Connect with us

Movie Reviews

பரியேறும் பெருமாள் – விமர்சனம்

Published

on

pariyerum-perumal-review

2018ம் ஆண்டில் சில அறிமுக இயக்குனர்களின் படங்கள் தமிழ் சினிமா மீதான நம்பிக்கையை அதிகம் விதைத்துள்ளது.

அந்த விதத்தில் இந்த ‘பரியேறும் பெருமாள்’ படத்தைத் தன் முதல் படமாகக் கொடுத்துள்ள இயக்குனர் மாரி செல்வராஜ் திரையுலக ரசிகர்களின் கவனத்தை நிச்சயம் ஈர்ப்பார்.

கதைக்களம், கதாபாத்திரங்கள், காட்சிகள், வசனங்கள் என அனைத்திலுமே யதார்த்தம் இழையோடுகிறது. ஒரு படத்தில் இடம் பெற்றுள்ள கதாபாத்திரங்களின் பெயர்கள் நம் மனதில் இடம் பிடிப்பதுதான் அந்தப் படத்தின் உண்மையான வெற்றி.

இந்தப் படத்தின் முதன்மைக் கதாபாத்திரங்களான பரியேறும் பெருமாள், ஜோ என்கிற ஜோதி மகாலட்சுமி ஆகிய இரண்டும் படம் பார்த்துவிட்டு வெளியில் வந்து பல மணி நேரமாகியும் நம் மனதில் அப்படியே உட்கார்ந்துவிடுகிறது.

கதாபாத்திரங்களுக்காகத்தான் நட்சத்திரத் தேர்வு இருக்க வேண்டும் என்பதை இந்தப் படம் அழுத்தமாக உணர்த்தியிருக்கிறது. முதன்மைக் கதாபாத்திரங்கள் முதல் ஊரில் உள்ள ஒருவர் என ஒரே காட்சியில் வருபவர் கூட எந்த சினிமாத்தனம் இல்லாமல் தேர்வு செய்து நடிக்க வைக்கப்பட்டிருக்கிறார்.

அதிலும், நாயகனின் அப்பா கதாபாத்திரம் இதுவரை தமிழ் சினிமாவில் வராத ஒன்று. அதற்காக தேர்வு செய்யப்பட்டு நடிக்க வைக்கப்பட்ட தங்கராஜ் அவருடைய நடிப்பில் மனதை கனக்கச் செய்துவிடுகிறார்.

நெல்லைச் சீமையின் புளியங்குளம் கிராமத்து இளைஞராகவே மாறிவிட்டார் கதிர். ஒரு பழைய லுங்கி, டீ சர்ட் என எளிமையான உடையுடன் அவருடைய கதாபாத்திரத்தை வலிமையாகச் செய்திருக்கிறார். உடல்மொழி, முகபாவம், வசன உச்சரிப்பு என பரியேறும் பெருமாள் கதாபாத்திரத்தில் அவருடைய நடிப்பு ஏற்றமாக அமைந்துள்ளது.

ஜோ என்கிற ஜோதிலட்சுமி ஆக ஆனந்தி. இப்படி ஒரு இயல்பான அழகுடன் ஆர்பாட்டம் இல்லாமல், ஆடம்பரம் இல்லாமல், அலட்டல் இல்லாமல் தமிழ் சினிமா கதாநாயகியின் கதாபாத்திரத்தைப் பார்ப்பதற்கு எவ்வளவு ஆனந்தமாக உள்ளது. கதிர் மீது இருப்பது என்ன என்பது குறித்து கண்ணை மூடிக் கொண்டு அவர் பேசும் காட்சியில் கண்கலங்காமல் இருக்க முடியாது.

சாதி, மதம், அந்தஸ்து பார்க்காமல் வருவதுதான்  நட்பு என்பதை யோகி பாபு கதாபாத்திரம் மூலம் உணர்த்தியிருக்கிறார் இயக்குனர்.

