Connect with us

Movie Reviews

எல்கேஜி – விமர்சனம்

Published

on

lkg-movie-review

அரசியல் படம் என்றால் அதில் மக்களுக்கு பல விஷயங்களைப் புரிய வைக்கும் விதத்தில் கருத்துள்ள படமாக எடுக்க வேண்டும். இந்தப் படத்தைப் பொறுத்தவரையில் நல்ல வேட்பாளர்களுக்கு வாக்களியுங்கள் என்று கிளைமாக்சில் சொல்வது மட்டும்தான் கருத்து.

மற்றபடி படத்தின் ஆரம்பம் முதல் கடைசி வரை வெறும் கிண்டல், கேலி ஆகியவற்றுடன் மட்டுமே படம் நகர்கிறது.

துண்டு துண்டாக காட்சிகளை வைத்துள்ளதால் இது என்ன மாதிரியான படம் என புரிந்து கொள்வதற்கே குழப்பமாக இருக்கிறது. திடீரென நகைச்சுவையாக நகர்கிறது, திடீரென சீரியசாக நகர்கிறது, திடீரென காதலை நோக்கி நகர்கிறது. இலக்கில்லாமல் பயணிக்கும் திரைக்கதைதான் படத்தின் பலவீனம். அதை முடிந்தவரையில் சில சமகால அரசியல் கிண்டல் வசனங்களை வைத்து சமாளித்துள்ளார்கள்.

லால்குடியில் ஆளும் கட்சியின் வார்டு கவுன்சிலராக இருப்பவர் பாலாஜி. அவருக்கு அப்பா நாஞ்சில் சம்பத்தைப் போல பிழைக்கத் தெரியாத அரசியல்வாதியாக இருக்கக் கூடாது என்பது கொள்கை. அப்பாவை அதிகம் வெறுப்பவர். அவர் வசிக்கும் தொகுதி எம்எல்ஏவாக இருக்கும் முதல்வர் இறந்து போவதால் அங்கு இடைத் தேர்தல் வருகிறது. ஒரு அரசியல் ஸ்டன்ட் செய்து அங்கு எம்எல்ஏ சீட் வாங்கி விடுகிறார் பாலாஜி. ஆனால், அங்கு சீட் கிடைக்காததால் அதே கட்சியைச் சேர்ந்த ஜேகே ரித்தீஷ், பாலாஜியை எதிர்த்து போட்டியிட்டு வெற்றி பெற்றே தீருவேன் என கட்சித் தலைவரிடம் சவால் விடுகிறார். அதில் யார் வெற்றி பெறுகிறார்கள் என்பதுதான் கிளைமாக்ஸ்.

மூச்சு விடாமல் பேசுவதும் நகைச்சுவை என நினைத்துக் கொண்டிருக்கிறார் பாலாஜி. படத்தின் திரைக்கதை போலவே காட்சிக்குக் காட்சி அவருடைய கதாபாத்திரம் மாறிக் கொண்டே இருக்கிறது. திடீரென நகைச்சுவை நடிகராகிறார். திடீரென சீரியசான நாயகனாகிறார். சமீப காலங்களில் நடந்த தமிழ்நாட்டு அரசியல் நிகழ்வுகளை அநியாயத்திற்குக் கிண்டலடிக்கிறார். ஒரு படம் இப்படி செய்துவிடலாம். ஆனால், தொடர்ந்து நாயகனாக நடிக்க வேண்டும் என்றால் வெவ்வேறு விதமாக யோசிக்க வேண்டும்.

வழக்கமான கதாநாயகி கதாபாத்திரம் பிரியா ஆனந்திற்கு இல்லை என்பது மிகப் பெரும் ஆறுதல். பணம் கொடுத்தால் யாருக்கு வேண்டுமானாலும் வேலை செய்வோம் என்ற கார்ப்பரேட் கம்பெனியின் நிர்வாகி. அரசியல்வாதிகளுக்கும், அரசியல் கட்சிகளுக்கும் எதைச் செய்ய வேண்டும், செய்யக் கூடாது என்று ஆலோசனை சொல்லும் கம்பெனியில்தான் அவர் வேலை பார்க்கிறார். பாலாஜியும்  இவரும் காதலித்து விடுவார்களோ என எதிர்பார்த்தால் காதலை விட அரசியல்தான் முக்கியம் என்று சொல்லிவிடுகிறார்கள். அதனால், படத்தில் டூயட்டுகளுக்கும் வேலை இல்லை.

கதை, திரைக்கதை, வசனத்தை பாலாஜியே எழுதியிருப்பதால், அவருடைய கதாபாத்திர இமேஜை காப்பாற்றிக் கொள்வதில் கவனமாக இருந்திருக்கிறார். ஆனால், மற்ற கதாபாத்திரங்களில் பிரியா ஆனந்த் கதாபாத்திரத்தைத் தவிர அனைத்து கதாபாத்திரங்களையும் கொஞ்சம் கேவலமான எண்ணம் கொண்டவர்களாகவே சித்தரித்திருக்கிறார். அவர்களுக்கெல்லாம் கதாபாத்திரங்களாக சரியான இமேஜ் கிடைத்துவிடக் கூடாது என்பதைப் பார்த்துப் பார்த்து செய்திருக்கிறார்கள்.

தமிழ்நாட்டு அரசியலில் மேடைப் பேச்சில் வல்லவரான நாஞ்சில் சம்பத் கதாபாத்திரத்தை இப்படி மோமசமாக உருவாக்கியிருக்கக் கூடாது. அவர் பேசுவது, அடிக்கடி திருக்குறள் சொல்வது ஆகியவற்றைக் கிண்டலடித்திருக்கிறார்கள். ஜேகே ரித்தீஷ் கதாபாத்திரப் பெயரை ராமராஜ் பாண்டியன் என வைத்து முதல் காட்சியிலேயே அவருடைய இமேஜைக் காலி செய்து ஜோக்கர் ஆக்கியிருக்கிறார்கள். முதல்வர் ராம்குமார் கதாபாத்திரம் கூட சிறுபிள்ளைத்தனமாக உள்ளது.

லியோன் ஜேம்ஸ் இசையில் பழைய பாடலான ‘எத்தனை காலம்தான் ஏமாற்றுவார்’ பாடல் மட்டும் கணீரென்று ஒலிக்கிறது.

‘அமைதிப்படை’ போன்ற அரசியல் படங்களை இன்று வரை கொண்டாடும் நமக்கு ‘எல்கேஜி’ படத்தையெல்லாம் அரசியல் படம் என்றே சொல்ல வராது. இது ஒரு ஸ்பூப் காமெடிப் படம் அவ்வளவுதான்.

எல்கேஜி – கத்துக்குட்டி

Movie Reviews

கடாரம்கொண்டான் – விமர்சனம்

4 Tamil Cinema – Rating – 3/5

Published

on

By

கடாரம்கொண்டான் விமர்சனம் - 4 Tamil Cinema

கதை

விக்ரம் மலேசியாவில் ஒரு டபுள் ஏஜன்ட் ஆக இருக்கிறார். காவல்துறையிலும் வேலையில் இருந்தவர். ஒரு நாள் இரவில் விபத்தில் சிக்கி நினைவிழந்து மருத்துவமனையில் அனுமதிக்கப்படுகிறார். யார் என்று தெரியாத அவருக்கு போலீஸ் காவல் வைக்கப்படுகிறது. அந்த மருத்துவமனையில் டாக்டராக இருக்கும் அபிஹாசனின் மனைவி அக்ஷராவை கடத்தி வைத்துக் கொண்ட அபியிடம், விக்ரமை மருத்துவமனையை விட்டு வெளியில் அழைத்து வரச் சொல்கிறார்கள். அதன்படி போலீசை ஏமாற்றி விக்ரமை வெளியில் அழைத்து வருகிறார் அபிஹாசன். அதன் பின் நடக்கும் தொடர் மர்மமான சம்பவங்கள், மனைவி அக்ஷராவை அபி மீட்டாரா இல்லையா என்பதுதான் படத்தின் கதை.

நடிப்பு

நரைத்த தலை முடி, தாடி என வித்தியாசமான தோற்றத்தில் கேகே என அழைக்கப்படும் விக்ரம். அவர் யார் என்ன செய்கிறார் என்பதைப் புரிந்து கொள்ளவே நமக்குக் கொஞ்ச நேரம் ஆகிறது. ஆனாலும், வழக்கம் போல் விக்ரம் அவருடைய கதாபாத்திரத்தில் அசத்தலாக நடித்திருக்கிறார். சின்னச் சின்ன நுணுக்கங்களிலும் கவர்கிறார். வசனங்களை விட பார்வையாலேயே பல காட்சிகளில் ஸ்கோர் செய்கிறார்.

அறிமுக நாயகன் அபிஹாசன் தனக்குக் கிடைத்த வாய்ப்பை சரியாகப் பயன்படுத்திக் கொண்டிருக்கிறார். அவரது நடிப்பிலும் யதார்த்தம் தெரிகிறது. அக்ஷரா ஹாசன் கர்ப்பிணிப் பெண்ணாக நடித்திருக்கிறார். படம் முழுவதுமே வயிற்றிலேயே கை வைத்துக் கொண்டிருக்கிறார். கொஞ்சம் காதல், அதிக பயம் என சில காட்சிகளே வருகிறார்.

இசை, மற்றவை

ஜிப்ரான் பின்னணி இசை, ஸ்ரீனிவாஸ் படத் தொகுப்பு இரண்டுமே வேற லெவல். பார்க்க ஹாலிவுட் சினிமா போல இருக்க வேண்டும் என நினைத்து உழைத்திருப்பார்கள் போலிருக்கிறது.

 

படத்தின் மேக்கிங் சிறப்பு. மலேசியாதான் படத்தின் முழு கதைக்களம். சேஸிங் காட்சிகள், ஆக்ஷன் காட்சிகள், அதிகாரப் பகிர்வில் நடக்கும் சண்டை என பார்த்திருக்காத கதைக்களம்.

 

விக்ரமிற்கு இன்னும் அதிகமான ஆக்ஷன் காட்சிகளைக் கொடுத்திருக்கலாம். கதை சொல்லலில் குழப்பம் இருக்கிறது. விக்ரம் கதாபாத்திரம் யார் என்பதை போலீசார் விசாரிக்கும் போதே இன்னும் தெளிவாகச் சொல்லியிருக்கலாம். படம் முடிந்த பின்னும் எதையோ சொல்லாமல் விட்டுவிட்டார்களோ என்றே யோசிக்க வைக்கிறது.

 

Continue Reading

Movie Reviews

ஆடை – விமர்சனம்

4 Tamil Cinema – Rating – 3.25/5

Published

on

By

கதை

டிவி ஒன்றில் அப்பாவி மக்களை ஏமாற்றும் ‘பிரான்க்’  நிகழ்ச்சி ஒன்றை நடத்துபவர் அமலா பால். பெண்கள் எப்படி வேண்டுமானாலும் இருக்கலாம் என நினைப்பவர். அவரை அடக்கி ஆள்வது அவருக்குப் பிடிக்காது. ‘பெட்’ கட்டி எதையும் துணிச்சலாகச் செய்யும் குணம் கொண்டவர். அவருடைய பிறந்த நாளன்று உடன் வேலை பார்க்கும் நண்பர்களுடன் ஆடை இல்லாமல் தனியாக, காலி செய்யப்பட்ட அவர்களது அலுவலகக் கட்டிடத்தில் இருக்கிறேன் என சவால் விடுகிறார். குடி போதையில் அதையும் செய்கிறார். விடிந்து பார்த்தால் உடன் குடித்த நண்பர்கள் யாரும் இல்லை. அவர் மட்டும் தனியாக அந்த அலுவலகத்தினுள் இருக்கிறார். யாரையும் அவரால் தொடர்பு கொள்ள முடியவில்லை. அவர் அந்த இடத்தை விட்டு எப்படி வெளியில் வந்தார் என்பதுதான் படத்தின் மீதிக் கதை.

நடிப்பு

படம் முழுவதுமே அமலா பாலைச் சுற்றியே நகர்கிறது. அதற்கேற்றபடி காமினி கதாபாத்திரத்தில் பெமினிஸசம் பேசும் பெண்ணாக அசால்ட்டாக நடித்திருக்கிறார் அமலா பால். தமிழ் சினிமாவில், ஏன் உலக சினிமாவில் கூட ஒரு மணி நேரத்திற்கு ஆடையில்லாமல் ஒரு நாயகி இதற்கு முன் நடித்திருக்கிறாரா என்பது சந்தேகம்தான். ஒரு காட்சியில் கூட ஆடையில்லாத அந்த தோற்றம் ஆபாசமாகக் காட்டப்படவில்லை. அமலா பால் தவிர விவேக் பிரசன்னா, ரம்யா, அமலா பாலைக் காதலிப்பதாகச் சொல்லும் அந்த நபர் கவனம் பெறுகிறார்கள்.

இசை, மற்றவை

பிரதீப்குமார், ஊறுகா பின்னணி இசை காட்சிகளுக்குத் தக்கபடி உள்ளன. ஒளிப்பதிவாளர் விஜய் கார்த்திக் கண்ணன் உழைப்பு பாராட்டுக்குரியது. ஒரு மணி நேரத்திற்கு ஆடையில்லாத அமலா பாலை எந்தக் கோணத்திலும் ஆபாசமாக இருக்கும்படி காட்டக் கூடாது என்பதில் மிகவும் கவனமாக இருந்திருக்கிறார்.

 

இதுவரை பார்த்திருக்காத புது கதை. டிவி, யு டியூப்களில் மற்றவர்களை கிண்டல், கேலி செய்து ‘பிரான்க்’ ஷோவால் ஏற்படும் பாதிப்புகளை மிகச் சரியாகக் காட்டியிருக்கிறார் இயக்குனர். படத்தில் உள்ள வசனங்கள் பல இடங்களில் கைத்தட்டலைப் பெறுகின்றன.

 

இடைவேளைக்குப் பின் அமலா பால் அந்த காலியான பில்டிங்கில் சுற்றிச் சுற்றி வரும் காட்சிகளின் நீளம் அதிகமாக உள்ளது. கிளைமாக்சில் திடீரென ஒரு புது கதாபாத்திரத்தை நுழைத்து அட்வைஸ் செய்திருப்பது சற்றே இடிக்கிறது. ஆனால், அந்த அட்வைஸ் முழுவதும் தேவையான ஒன்று என்பதும் குறிப்பிட வேண்டிய ஒன்று.

Continue Reading

Movie Reviews

கொரில்லா – விமர்சனம்

4 Tamil Cinema – Rating 3/5

Published

on

By

தயாரிப்பு – ஆல் இன் பிக்சர்ஸ்
இயக்கம் – டான் சாண்டி
இசை – சாம் சி.எஸ்.
நடிப்பு – ஜீவா, ஷாலினி பாண்டே, யோகி பாபு, சதீஷ், விவேக் பிரசன்னா, ராதாரவி மற்றும் பலர்

கதை

ஜீவா, ஒரு ஏமாற்றுக்காரர். காலையில் பஸ்ஸில் பணத்தை அடிப்பது, அடுத்து மருந்துக் கடையில் வேலை செய்து பணம் அடிப்பது, இரவில் போலி மருத்துவராக பணம் சம்பாதிப்பது என இருக்கிறார். அவருக்கு வேலையை இழந்த சதீஷ், சினிமாவில் நடிக்கத் துடிக்கும் விவேக் பிரசன்னா ஆகியோர் நண்பர்களாக இருக்கிறார்கள். அவர்களுக்குத் தேவை பணம். அதை வங்கியில் கொள்ளையடித்து எடுக்க நினைக்கிறார்கள். அவர்களுடன் பக்கத்து அறையில் இருக்கும் ஒருவரும் சேர்ந்து கொள்கிறார். வங்கி ஒன்றிற்கு கொள்ளை அடிக்கச் சென்று அங்குள்ளவர்களை பணயக் கைதிகளாக பிடித்து வைத்து அரசாங்கத்திடம் 20 கோடி பணம், விவசாயக் கடன் தள்ளுபடி என கோரிக்கை வைக்கிறார்கள். அவர்கள் கேட்டது நடந்ததா இல்லையா என்பதுதான் படத்தின் மீதிக் கதை.

நடிப்பு

லோக்கலாக பேசிக் கொண்டு நடிப்பது ஜீவாவுக்கு கை வந்த கலை. அதை இந்தப் படத்திலும் இயல்பாக செய்திருக்கிறார். சதீஷ், விவேக் பிரசன்னா ஆகியோர் சிரிக்க வைப்பதை விட, சில காட்சிகளில் மட்டும் வரும் யோகி பாபு அதைச் செய்து விடுகிறார். ஜீவாவின் காதலியாக ஷாலினி பாண்டே. அதிக வேலையில்லை. காவல் துறை அதிகாரியாக ராதாரவி, வழக்கம் போல் அவருடைய அனுபவம் பேசுகிறது.

இசை, மற்றவை

இசை உள்ளிட்ட டெக்னிக்கல் விஷயங்கள் படத்திற்கு பலத்தைக் கொடுக்கவில்லை. சிம்பன்சி காங்கிற்கு டிரைனிங் கொடுத்த டிரைனரை மட்டும் பாராட்டியே ஆக வேண்டும்.

 

படத்தில் பல லாஜிக் மீறல்கள் இருந்தாலும் நகைச்சுவைப் படத்தில் அதையெல்லாம் கவனிக்க மாட்டார்கள் என இயக்குனர் நினைத்திருப்பார் போலிருக்கிறது. விவசாயக் கடன்களை தள்ளுபடி செய்யப் போராடுவதற்காக  இயக்குனரைப் பாராட்டலாம். குழந்தைகளுக்குப் பிடிக்கும் விதத்தில் படத்தை உருவாக்கியிருக்கிறார்கள்.

 

‘கொரில்லா’ எனப் பெயர் வைத்துவிட்டு அதைச் சுற்றி கதை நகராமல் வங்கிக் கொள்ளை, விவசாயக் கடன் என எங்கெங்கோ நகர்கிறது. சிம்பன்சி காங்-கிற்கு இன்னும் கூடுதல் முக்கியத்துவம் கொடுத்திருக்கலாம்.

Continue Reading
Advertisement

Tamil Movies Database

Trending

error: Content is protected !!