Connect with us

Movie Reviews

விக்ரம் வேதா விமர்சனம்

Published

on

vikram vedha

ஒரு நல்லவனுக்கும் கெட்டவனுக்கும் இடையே நடக்கும் ராமர், லட்சுமண காலத்து கதைதான்.

கதை சொல்லலுக்காக விக்ரம், வேதாளத்தைத் துணைக்கு அழைத்துக் கொண்டிருக்கிறார்கள். விக்ரமிடம் வேதாளம் சிக்கும் போதெல்லாம் ஒரு கதையைச் சொல்லி தப்பிவிடுகிறது. கடைசியில் விக்ரம் வேதாளம் கேட்டும் கேள்விக்கு பதில் சொல்கிறதா இல்லையா என்பதுதான் படத்தின் கதை.

என்கவுன்டர் ஸ்பெஷலிஸ்ட் மாதவனுக்கு வட சென்னையை ஆட்டிப் படைக்கும் தாதா விஜய் சேதுபதியை என்கவுன்டர் செய்ய வேண்டும் என்பது லட்சியம். அதற்காக அவர் தலைமையிலான அணியினர் போராடுகிறார்கள். அந்தப் போராட்டத்தில் மாதவனின் நண்பனான பிரேம் சுட்டுக் கொல்லப்படுகிறார். இரண்டு முறை மாதவன், விஜய் சேதுபதியைப் பிடித்து விடுகிறார். ஆனால், இரண்டு முறையும் ஒரு கதையைச் சொல்லி தப்பித்து விடுகிறார். ஒரு முறை விஜய் சேதுபதி கொடுத்த ஒரு தகவலால் தன்னைச் சுற்றி ஏதோ ஒரு தவறு நடப்பதாக உணர்கிறார் மாதவன். நண்பன் பிரேம் சுட்டுக் கொல்லப்பட்டதிலும் ஏதோ மர்மம் இருக்கிறது என நினைக்கிறார். அவற்றையெல்லாம் மாதவன் கண்டுபிடித்தாரா இல்லையா என்பதுதான் படத்தின் மீதிக் கதை.

என்கவுன்டர் ஸ்பெஷலிஸ்ட் விக்ரம் ஆக மாதவன் விறைப்பாக இருக்கிறார். ‘இறுதிச் சுற்று’ படத்தின் வெற்றிக்குப் பிறகு சரியான ஒரு கதாபாத்திரத்தைத் தேர்வு செய்து அசத்தலாக நடித்திருக்கிறார். அந்தப் பணிக்கேயுரிய இறுக்கம் முகத்தில் இருக்கிறது. மனைவியிடம் வரும் செல்லச் சண்டைக்கும், வேதாவிடம் போடும் கோபச் சண்டைக்கும் நிறையவே வித்தியாசம் காட்டியிருக்கிறார். மாவனின் ‘தி பெஸ்ட்’ கதாபாத்திரங்களில் இந்த விக்ரமும் இருக்கும்.

நாயகனாக தனித்து உயர்ந்து நிற்கும் நேரத்தில் இப்படி ஒரு நெகட்டிவ் கதாபாத்திரத்தில் விஜய் சேதுபதி நடிப்பதே பெரிய விஷயம். அந்த வேதா கதாபாத்திரத்தில் அவரைத் தவிர வேறு யாரும் இந்த அளவிற்கு சிறப்பாக நடித்திருக்க முடியாது. படத்திற்குப் படம் மாறுபட்ட கதாபாத்திரத்தைத் தேர்வு செய்யும் அந்த தாகத்திற்கு தனி சல்யூட் விஜய் சேதுபதி.

மாதவனின் மனைவியாக ஷ்ரத்தா ஸ்ரீநாத். இருவருக்கும் துளி கூட ஜோடிப் பொருத்தம் இல்லை. 40 வயதைக் கடந்த தோற்றத்தில் இருக்கும் மாதவனுக்கு 20 வயதான ஷ்ரத்தா ஜோடி. ஷ்ரத்தாவிற்கு புடவை கட்டிவிட்டால் மட்டும் வயது கூடிவிடுமா என்ன ?.