சாதி வெறி பிடித்த அப்பாவாக மாரிமுத்து, அண்ணனாக லிஜிஷ், ஆணவக் கொலை செய்யும் பெரியவர் கராத்தே வெங்கடேசன், கல்லூரி முதல்வர் பூ ராம், அப்பாவாக நடிக்க வரும் சண்முகராஜன் என மற்ற கதாபாத்திரங்கள் கூட மனதில் இடம் பிடிக்கின்றன.

சந்தோஷ் நாராயணனின் இசை, ஸ்ரீதரின் ஒளிப்பதிவு இந்த பெருமாளுக்கு சங்கு, சக்கரமாக அமைந்துள்ளன.

புளியங்குளம் கிராமத்திலிருந்து திருநெல்வேலி சட்டக் கல்லூரிக்கு சட்டம் படிக்கச் செல்லும் கதிர், சாதிய ஏற்றத் தாழ்வுகளால் அவமானப்படுத்தப்படுகிறார். அவர் மீது காதல் கொள்கிறார் வேற்று சாதியைச் சேர்ந்த ஆனந்தி. இந்தக் காதல் விவகாரத்தில் கதிரைக் கொல்லத் துடிக்கிறார்கள் ஆனந்தியின் அப்பாவும், அண்ணனும். அவர்களை எதிர்த்து தன் வழியிலேயே தான் யார் என்பதைப் புரிய வைக்கிறார் கதிர். இவ்வளவு நேர்மையான ஒரு காதல் கதை தமிழ் சினிமாவில் இதுவரை வந்திருக்குமா என்பதும் சந்தேகம்தான்.

படத் தயாரிப்பாளர் இயக்குனர் பா.ரஞ்சித் ஒரு தயாரிப்பாளராக, இயக்குனர் மாரி செல்வராஜை அறிமுகப்படுத்தி தமிழ் சினிமாவில் மேலும் பல புதிய யதார்த்த படைப்புகள் வருவதற்கு வழி செய்திருக்கிறார். தயாரிப்பாளரின் நம்பிக்கையை இயக்குனர் மாரியும் காப்பாற்றியிருக்கிறார். மாரியின் எண்ணத்திற்கு படத்தில் நடித்துள்ளவர்களும் நல்ல உருவம் கொடுத்திருக்கிறார்கள்.

சாதிக் கொடுமை பற்றிய ஒரு படத்தை அந்தந்த சாதிகளின் பெயரைச் சொல்லாமலேயே படம் பார்க்கும் ஒவ்வொரு ரசிகனுக்கும் அந்த தாக்கத்தை ஏற்படுத்தியிருக்கிறார்.

இன்னும் பல வருடங்களுக்கு இந்த ‘பரியேறும் பெருமாள்’ ஒரு ‘மேற்கோள்’ படமாக இருக்கும் என்பது நிச்சயம்.

பரியேறும் பெருமாள் – வெற்றி உலா

Movie Reviews

கொலைகாரன் – விமர்சனம்

4 Tamil Cinema Rating – 3.5/5

Published

on

By

கொலைகாரன் விமர்சனம் - 4 Tamil Cinema

ஒரு பரபரப்பான த்ரில்லர் படம்தான் ‘கொலைகாரன்’. ஒரு கொலை, அதைச் சுற்றி நடக்கும் மர்மமான விஷயங்கள், யார் கொலைகாரன் என கண்டுபிடிக்கப் போராடும் போலீஸ் அதிகாரி…எதிர்பார்க்க முடியாத கிளைமாக்ஸ் என அடுத்து என்ன நடக்கப் போகிறது என நம்மால் யூகிக்க முடியாத அளவிற்கு படத்தைக் கொடுத்திருக்கிறார் இயக்குனர் ஆண்ட்ரூ லூயிஸ்.

படத்தின் மிகப் பெரும் பிளஸ் பாயின்டாக இருப்பது கதாபாத்திர வடிவமைப்பு மற்றும் அதற்கான பொருத்தமான நட்சத்திரத் தேர்வு மற்றும் அவர்களின் அலட்டல் இல்லாத இயல்பான நடிப்பு.

