Connect with us

Movie Reviews

குப்பத்து ராஜா – விமர்சனம்

Published

on

குப்பத்து ராஜா விமர்சனம்

ஒரு படத்திற்கு வெறும் கதைக்களமும், கதாபாத்திரங்களும் மட்டும் போதாது. அவற்றைச் சிறப்பாக்கும் விதத்தில் நல்ல கதையும் வேண்டும். அப்படி இல்லை என்றால் அது ரசிகர்களைக் கவரும் வாய்ப்பும் குறைவாகத்தான் இருக்கும்.

இந்தப் படத்தின் இயக்குனர் பாபா பாஸ்கர், அவர் வளர்ந்த இடங்களைப் பற்றியும், அவர் பார்த்த மனிதர்களைப் பற்றியும் படத்தில் சரியாகச் சேர்த்திருக்கிறார். ஆனால், அவற்றிற்கான ஒன்றுக்கொன்று முடிச்சான கதை இல்லாமல் போனதால் இந்த ‘குப்பத்து ராஜா’ ரசிகர்களிடம் ஆட்சி செய்ய முடியாமல் போய்விட்டார்.

வட சென்னையில் உள்ள ஒரு ஏரியா. தவணை கட்டாத பைக்குகளைத் தூக்கிக் கொண்டு வருபவராக ஜி.வி.பிரகாஷ்குமார். அவருடைய அப்பா எம்எஸ் பாஸ்கர், பார்த்திபன், மற்றும் சிலர் ஏரியாவின் பெரிய மனிதர்களாக இருப்பவர்கள். அவர்களுக்கும் ஜிவி பிரகாஷுக்கும் ஆகவே ஆகாது. ஒரு நாள் எம்எஸ் பாஸ்கர் கொல்லப்பட, அதற்குக் காரணமானவர்களைப் பழி வாங்கத் துடிக்கிறார் ஜி.வி.பிரகாஷ்.

ஒரு படத்திலேயே பல விஷயங்களைச் சொல்ல வேண்டும் என இயக்குனர் நினைத்ததால் திரைக்கதை அல்லாடுகிறது.  ஜிவி பிரகாஷ், பாலக் லால்வானி காதல், ஜிவி பிரகாஷ், பாஸ்கர் அப்பா மகன் பாசம், பார்த்திபனின் ஏரியா பாசம், பூனம் பஜ்வாவின் பிரகாஷ் மீதான பாசம், ஏரியா மக்களுக்காகச் செலவு செய்யத் தயங்காத சேட்டின் பணப் பாசம், அந்தப் பகுதி மக்களை வெறுக்கும் கவுன்சிலர் வில்லத்தனம் என அனைத்து கதாபாத்திரங்களுக்கும் இரண்டிரண்டு காட்சிகள் என குழப்பத்துடன் கதையை நகர்கிறது. எப்படியோ ஆரம்பித்து, எப்படியோ நகர்ந்து, எப்படியோ முடிகிறது படம்.

ஜிவி பிரகாஷ் , தர லோக்கல் ஆசாமியாக நடிக்க கடுமையாக முயற்சி செய்திருக்கிறார். ஆனால், அவருடைய தோற்றமே அதற்குப் பொருத்தமாக அமைந்துவிட்டது. இருந்தாலும் அவர் எகிறி எகிறி அடிக்கிறார் என்பது நம்பும்படியாக இல்லை.

பாலக் லால்வானி, காதல் நடிப்பதைக் காட்டுவதில் கூட ஓவர் ஆக்டிங் செய்கிறார். சரியான கதாபாத்திரங்களைத் தேர்வு செய்தால் தமிழில் ஒரு இடத்தைப் பிடிக்கலாம். யோகி பாபு எந்தக் காட்சியில் சிரிக்க வைத்தார் என்று யோசித்தால் ஞாபகமே வரவில்லை.

பூனம் பஜ்வா கதாபாத்திரம் எல்லாம் நம்பும்படி இல்லை. கிளாமருக்காக வலியத் திணிக்கப்பட்டது போன்று இருக்கிறது. ஏரியா மக்களுக்கு நல்லது செய்ய நினைக்கும் பார்த்திபன் கதாபாத்திரத்தை வில்லனைப் போலக் காட்டுவது தேவையற்றது.