விஜய் சேதுபதியின் தம்பியாக கதிர், இவரின் காதலியாக வரலட்சுமி சரத்குமார். தன்னை விட மூத்த வரலட்சுமியைக் காதலிக்கிறார் கதிர். எதற்கு இந்த வயது வித்தியாசக் காதல், அதனால் படத்திற்கு என்ன நன்மை.

பிரேம் கொஞ்சமாக வந்தாலும் நிறைவு. அந்த மலையாள தாதா ஹரிஷ் பெராடி, மாதவனின் உயர் அதிகாரி ரவி காலே ஆகியோரும் அவரவர் கதாபாத்திரத்தில் அசத்தல்.

சாம் சி.எஸ். பின்னணி இசை படத்திற்கு கூடுதல் விறுவிறுப்பைத் தருகிறது. வினோத்தின் ஒளிப்பதிவும், மணிகண்டனின் வசனமும் ரசிக்க வைக்கின்றன.

 

Uncategorized

அயோக்யா – விமர்சனம்

4 Tamil Cinema Rating – 3.5/5

Published

on

அயோக்யா - விமர்சனம் - 4 Tamil Cinema

வெங்கட் மோகன் இயக்கத்தில், சாம் சி.எஸ். இசையமைப்பில், விஷால், ராஷி கண்ணா, பார்த்திபன், கே.எஸ். ரவிக்குமார் மற்றும் பலர் நடிக்க வெளிவந்திருக்கும் படம் ‘அயோக்யா’.

பெண்களுக்கு எதிரான வன்கொடுமையைப் பற்றியும், அதற்கான உடனடித் தீர்வையும் சொல்லும் படம். தெலுங்கில் வெளிவந்து பெரும் வெற்றி பெற்ற ‘டெம்பர்’ படத்தை தமிழில் ரீமேக் செய்திருக்கிறார்கள். ஒரிஜனல் படத்தில் உள்ள கிளைமாக்சை மட்டும் மாற்றியிருக்கிறார்கள்.

அயோக்கியத்தனமாக செயல்படும் ஒரு இன்ஸ்பெக்டர் ஒரு பெண்ணுக்காக எப்படி மிக மிக யோக்கியத்தனமாக மாறுகிறார் என்பதுதான் படத்தின் ஒரு வரிக் கதை.

விஷால் ஒரு அனாதை. போலீசார்தான் அதிகாரத்தில் உள்ளவர்கள், அவர்கள் நினைத்தால் எவ்வளவு வேண்டுமானாலும் சம்பாதிக்கலாம் என சிறு வயதிலேயே அவர் மனதில் ஆழமாகப் பதிகிறது. பொய் சான்றிதழ் கொடுத்து இன்ஸ்பெக்டர் ஆகவும் ஆகிறார். சென்னையில் பல கடத்தல் வேலைகளைச் செய்யும் பார்த்திபன் அவருடைய தொழிலுக்கு தொந்தரவு செய்யாத இன்ஸ்பெக்டர் வேண்டும் என்பதற்காக அவருடைய ஏரியாவில் விஷாலை வேலைக்கு மாற்றிக் கொண்டு வருகிறார்.

பார்த்திபனுக்காக செய்யும் வேலைகளுக்கு பதிலுக்கு தன் பல தேவைகளைப் பூர்த்தி செய்து கொள்கிறார் விஷால். ஆனால், ஒரு பெண் கொலை வழக்கில் பார்த்திபனுக்கும், விஷாலுக்கும் பிரச்சினை வருகிறது. அதன் பின் என்ன நடக்கிறது என்பதுதான் படத்தின் மீதிக் கதை.

ஆக்ஷன் ஹீரோ கதாபாத்திரம் என்றால் கேட்கவே வேண்டாம். விஷால் வெளுத்து வாங்குகிறார். அயோக்கியத்தனம் செய்யும் ஒருவன் இப்படித்தான் இருப்பான் என யாரையும் மதிக்காமல் சுற்றி வருகீறார். அப்படிப்பட்டவரை காதலும், ஒரு பெண்ணின் கொலையும் மாற்றுகிறது. கிளைமாக்சை தன் இமேஜுக்காகவே விஷால் மாற்றியிருப்பார் போலிருக்கிறது. நெகிழ வைக்கும் கிளைமாக்ஸ்தான் என்றாலும் நம்பவே முடியாத ஒரு கிளைமாக்ஸ்.

‘நானும் ரௌடிதான்’ படத்திற்குப் பிறகு பார்த்திபனின் வில்லத்தனம் ரசிக்க வைக்கிறது. விஷாலை அசால்ட்டாக ஹேண்டில் செய்கிறார். இருவருக்குமிடையிலான வசன சண்டை ரசிக்க வைக்கிறது.

ராஷி கண்ணா விஷாலின் காதலியாக அழகுப் பதுமையாக வந்து போகிறார். கே.எஸ்.ரவிக்குமாரின் கதாபாத்திரமும் அதில் அவருடைய நடிப்பும் போலீஸ் மீதான மரியாதையை இன்னும் அதிகமாக்குகிறது.

சாமி சிஎஸ் பின்னணி இசையில் அசத்துகிறார். ஒளிப்பதிவும், சண்டைக் காட்சிகளும் படத்திற்கு பக்கபலம்.

பக்காவான கமர்ஷியல் படத்தை சில லாஜிக் மீறல்களுடன் கொடுத்து ரசிக்க வைத்திருக்கிறார் இயக்குனர் வெங்கட் மோகன்.

அயோக்யா – ஆக்ஷன் படம்யா…

Continue Reading

Movie Reviews

கீ – விமர்சனம்

4TamilCinema – Rating – 3/5

Published

on

கீ விமர்சனம் - 4 Tamil Cinema

காளீஸ் இயக்கத்தில் விஷால் சந்திரசேகர் இசையமைப்பில், ஜீவா, நிக்கி கல்ரானி, அனைகா சோதி, கோவிந்த் பத்மசூர்யா, ஆர் ஜோ பாலாஜி மற்றும் பலர் நடித்திருக்கும் படம் ‘கீ’.

சைபர் கிரைம் பற்றிய ஒரு படம். நமது மொபைல் போன்களை ஹேக்கர்கள் யார் வேண்டுமானாலும் ஹேக் செய்து நம் ரகசியங்களைத் தெரிந்து கொள்ளலாம் என அதிர்ச்சியான கதையைக் கொண்ட படம்.

பேஸ்புக், டிவிட்டர் உள்ளிட்ட சமூக வலைத்தளங்களில் நாம் பதிவிடும் அனைத்துமே எந்த ரகசியமும், ஒளிவு மறைவும் இல்லாமல் யார், யாருக்கோ பரப்பி வைக்கிறது என்பதை வெட்ட வெளிச்சமாகச் சொல்லியிருக்கிறார்கள். அப்படி நம்மைப் பற்றி பரவும் விஷயங்கள் சமயங்களில் நமக்கு எதிராகவே திரும்பும் என்பதையும் அதிர்ச்சிகரமான உண்மையுடன் சொல்லியிருக்கும் படம்தான் கீ.

இந்தப் படத்தை டெக்னாலஜி படமாக மட்டும் சொல்லாமல் காமெடி, காதல், சென்டிமென்ட் என சேர்த்து சொல்ல இயக்குனர் ஆசைப்பட்டதால் மெயின் கதையிலிருந்து படம் கொஞ்சம் நகர்ந்து சுவாரசியத்தைக் கொஞ்சம் குறைக்க வைக்கிறது.