கட்டுமானக் கம்பெனி ஒன்றில் வேலை செய்பவர் விஜய் ஆண்டனி. அவரது எதிர் பிளாட்டில் அம்மா சீதா, மகள் அஷிமா நர்வால் குடியிருக்கிறார்கள். சென்னை, வியாசர்பாடி பகுதியில் அடையாளம் தெரியாத அளவிற்கு ஒரு கொலை செய்யப்பட்டுக் கிடக்கிறார். அந்த வழக்கை டிசிபி அர்ஜுன் விசாரிக்க ஆரம்பிக்கிறார். இறந்தவர் ஆந்திர மந்திரி ஒருவரின் தம்பி எனத் தெரிய வருகிறது. அஷிமா நர்வால் ஹைதராபாத்தில் இருக்கும் போது அவருக்கு டார்ச்சர் செய்தவர்தான் அந்த மந்திரியின் தம்பி. அதனாலேயே அஷிமா அம்மா சீதாவுடன் சென்னைக்கு வந்திருக்கிறார். அஷிமா, சீதா இந்தக் கொலையில் சம்பந்தப்பட்டிருப்பார்களா என்ற கோணத்தில் விசாரிக்க ஆரம்பிக்கிறார் அர்ஜுன். ஆனால், விஜய் ஆண்டனி அந்தக் கொலையை தான் தான் செய்ததாக போலீசில் சரணடைகிறார். இதன் பின்ன என்ன நடக்கிறது என்பதுதான் படத்தின் மீதிக் கதை.

ஒரு போலீஸ் அதிகாரி இப்படித்தான் விசாரணையை நடத்துவாரோ என்று நம்பும் அளவிற்கு அவ்வளவு இயல்பான நடிப்பை வெளிப்படுத்தியிருக்கிறார் அர்ஜுன். இவரும் விஜய் ஆண்டனியும் சந்தித்துக் கொள்ளும் காட்சிகள் அவ்வளவு அழுத்தமாக அமைந்துள்ளன. அதிலும் விஜய் ஆண்டனி வேலை செய்யும் இடத்திற்குச் சென்று அர்ஜுன் பேசும் காட்சியில், அர்ஜுன் அவரது போலீஸ் அதிகாரத்தைக் காட்ட, அதற்கு அலட்சியமாக விஜய் ஆண்டனி பதிலளித்து அந்த இடத்தை விட்டுச் செல்லும் காட்சி, அதில் அவர்கள் இருவரின் நடிப்பு சிம்ப்ளி சூப்பர்ப். ஒவ்வொரு கட்டத்திலும் தான் தோற்றுப் போய்விடக் கூடாது, உண்மைக் குற்றவாளியைக் கண்டுபிடிக்க வேண்டும் என்ற அர்ஜுனின் கடமை உணர்வு நடிப்புக்கு ஒரு சல்யூட்.

விஜய் ஆண்டனி யார், அவர் ஏன் இப்படி நடந்து கொள்கிறார், அவருடைய பின்னணி என்ன என ஆரம்பம் முதலே அவர் கதாபாத்திரம் மீது நமக்கும் ஒரு தெளிவான குழப்பம் வருவது போன்ற பாத்திரப் படைப்பு, அதை உணர்ந்து நடிக்கும் விஜய் ஆண்டனி, இவையெல்லாம் படத்திற்கு பக்கபலம். இப்படிப்பட்ட கதாபாத்திரங்கள் என்றால் விஜய் ஆண்டனிக்கு சொல்லவா வேண்டும். அந்த வெறித்த பார்வையிலும், தெனாவெட்டான பேச்சிலும் அவர் கதாபாத்திரத்தை மிகச் சரியாக நியாயப்படுத்துகிறார்.

அஷிமா நர்வால், தமிழில் முதல் படம். பொதுவாக ஹீரோயின்களுக்கு படங்களில் நடிப்பை வெளிப்படுத்த வாய்ப்புகள் கிடைப்பது அரிது. அதிலும், முதல் படத்தில் பாடல்களுக்கு மட்டுமே பயன்படுத்துவார்கள். ஆனால், இந்தப் படத்தில் அஷிமாவுக்கும் ஒரு அழுத்தமான கதாபாத்திரம். தவறு செய்துவிட்டு, அந்தத் தவறைச் செய்யாத மாதிரி நடிக்க வேண்டிய கதாபாத்திரம். தமிழ் தெரியாமல் கதாபாத்திரத் தன்மையை உணர்ந்து நடித்திருக்கிறார்.

சீதா, நாசர், பகவதி பெருமாள் என மற்ற கதாபாத்திரங்களில் நடித்திருக்கும் நடிகர்கள் கூட எந்த ஒரு இடத்திலும் மிகைத்தனமான நடிப்பை வெளிப்படுத்தாமல், அந்தந்த கதாபாத்திரங்களில் அளவுடன், இயல்புடன் நடித்திருக்கிறார்கள்.

இம்மாதிரியான சஸ்பென்ஸ் த்ரில்லர் படங்களில் பின்னணி இசைக்கு மிகப் பெரும் பங்கு இருக்கும். அதை மிகச் சரியாக உணர்ந்து படத்தை தன் பின்னணி இசையாமல் மேலும் பேச வைத்திருக்கிறார் சைமன் கே கிங். அதிலும் அந்த தீம் மியூசிக் அப்படியே உள்ளுக்குள் இறங்குகிறது. ஒளிப்பதிவாளர் முகேஷ், படத் தொகுப்பாளர் ரிச்சர்ட் கெவின், சண்டைப் பயிற்சியாளர் திலீப் சுப்பராயன் டெக்னிக்கலாக அசத்தியிருக்கிறார்கள்.

கிளைமாக்சுக்கு முன்பாக எதிர்பாராத சில திருப்பங்கள் வித்தியாசமான படம் என்பதிலிருந்து கொஞ்சம் மாறி, பழி வாங்கும் கதையாகக் கொஞ்சம் தடம் மாறுகிறது. படத்தில் வைத்துள்ள அந்த இரண்டு பாடல்கள் கூடத் தேவையில்லை. பாடல்கள் இல்லாத படமாக இருந்தால் கூட நன்றாகத்தான் இருந்திருக்கும்.

காமிரா கோணம், எடிட்டிங் ஸ்டைல், திரைக்கதை யுக்தி, நடித்தவர்களின் மெச்சூர்டான நடிப்பு என மாற்றத்தை ஏற்படுத்தும் ஒரு தரத்துடன் இந்தப் படத்தைக் கொடுத்திருக்கிறது ‘கொலைகாரன்’ குழு.

கொலைகாரன் Vs காவல்காரன்….ஏட்டிக்குப் போட்டி…

Continue Reading

Movie Reviews

7 – விமர்சனம்

4 Tamil Cinema Rating – 2.5/5

Published

on

By

7 விமர்சனம் - 4 Tamil Cinema

ஒரு படத்தில் 6 நாயகிகள் என்பதே ஆச்சரியமான விஷயம். அனைவருக்கும் சரியான விதத்தில் முக்கியத்துவம் கொடுத்து ஒரு படத்தைக் கொடுப்பது சாதாரணமானதும அல்ல.

அறிமுக இயக்குனர் நிசார் ஷபி, ‘7’ என தலைப்பை வைத்திருந்தாலு இழு, இழுவென இழுக்காமல் கொஞ்சம் பரபரப்பாகவே இந்தப் படத்தைக் கொடுக்க முயற்சித்திருக்கிறார்.

ஆனாலும், 80களிலேயே சினிமாவில் அழிந்து போன சில பாத்திரப் படைப்புகளை அவர் இந்தப் படத்தில் வைத்து நம் பொறுமைகளை சோதித்துள்ளார். குறிப்பாக உதவி போலீஸ் கமிஷனர் ரகுமான் எப்போதும் குடித்துக் கொண்டே இருக்கிறார். ஒரு ஜோல்னாப் பை மாட்டிக் கொண்டால் அவர் ஒரு பத்திரிகையாளர் என அரதப் பழசான கதாபாத்திரப் படைப்பை உருவாக்கியிருக்கிறார்.

வித்தியாசமான கதையாக யோசித்தவர், கதாபாத்திர வடிவமைப்பு, வசனங்கள், சில டெம்பிளேட் காட்சிகள் ஆகியவற்றால் படத்தை அவரே பின்னோக்கி இழுத்துவிடுகிறார்.

நந்திதா ஸ்வேதா,  அனிஷா அம்புரோஸ், அதிதி ஆர்யா, த்ரிதா சௌத்ரி ஆகியோர் ஹவிஷ் தான் எங்களது கணவர், அவரைக் காணவில்லை என காவல் நிலையத்தில் புகார் கொடுக்கிறார்கள். ஒரே சமயத்தில் நால்வரும் ஒருவர்தான் தங்களது கணவர் என சொல்லி குழப்புகிறார்கள். போலீஸ் அதிகாரி ரகுமான் ஹவிஷைக் கைது செய்து காவல் நிலையத்தில் வைத்திருக்க, அவரை த்ரிதா கொல்ல முயற்சிக்கிறார். ஏன் இத்தனை குழப்பங்கள் என்பதற்கான விடைதான் 7.

அட ஒரு அற்புதமான சஸ்பென்ஸ் த்ரில்லர் படத்தைப் பார்க்கப் போகிறோம் என ஆர்வமுடன் உட்கார்ந்தால், அதை அப்படியே காதல் படமாக மாற்றுகிறார் இயக்குனர். அடுத்து பேய்ப் படமாக இருக்குமோ என ஒரு சந்தேகம் வருகிறது. மீண்டும் காதல் படமாக மாறி, த்ரில்லர் படமாகவும் மாறி, பழி வாங்கும் சம்பவத்துடன் படம் முடிகிறது. அடுத்தடுத்து டிவிஸ்ட், டேர்ன் என இயக்குனர் யோசித்தாலும் அதை சரியான திரைக்கதையால் சொல்ல முடியாமல் கொஞ்சம் திணறிப் போயிருக்கிறார்.

நடிப்பைப் பொறுத்தவரையில் ரெஜினா நடிப்பு நாடகத்தனமாக இருந்தாலும் அவர் கதாபாத்திரம்தான் படத்தின் மையம். ரெஜினாவின் வயதான கதாபாத்திரத்தில் நடித்துள்ள பாட்டிதான் கிளைமாக்சில் மிரட்டுகிறார். இவர்களுக்குப் பிறகு ரகுமான் மிடுக்குடன் நடித்துள்ளார். மற்ற கதாநாயகிகளுக்கு அதிக வாய்ப்பில்லை. நந்திதா, அனிஷா, த்ரிதா ஆகியோருக்கு மட்டும் பேசுவதற்காவது காட்சிகள் உள்ளன. அதிதி ஆர்யா, புஜிதா பொன்னடா பேசாமலே வந்து போகிறார்கள்.

படத்தின் நாயகன் ஹவிஷ் எல்லா காட்சிகளிலும் ஒரே மாதிரிதான் நடிக்கிறார். பிளாஷ்பேக்கில் மட்டும் கொஞ்சம் பளிச்செனத் தெரிகிறார்.

சென்னை, ஹைதராபாத் என காட்சிகள் மாறி மாறி வருவது வேறு படத்தின் நேட்டிவிட்டியை கூடுதலாகக் குழப்புகிறது.

பாடல்களும், பின்னணி இசையும் இப்படிப்பட்ட படங்களைக் காப்பாற்ற வேண்டும். அதை செய்யத் தவறியிருக்கிறார் சேத்தன் பரத்வாஜ். இயக்குனரே ஒளிப்பதிவாளர் என்பதால் லைட்டிங்கிற்கு நல்ல முக்கியத்துவம் கொடுத்திருக்கிறார்.