தான் நடிக்கும் படத்திற்கே சிறப்பான பாடல்களைப் போட முடியாமல் தவிக்கிறார் ஜிவி பிரகாஷ்குமார்.

படத்திற்காகப் போடப்பட்ட செட், கதாபாத்திரங்களுக்கான நட்சத்திரத் தேர்வு பொருத்தமாக உள்ளன. அதில் மட்டும் இயக்குனர் பாபா பாஸ்கர் பளிச்சிடுகிறார். கதை, திரைக்கதையில் எதை, எதையோ அள்ளிப் போட்டு படத்தை நிரப்பியிருக்கிறார்.

தமிழ் சினிமாவில்  வட சென்னை கதைகளுக்கு சில வருடங்களுக்கு ‘குட்பை’ சொல்வது நல்லது.

Movie Reviews

சிவப்பு மஞ்சள் பச்சை – விமர்சனம்

4 Tamil Cinema – Rating – 3.25/5

Published

on

By

சிவப்பு மஞ்சள் பச்சை - விமர்சனம் - 4 Tamil Cinema

கதை

அப்பா,  அம்மா இல்லாததால் சிறு வயதிலிருந்தே அத்தையின் ஆதரவில் தனியாக வளர்ந்து வருபவர்கள் அக்கா லிஜிமோள் ஜோஸ், தம்பி ஜி.வி.பிரகாஷ்குமார். ஜிவி பிரகாஷ் பைக் ரேசில் அக்காவுக்குத் தெரியாமல் அடிக்கடி கலந்து கொள்பவர். பைக் ரேஸ் ஓட்டி வரும் ஜிவி பிரகாஷை ஒரு நாள் டிராபிக் இன்ஸ்பெக்டரான சித்தார்த் பிடித்து அவமானப்படுத்துகிறார். அதனால் அவர் மீது கடும் கோபத்தில் இருக்கிறார் ஜிவி. மறுநாள் லிஜோமோளைப் பெண் பார்க்க வருகிறார்கள். அங்கு அக்காவைப் பெண் பார்க்க வந்தது சித்தார்த் என்பதைப் பார்த்து அதிர்ச்சியடைகிறார் ஜிவி. சிறு வயதில் அக்காவுக்கு தான்தான் மாப்பிள்ளை பார்ப்பேன் என்று சத்தியம் வாங்கியதை நினைத்து அந்த திருமணத்தைத் தடுக்க நினைக்கிறார். ஆனால், அதையும் மீறி திருமணம் நடக்கிறது. அதன் பின்பாவது மாமனும், மச்சானும் ஒன்று சேர்ந்தார்களா இல்லையா என்பதுதான் இப்படத்தின் கதை.

நடிப்பு

ஒரு எமோஷனல் திரைப்படமாக இருப்பதால் படத்தில் முக்கிய கதாபாத்திரங்களில் நடித்துள்ள அனைவருக்குமே நடிக்க நல்ல வாய்ப்பு கிடைத்திருக்கிறது. அதை அனைவருமே சரியாகப் பயன்படுத்திக் கொண்டிருக்கிறார்கள். ஒரு பொறுப்பான டிராபிக் இன்ஸ்பெக்டராக முதல் முறையாக அனைவரையும் கவரும் விதத்தில் இந்தப் படத்தில் நடித்திருக்கிறார் சித்தார். அவரது நடிப்பில் வழக்கமா இருக்கும் ஒரு அலட்டல் இந்தப் படத்தில் துளியும் இல்லை. ஜிவி பிரகாஷின் நடிப்புக்கு இந்தப் படம்தான் திருப்புமுனையாக அமையும். அக்காவுக்குப் பொறுப்பான தம்பி. அக்கா மீது அவ்வளவு பாசம். ஆனால், பைக் ரேஸில் மட்டும் லோக்கலாக இறங்கும் இளைஞர் என மதன் கதாபாத்திரத்தில் அப்படியே தன்னை மாற்றிக் கொண்டுள்ளார்.