ஜீவா ஒரு ஜாலியான கல்லூரி மாணவர். எந்தவிதமான கம்ப்யூட்டரையும், மொபைல் போனையும் அவருடைய ‘பாட்ஷா’ வைரசால் ஹேக் செய்துவிடுவார். அவருடைய தோழியாகப் பழக ஆரம்பிக்கும் அனைகாவின் கொலைக்குப் பிறகு அவருக்கும் ஹேக் செய்து பணம் சம்பாதிப்பதையே தொழிலாக வைத்திருக்கம் கோவிந்த் பத்மசூர்யாவுக்கும் இடையே மோதல் வருகிறது. பத்மசூர்யா சம்பந்தப்பட்ட ரகசியத்தை ஜீவா வைத்திருக்கிறார். அதைக் கைப்பற்ற பத்மசூர்யா துடிக்கிறார். இதன் பின்ன என்ன நடக்கிறது என்பதுதான் படத்தின் கதை.

ஒரு வழக்கமான இளம் நாயகன் கதாபாத்திரத்தில் ஜீவா. ஜாலியாக நடித்துவிட்டுப் போகிறார். காதல், காமெடி, ஆக்ஷன் என அனைத்தையும் அவர் கதாபாத்திரத்தில் வைத்துவிட்டார் இயக்குனர். இந்தக் கதைக்கு முற்றிலும் ஆக்ஷன் சம்பந்தமாகவே வைத்திருந்தால் இன்னும் சிறப்பாக இருந்திருக்கும்.

நிக்கிக்கு அவ்வளவாக வாய்ப்பில்லை. ஜீவாவின் பெற்றோர்களாக ராஜேந்திர பிரசாத், சுகாசினி சென்டிமென்ட்டில் நனைய வைக்கிறார்கள். ஆர்ஜே பாலாஜி ஆங்காங்கே சிரிக்க வைக்கிறார்.

விஷால் சந்திரசேகரின் இசையில் பின்னணி இசை ஓகே. பாடல்களில் இன்னும் கவனம் செலுத்தியிருக்க வேண்டும்.

இந்தக் காலத்திற்கேற்ற வித்தியாசமான கதை. அதை இன்னும் சுவாரசியமாக ஆக்ஷனுடன் சொல்லியிருந்தால் பெரிய த்ரில்லர் படமாக அமைந்திருக்கும்.

கீ – இன்னும் கொடுத்திருக்கலாம்.

Continue Reading

Movie Reviews

மெஹந்தி சர்க்கஸ் – விமர்சனம்

Published

on

மெஹந்தி சர்க்கஸ் விமர்சனம்

காதலித்தவர்கள், காதலில் ஊறியவர்களால் மட்டுமே ஒரு சிறந்த காதல் படத்தைக் கொடுக்க முடியும். இந்த ‘மெஹந்தி சர்க்கஸ்’ படத்தை, சினிமா மீது ரசனையான காதல் கொண்ட அறிமுக இயக்குனர் சரவண ராஜேந்திரன் இயக்கியிருக்கிறார்.

இளையராஜா இசையமைத்த படங்களில் கூட அவருடைய பாடல்களை திரும்பத் திரும்ப இந்த அளவிற்குப் பயன்படுத்தியிருக்க மாட்டார்கள். ஆனால், இந்தப் படத்தில் இளையாராஜாவின் பாடல்கள் நமக்கு ஒரு கதாபாத்திரமாகவே உள்ளுக்குள் இறங்கிவிடுகின்றன.

1989ல் வெளிவந்த ‘இதயத்தை திருடாதே’ படத்தில் இடம் பெற்ற ‘ஓ பாப்பா லாலி’ பாடலை 30 வருடங்கள் கழித்து இந்த 2019ல் திரையில் மீண்டும் கேட்டாலும் ஏதோ நேற்று வெளிவந்த ஒரு பாடல் போலவே ஒலிக்கிறது. அந்த அளவிற்கு காட்சிகளுக்குத் தகுந்தபடி இளையராஜாவின் பாடல்களை இந்தப் படத்தில் ஆங்காங்கே பயன்படுத்தியிருப்பது இயக்குனரின் ரசனையை வெளிக்காட்டுகிறது.

சாதி வெறி பிடித்த மாரிமுத்துவின் மகன் ரங்கராஜ், கொடைக்கானலில் ராஜகீதம் என்ற பெயரில் சினிமா பாடல்களை ரெக்கார்டிங் செய்து தரும் கடையை நடத்துகிறார். அந்த ஊரில் சர்க்கஸ் நடத்த வரும் வட இந்தியப் பெண்ணான ஸ்வேதா திரிபாதியின் அழகு ரங்கராஜை காதலில் வீழ்த்துகிறது. சிலபல சந்திப்புகளுக்குப் பின் காதலர்கள் ஆகிறார்கள் ரங்கராஜ், ஸ்வேதா. இவர்கள் காதல் மாரிமுத்துவுக்குத் தெரியவர, ஓடிப் போன காதலர்களைக் கண்டு பிடித்து மீண்டும் ஊருக்கு அழைத்து வந்து இருவரையும் பிரித்து வைக்கிறார். ஸ்வேதாவின் சர்க்கஸ் கூட்டம் அந்த ஊரை விட்டே கிளம்புகிறது. காதலர்கள் பிரிகிறார்கள். 20 வருடங்களுக்குப் பிறகு ஸ்வேதாவின் மகள், தன் அம்மாவின் காதலன் ரங்கராஜைத் தேடி கொடைக்கானல் வருகிறார். அதன் பின் என்ன நடக்கிறது என்பதுதான் படத்தின் கதை.

காதல் கதை என்றாலே அதில் புதுமுகங்கள் நடித்தாலும், காதலை சொல்ல வேண்டிய விதத்தில் சொன்னால் அவர்களை ரசிகர்கள் ஏற்றுக் கொள்வார்கள். அதை இயக்குனர் சரியான கதாபாத்திரங்களாக வடிவமைத்து, காதலையும் சொல்லியிருப்பதால் ரங்கராஜ், ஸ்வேதா இருவருமே புதுமுகங்கள் என்பதையும் மீறி நம் மனதில் இடம் பிடிக்கிறார்கள். அதிலும், ஸ்வேதாவின் கள்ளம் கபடமற்ற சிரிப்பு அடிக்கடி கண்முன் வந்து போகிறது.

படத்தில் மற்ற கதாபாத்திரங்களில் நடித்துள்ளவர்கள் கூட பொருத்தமான தேர்வு. ரங்கராஜ் அப்பா மாரிமுத்து, ஸ்வேதாவின் அப்பா சன்னி சார்லஸ், கணவர் ஜாதவ், பாதிரியார் வேல ராமமூர்த்தி, நண்பன் ஆர்ஜே விக்னேஷ் அவரவர் கதாபாத்திரங்களில் நிறைவு.

இளையராஜாவின் பாடல்கள் படத்தில் அடிக்கடி ஒலிப்பதால், அவற்றையும் மீறி சிறந்த பாடல்களைக் கொடுக்க வேண்டும் என ஷான் ரோல்டன் உழைத்திருக்கிறார். பின்னணி இசையில் தனி கவனம் செலுத்தியிருக்கிறார். செல்வகுமார் ஒளிப்பதிவில் கொடைக்கானல் அழகு அற்புதம்.

காதல் உணர்வை இன்னும் உள்ளுக்குள் இறக்கும்படியான காட்சிகளை வைத்திருக்கலாமோ என்று மட்டும் படம் முடிந்த பின் நமக்குள் ஒரு கேள்வி எழுகிறது. கதாபாத்திரங்கள், கதைக் களம் ஆகியவற்றில் செலுத்திய கவனத்தை, திரைக்கதையில் இன்னும் செதுக்கியிருக்கலாம் என்பது மட்டுமே சிறு குறையாகத் தெரிகிறது.

ஆனாலும், கைகளுக்கு அழகு மெஹந்தி, காதலுக்கு அழகு இந்த மெஹந்தி சர்க்கஸ்.

Continue Reading
Advertisement

Tamil Movies Database

Trending

error: Content is protected !!