பெரிய இயக்குனர்கள் கூட ஆறு நாயகிகளை வைத்து படமெடுக்கத் தயங்குவார்கள். அதை செய்ய முயற்சித்திருக்கிறார் இயக்குனர். முதல் அனுபவம் என்பதால் கொஞ்சம் தடுமாறியிருக்கிறார். அடுத்த படத்தில் அதை சரி செய்வார் என நம்புவோம்.

Continue Reading

Movie Reviews

மிஸ்டர் லோக்கல் – விமர்சனம்

4 Tamil Cinema Rating – 3/5

Published

on

By

மிஸ்டர் லோக்கல் விமர்சனம் - 4 Tamil Cinema

ராஜேஷ் படம் என்றாலே கண்டிப்பாக நகைச்சுவையாக இருக்கும் என்பதை அவருடைய முதல் படத்திலேயே ஆரம்பித்துவிட்டார். ‘பாஸ் என்கிற பாஸ்கரன், ஓகே ஓகே’ ஆகிய படங்கள் அவருடைய வெற்றிப் படங்களின் வரிசையில் இடம் பிடித்தவை.

அந்தப் படங்களைப் போல இந்த ‘மிஸ்டர் லோக்கல்’ படமும் வரவேற்பைப் பெறும் என்று எதிர்பார்க்கப்பட்டது. இருப்பினும் அந்த அளவிற்கு இல்லை என்றாலும் அதில் பாதியளவிற்காவது இந்தப் படத்தை உருவாக்கியிருக்கிறார்கள் என்று சொல்லலாம்.

கதை என்பது புதிதாக இல்லை என்பதுதான் இந்த ‘மிஸ்டர் லோக்கல்’ படத்தின் சிக்கல். அதை தன் நடிப்பால் சரி செய்திருக்கிறார் சிவகார்த்திகேயன். இவருடன் ராதிகா, ஹரிஜா ஆகியோர் இணைந்து ஒரு நடுத்தரக் குடும்பத்தை நம் கண்முன் கொண்டு வந்து நிறுத்தியிருக்கிறார்கள்.

படத்தில் யோகி பாபு, சதீஷ், ரோபோ சங்கர் என மூவர் காமெடிக்காக. ஒரு சந்தானம் இல்லாத ராஜேஷ் படத்தில் மூன்று நகைச்சுவை நடிகர்கள் தேவைப்படுகிறது. இவர்களில் யோகி பாபு மட்டும் அதிகமாக கலகலக்க வைக்கிறார்.

கார் ஷோரூமில் வேலை செய்பவர் சிவகார்த்திகேயன். அவருக்கும் மீடியா கம்பெனி ஒன்றின் உரிமையாளரான நயன்தாராவுக்கும் மோதல் வருகிறது. அந்த மோதலை அப்படியே காதலாக்கக் பார்க்கிறார் சிவகார்த்திகேயன். ஆனால், சிவகார்த்திகேயனை எந்த அளவிற்கு அவமானப்படுத்த முடியுமோ அந்த அளவிற்கு அவமானப்படுத்துகிறார் நயன்தாரா. அதையும் மீறி தன் காதலில் உறுதியாக இருக்கிறார் சிவா. முடிவில் அவரது காதல் வெற்றி பெற்றதால் இல்லையா என்பதுதான் மிஸ்டர் லோக்கல்.

சிவகார்த்திகேயன், நயன்தாரா இருவருக்கும் படத்தில் எலியும் பூனையுமாக எதிரெதிர் இருக்கும் கதாபாத்திரங்கள்தான். ஒருவருக்கு மற்றொருவர் சளைத்தவரில்லை என இருவருமே போட்டி போட்டு நடித்திருக்கிறார்கள்.

ஹிப்ஹாப் தமிழா இசையமைப்பில் ‘டக்கு டக்கு’ பாடல் முணுமுணுக்க வைக்கிறது.

ஏற்கெனவே பார்த்து பழக்கமான கதைதான் என்றாலும் என்டர்டெயின்மென்டாகக் கொடுக்க முயற்சித்திருக்கிறார்கள்.

மிஸ்டர் லோக்கல் – ஓகே ஓகே.

Continue Reading
Advertisement

Tamil Movies Database

Trending

error: Content is protected !!