ஜிவி பிரகாஷின் அக்காவாக லிஜோமோள் ஜோஸ். யதார்த்தமான முகம், யதார்த்தமான நடிப்பு. தமிழ் சினிமாவில் குடும்பத்து கதாநாயகியாக மிளிர்வதற்கு அனைத்துத் தகுதிகளும் அவருக்கு இருக்கிறது. கண்களிலேயே அதிகம் பேசுகிறார். ஜிவி பிரகாஷ் ஜோடியாக காஷ்மிரா. கிடைத்த குறைவான வாய்ப்பையும் சரியாகப் பயன்படுத்திக் கொண்டிருக்கிறார். அத்தையாக ‘நக்கலைட்ஸ்’ தனம், தமிழ் சினிமாவுக்குப் புதிய அம்மா வரவு.

இசை, மற்றவை

சித்துகுமார் இசையில் சில பாடல்கள் முணுமுணுக்க வைக்கின்றன. எமோஷனல் படத்தில் டெக்னிக்கல் விஷயங்கள் எப்படிஇருக்க வேண்டுமோ அப்படியே இருக்கின்றன.

+

மாமன் – மச்சான் உறவு பற்றிய கதை, அக்கா – தம்பி பாசம், அனைவரின் இயல்பான நடிப்பு

சினிமாத்தனமான கிளைமாக்ஸ்

Continue Reading

Movie Reviews

மகாமுனி – விமர்சனம்

Published

on

By

மகாமுனி - விமர்சனம் - 4 Tamil Cinema

கதை

சிறு வயதிலேயே பிரிந்து போன அண்ணன் தம்பி இரட்டையர்களாக இரு வேடங்களில் ஆர்யா. ஒருவர் சென்னைக்கு அருகில் கூலிக் கொலைகாரனாக இருக்கிறார். மற்றொருவர் ஈரோடு அருகில் ஒரு கிராமத்தில் பக்திமானாகவும், இயற்கை விவசாயியாகவும் இருக்கிறார். ஒரு கொலை வழக்கில் குற்றவாளியான கொலைகாரன் ஆர்யாவை போலீஸ் துரத்த, பக்திமான் ஆர்யா அவர்களிடம் தவறாக சிக்கிக் கொள்கிறார். அதன் பின் என்ன நடக்கிறது என்பதுதான் படத்தின் மீதிக் கதை.

நடிப்பு

இரு வேடங்களில் ஆர்யா. இரண்டுமே ஒன்றுக்கொன்று எதிரான குணநலன் கொண்ட கதாபாத்திரங்கள். ‘நான் கடவுள்’ படத்திற்குப் பிறகு ஆர்யாவின் நடிப்புத் திறமை இந்தப் படத்தில்தான் மீண்டும் வெளிப்பட்டிருக்கிறது. ஆர்யாவின் முக்கியமான பட வரிசையில் இந்தப் படத்திற்கும் நிச்சயம் இடம் உண்டு.

கொலைகாரன் ஆர்யாவின் மனைவியாக இந்துஜா. காதலித்து மணந்து கொண்டவர். அன்பான மனைவியாக அவ்வளவு யதார்த்தமாக நடித்திருக்கிறார். பக்திமான் ஆர்யாவைக் காதலிக்கும் பெரியார் படத்தை தன் அறையில் வைத்திருக்கும் ஜர்னலிசம் படிக்கும் பெண்ணாக மகிமா நம்பியார். முற்போக்கு சிந்தனை கொண்டவர். இவரும் இதுவரை நடித்த படங்களிலிருந்து மாறுபட்ட கதாபாத்திரத்தில் நடித்திருக்கிறார்.

இசை, மற்றவை

ஜிப்ரான் பின்னணி இசை, அருண் பத்மாநாபன் ஒளிப்பதிவு இரண்டுமே படத்தின் தரத்தை இன்னும் உயர்த்துகின்றன.

+

அனைவரின் நடிப்பு…

கொஞ்சம் மெதுவாக நகரும் திரைக்கதை.

 

Continue Reading

Movie Reviews

சாஹோ – விமர்சனம்

4 Tamil Cinema Rating – 2.75/5

Published

on

By

சாஹோ - விமர்சனம் - 4 Tamil Cinema

கதை

மிக புத்திசாலி திருடனான பிரபாஸ், அவரைப் பிடிக்க அமைக்கப்பட்ட தனி போலீஸ் படைக்குள் நுழைந்து தன்னை போலீஸ் அதிகாரி என நம்ப வைத்து, நீல் நிதின் முகேஷ்தான் திருடன்  என போலீசை நம்ப வைக்கிறார். உலகின் முக்கியமான கேங்ஸ்டர்களின் பணம் மறைத்து வைக்கப்பட்டிருக்கும் லாக்கரைத் திறக்க உதவும் பிளாக் பாக்ஸ் ஒன்றை திருடவே பிரபாஸ் அப்படி நாடகமாடுகிறார். அதை எடுத்த பின் அவர் வெளிநாட்டிற்குத் தப்பிவிடுகிறார். அனைத்து உண்மையும் தெரிந்து போலீஸ் அவரைப் பிடிக்க திட்டம் போடுகிறார்கள். அதன்பின் என்ன நடக்கிறது என்பதுதான் படத்தின் கதை.

நடிப்பு

‘பாகுபலி’ படத்திற்குப் பிறகு பிரபாஸ் நடித்து வெளிவந்துள்ள படம். படத்தில் சூப்பர் மேன், ஸ்பைடர் மேன், அந்த மேன், இந்த மேன் என பல ஹாலிவுட் படங்களில் பார்த்த சூப்பர் ஹீரோக்களை அவர் ஒருவராகவே இந்தப் படத்தில் காட்டுகிறார். கிளைமாக்ஸில் பறந்து பறந்து, நிஜமாகவே ஒரு கருவி மூலம் பறந்து சண்டை போடுகிறார். லாஜிக்கையெல்லாம் பார்க்கவில்லை என்றால் பிரபாஸையும் படத்தையும் ரசிக்கலாம். நாயகி ஷ்ரத்தா கபூர் போலீஸ் அதிகாரியாக நடித்திருக்கிறார். அவருக்கும் பிரபாஸுக்கும் ஜோடிப் பொருத்தம் நன்றாகவே இருக்கிறது. நாயகனுக்கு உரிய கதையில் நாயகிக்கும் முக்கியத்துவம் கொடுத்திருக்கிறார்கள். வில்லன்களில் சுன்கி பாண்டே, அருண் விஜய் இருவருக்கு மட்டுமே அதிக வாய்ப்பு. ஹேக்கர் ஆக இருந்து பிரபாஸுக்கு உதவும் கதாபாத்திரத்தில் முரளி ஷர்மா.

இசை, மற்றவை

சங்கர் எஷான் லாய், தனிஷ்க் பாக்சி, குரு ரந்தவா, பாட்ஷா என ஆறு பேர் பாடல்களுக்கு இசையமைத்திருக்கிறார்கள். ஜிப்ரான் பின்னணி இசையமைத்திருக்கிறார்.

ஒளிப்பதிவாளர் மதி, ஆக்ஷன் இயக்குனர்கள் கென்னி பேட்ஸ், பெங் ஷான்ங், பாப் பிரௌன், ஸ்டன்ட் சில்வா, ராம் லட்சுமண், திலீப் சுப்பராயன் ஆகியோர் சண்டைக் காட்சிகளை அமைத்திருக்கிறார்கள். இவர்கள்தான் இந்தப் படத்தைக் காப்பாற்றுபவர்கள்.

+

ஒளிப்பதிவு, சண்டைக் காட்சிகள், விஷுவல் எபெக்ட்ஸ், படத்தின் பிரம்மாண்டம்.

அழுத்தமான கதை இல்லை, எமோஷனலான காட்சிகள் இல்லை, ஆரம்பத்தில் வரும் நீளமான சண்டைக் காட்சி.

Continue Reading
Advertisement

Tamil Movies Database

Trending

error: