Connect with us

Trending

மகளிர் மட்டும் விமர்சனம்

Published

on

magalir-mattum-review

தமிழ் சினிமாவில் நாயகிகளுக்கு முக்கியத்துவம் தரும் படங்கள் வருடத்திற்கு ஒன்றிரண்டு வந்தால் பெரிது. நாயகர்களைச் சுற்றியேதான் திரைப்பட உலகமும் பெரும்பாலும் நகர்ந்து கொண்டிருக்கிறது.

எப்போதாவது ஒரு முறைதான் நாயகர்கள் இல்லாமல் நாயகிகள் மட்டுமே கோலோச்சும் படங்கள் வருகின்றன. நீண்ட இடைவெளிக்குப் பிறகு நடிக்க வந்த ஜோதிகா, ‘36 வயதினிலே’ என்ற மலையாளப் பட ரீமேக்கில்தான் நடித்தார். மீண்டும் அந்தத் தவறைச் செய்யாமல் இந்த ‘மகளிர் மட்டும்’ படத்தில் ஒரு நேரடிக் கதையில் நடித்திருக்கிறார்.

கமல்ஹாசன் தயாரித்து 23 வருடங்களுக்கு முன்னால் வெளிவந்த ‘மகளிர் மட்டும்’ படத்திற்கும் இந்தப் படத்திற்கும் உள்ள ஒரே ஒற்றுமை இரண்டு படங்களிலும் நாசர், ஊர்வசி நடித்திருக்கிறார்கள் என்பதுதான்.

இயக்குனர் பிரம்மா இன்றைய காலகட்டத்திற்கேற்ப ஒரு புதுமையான கதையை எழுதியதற்காகத் தனியாகப் பாராட்டலாம். அதையும் கலகலப்பாக சுவாரசியமாக நகர்த்தியிருக்கிறார்.

தொலைக்காட்சிகளுக்கு டாகுமென்டரி படங்களை எடுத்துத் தருபவர் ஜோதிகா. காதலன் வெளிநாடு போய்விட்டதால் அவருடைய வருங்கால மாமியார் ஊர்வசி வீட்டிற்கே வந்து தங்குகிறார். ஒரு சந்தர்ப்பத்தில் ஊர்வசியின் 39 வருடத்திற்கு முந்தைய பள்ளிப் பருவ விஷயங்களைக் கேட்டுத் தெரிந்து கொள்கிறார். ஊர்வசியின் நெருங்கிய தோழிகளான சரண்யா, பானுப்ரியா ஆகிய இருவரையும் தேடிக் கண்டுபிடித்து சந்திக்க வைக்க முயற்சிக்கிறார். ஊர்வசிக்காக ஒரு ஃபேஸ்புக் கணக்கை ஆரம்பித்து, அதன் மூலம் சரண்யா, பானுப்ரியாவைக் கண்டுபிடிக்கிறார். அவர்களுடைய தற்போதைய வாழ்க்கையிலிருந்து அவர்களை விடுவிடுத்து மூன்று நாட்கள் மகிழ்ச்சியாக இருக்க அவர்களை அழைத்துக் கொண்டு கிளம்புகிறார். அந்தப் பயணங்களும், அதன் சுவாரசியங்களும், திருப்பங்களும்தான் ‘மகளிர் மட்டும்’.

ஜோதிகாவிற்காக கதையை எழுதினார்களா அல்லது எழுதிய கதையில் ஜோதிகா அவ்வளவு பொருத்தமாக நடித்திருக்கிறாரா என்பது ஆச்சரியமாக உள்ளது. கதாநாயகியாக நடித்த போது எவ்வளவு சுறுசுறுப்பாக இருந்தாரோ அதே போல இப்போதும் இருக்கிறார். இந்தக் கதாபாத்திரத்தில் ஜோதிகாவைத் தவிர வேறு யாரும் அவ்வளவு சிறப்பாக நடித்திருக்க முடியாது என்பது பழைய வாக்கியம்தான் என்றாலும், அதுதான் உண்மையும் கூட. சொந்தக் குரலில் அவரது பேச்சைக் கேட்பது அந்தக் கதாபாத்திரத்திற்கு மேலும் வலு சேர்க்கிறது.

ஊர்வசி, பானுப்ரியா, சரண்யா ஆகிய மூவரில் அசால்ட்டாக ஸ்கோர் செய்பவர் ஊர்வசி மட்டுமே. பானுப்ரியாவைப் பார்த்தால் பாவமாக இருக்கிறது. சரண்யா வழக்கம் போலவே யதார்த்தமாக நடித்து அசத்தியிருக்கிறார்.

பானுப்ரியாவின் மகனாக பாவல், வட நாட்டில் செட்டில் ஆன இளைஞர் கதாபாத்திரத்தைக் கண்முன் நிறுத்துகிறார். யதார்த்தமாக நடிக்கிறேன் என நாசர், மூக்கை நோண்டிக் கொண்டு நடிப்பதெல்லாம் பார்க்க சகிக்கவில்லை. சரண்யாவின் கணவராக லிவிங்ஸ்டன், அவர் தண்ணி அடிக்கும் ஸ்டைலுக்கு அப்படி ஒரு கைதட்டல். எதிர்பாராத கேமியோ கதாபாத்திரத்தில் மாதவன்.

ஊர்வசிக்கு புதிதாக ஃபேஸ்புக் கணக்கு ஆரம்பித்துக் கொடுக்கிறார் ஜோதிகா. ஊர்வசிக்கு முன்னதாகவே பானுப்ரியா, சரண்யா ஃபேஸ்புக் கணக்கு வைத்திருக்கிறார்கள். ஆக்ராவில் கட்டுப்பாடுள்ள குடும்பத்தில் இருக்கிறார் பானுப்ரியா, அப்படியிருக்க அவருக்கு ஏற்கெனவே ஃபேஸ்புக் கணக்கு இருப்பதெல்லாம் ரொம்ப ஓவர். ஃபேஸ்புக் இல்லாமல் வேறு வழியில் தோழிகள் மூவரையும் மீண்டும் சந்திக்க வைத்திருந்தால் இன்னும் யதார்த்தமாக இருந்திருக்கும்.

இடைவேளை வரை திரைக்கதை சற்றே தடுமாறுகிறது, தோழிகள் மூவரும் கிளம்பிய பிறகுதான் வேகமெடுத்து பயணிக்கிறது.

ஜிப்ரான் இசையமைப்பில் ‘அடி வாடி திமிரா..’ பாடல் மட்டும் ரசிக்க வைக்கிறது. பின்னணி இசை ஓகே ரகம்தான்.

படம் பார்த்துவிட்டு வெளியில் வரும் நடுத்தர வயதுக்காரர்கள் மீண்டும் அவர்களது பள்ளித் தோழர்கள், தோழிகளைத் தேட வேண்டும் என்று நினைத்தால் அது படத்திற்குக் கிடைத்த வெற்றி.

Trending

யு டியூப் பாடல் வரிகள் வீடியோவில் ‘சொடக்கு’ நம்பர் 1

Published

on

By

tsk-sodakku

யு டியூப் வந்த பிறகு, அதில் பலரும் அவர்களது படங்களின் வீடியோக்களைச் சேர்த்து அவரவர் படங்களை விளம்பரப்படுத்திக் கொண்டிருக்கிறார்கள்.

யார் டீசர், டிரைலர், பாடல்கள் அதிகப் பார்வைகளைப் பெறும் என்பதிலும் போட்டி நிலவி வருகிறது.

டீசர், டிரைலரில் இருந்த அந்த போட்டி இப்போது பாடல்களுக்கும் தொற்றிக் கொண்டது. ஒரு படம் வெளிவருவதற்கு முன்பாக அந்தப் படத்தின் பாடல்களை லிரிக் வீடியோவாக, அதாவது பாடல் வரிகள் என்னவென்று தெரிந்து கொள்ளும் விதத்தில் புகைப்படங்கள் அடங்கிய வீடியோ வெளியிடுவது சமீபத்திய டிரென்ட்.

அதில் இதுவரை ‘மெர்சல்’ படத்தில் இடம் பெற்ற ‘ஆளப் போறான் தமிழன்’… பாடலின் லிரிக் வீடியோதான் அதிகப் பார்வைகளைப் பெற்று முதலிடத்தில் இருந்தது. அந்த சாதனையை தற்போது ‘தானா சேர்ந்த கூட்டம்’ படத்தில் இடம் பெற்ற ‘சொடக்கு மேல…’ பாடல் முறியடித்துள்ளது.

‘சொடக்கு…’ பாடல் இதுவரை 4,15,62,752 பார்வைகளையும், ‘ஆளப் போறான்…’ பாடல் இதுவரை 4,15,32,688 பார்வைகளையும் பெற்றுள்ளது. இருந்தாலும் லைக் விஷயத்தில் ஆளப் போறான் பாடலை சொடக்கு பாடலால் மிஞ்ச முடியவில்லை.

சொடக்கு லிரிக் வீடியோ

ஆளப் போறான் தமிழன் லிரிக் வீடியோ

Continue Reading

Trending

ஸ்டெர்லைட் போராட்டம், சுத்தமில்லாத நீரைக் குடித்த சரத்குமார்

Published

on

By

sarathkumar-sterlite

தூத்துக்குடியில் அமைந்துள்ள ஸ்டெர்லைட் ஆலைக்கு எதிரான போராட்டம் இன்று 48வது நாளை எட்டியுள்ளது. இந்த போராட்டத்திற்கு ஆதரவாக பலரும் களத்தில் குதித்து மக்களுக்கு ஆதரவு தெரிவித்து வருகின்றனர்.

சமத்துவ மக்கள் கட்சியின் தலைவரும், நடிகருமான சரத்குமார் இன்று நடைபெற்ற போராட்டத்தில் கலந்து கொண்டு மக்களுக்கு அவருடைய ஆதரவைத் தெரிவித்தார்.

மேலும் போராட்டக்களத்தில் குமரெட்டியாபுரம் மக்கள் பயன்படுத்தும் மாசு கலந்த நீரை அருந்தி அவருடைய ஆதங்கத்தை வெளிப்படுத்தினார்.

பல ஆண்டுகளாக நடைபெற்று வரும் ஸ்டெர்லைட் ஆலைக்கெதிரான போராட்டத்தில் குழந்தைகள், சிறுவர்கள், சிறுமியர்கள், பெண்கள் என மக்கள் குடும்பம், குடும்பமாய் ஈடுபட்டு வருகிறார்கள்.

அந்தப் பகுதியில் நிலம், நீர், காற்று ஆகியவை மாசுபட்டு வருவதாக மக்கள் போராடி வருவது குறிப்பிடத்தக்கது.

Continue Reading

Trending

இங்கிலாந்து நாட்டில் விருது வென்ற ‘மெர்சல்’

Published

on

By

mersal-records-and-awards

இங்கிலாந்து நாட்டில் நடைபெறும் தேசிய திரைப்பட அகாடமி வழங்கும் 2018ம் ஆண்டு விருதுக்கான போட்டியில் சிறந்த அயல்நாட்டுப் படத்துக்கான விருதை ‘மெர்சல்’ படம் வென்றுள்ளது.

சிறந்த வெளிநாட்டுப் படங்களுக்கான போட்டியில் ‘மெர்சல்’ படத்துடன் பிரான்ஸ், ரஷ்யா, ஜெர்மனி, ஸ்வீடன், சிலி, தென்னாப்பிரிக்கா, லெபனான ஆகிய நாடுகளின் படங்களும் போட்டியில் இருந்தன. அவற்றிலிருந்து ‘மெர்சல்’ படம் தேர்வாகியுள்ளது.

சிறந்த துணை நடிகர் விருதுக்காக விஜய்யும் போட்டியில் இருந்தார். ஆனால், அவர் விருதுக்கு தேர்வாகவில்லை.

போட்டியாளர்களில் சிறந்தவர்களைத் தேர்ந்தெடுப்பதற்கான ஆன்லைன் வாக்குப்பதிவு ஜனவரி 15 முதல் ஆரம்பமாகி 20ம் தேதி வரை நடைபெற்றது.

இந்த வருட ஆல்லைன் வாக்குப்பதிவில் 24 லட்சம் பேர் வாக்களித்துள்ளார்கள். மொத்தம் 18 பிரிவுகளுக்கான தேர்வு நடைபெற்றது.

4வது தேதிய திரைப்பட விருதுகளைப் பெற்றவர்களின் விவரம் நேற்றிரவு அறிவிக்கப்பட்டுள்ளது.

இங்கிலாந்து தேசிய திரைப்பட அகாடமி 1999ம் ஆண்டு அமைக்கப்பட்டது. திரையுலகத்தினருக்கான வளர்ச்சியில் அந்த அமைப்பு ஈடுபடுகிறது. பல திரைப்பட விழாக்கள், காட்சிகள், மாநாடுகள், பயிற்சி வகுப்புகள் ஆகியவற்றை இந்த அமைப்பு இங்கிலாந்து, பிரான்ஸ், ஜெர்மனி, அமெரிக்கா ஆகிய நாடுகளில் நடத்தி வருகிறது.

‘மெர்சல்’ படம் விருது பெற்றது தமிழ்த் திரையுலகத்திற்கும் பெருமையான ஒன்று.

தேனாண்டாள் ஸ்டுடியோஸ் தயாரிப்பில், அட்லீ இயக்கத்தில், ஏ.ஆர்.ரகுமான் இசையமைப்பில் விஜய், சமந்தா, காஜல் அகர்வால், நித்யா மேனன் மற்றும் பலர் நடித்த ‘மெர்சல்’ 2017 தீபாவளியை முன்னிட்டு வெளியானது.

Continue Reading
Advertisement

Tamil Movies Database

Trending

error: