக்குப் பொருத்தமான ஒரு கதாபாத்திரத்தைத் தேர்வு செய்து அதில் அவருடைய வழக்கமான நகைச்சுவையை தவிர்த்துவிட்டு, குணச்சித்திரக் கதாபாத்திரத்தில் மிக இயல்பாக நடித்திருக்கிறார். விசாரணை என்ற பெயரில் பேசுவதை மட்டும் கொஞ்சம் குறைத்திருக்கலாம்.

விவேக்கின் அமெரிக்க நண்பராக சார்லி, மகனாக தேவ், மருமகளாக பெய்ஜ் ஹென்டர்சன் படத்தில் முக்கிய கதாபாத்திரங்களில் நடித்திருக்கிறார்கள்.

அமெரிக்காவில் உள்ள சியாட்டில் நகரில் முழு கதையும் நகர்கிறது. நாம் அதிகமாகப் பார்க்காத அமெரிக்க கிராமத்து அழகையும், சியாட்டில் நகர அழகையும் அருமையாக படமாக்கியிருக்கிறார் ஒளிப்பதிவாளர் ஜெரால்ட் பீட்டர். ராம்கோபால் பின்னணி இசையும் படத்திற்கு பலமாக அமைந்துள்ளது.

கமல்ஹாசன் நடித்த ‘வேட்டையாடு விளையாடு’ படம் போல ஒரு பரபரப்பான க்ரைம் திரில்லர் இந்தப் படம். புதியவர்களின் புதிய முயற்சிக்கு தமிழ் சினிமா ரசிகர்களும் ஆதரவு தந்தால் இம்மாதிரியான இன்னும் பல வித்தியாசமான படைப்புகள் வெளிவரும்.

Continue Reading
Advertisement

Tamil Movies Database

Trending

error: Content is protected !!