Connect with us

Movie Reviews

சரவணன் இருக்க பயமேன் விமர்சனம்

Published

on

saravanan irukka bayamen

ஒரு மிகப் பெரும் அரசியல் கட்சியின் வாரிசாகக் கருதப்படும் உதயநிதி ஸ்டாலின், இப்படி ஒரு ‘காமெடி’ அரசியல் கட்சியின் மாநிலத் தலைவர் கதாபாத்திரத்தில் நடிக்க எப்படி சம்மதித்தார் என்பதுதான் நமது முதல் கேள்வி.

அதிலும் அந்தக் கட்சியின் பதவியைக் கூட நண்பர் சூரியை விரட்டி விட்டு கைப்பற்றுகிறார்கள்.

‘மனிதன்’ படம் மூலம் மெச்சூரிட்டியான படங்களில், கதாபாத்திரங்களில் நடித்து தன்னுடைய இமேஜை உயர்த்திக் கொண்டவர், இப்படி ஒரு ‘மட்டமான’ கதை கொண்ட படத்தில் நடித்திருக்கவே கூடாது. படத்தின் முழு கதையையும், காட்சிகளையும் கேட்டுதான் நடிக்க சம்மதித்தாரா என்ற கேள்வி படம் பார்க்கும் ஒவ்வொருவருக்கும் எழும்.

ஒரு காமெடி கூட்டத்தை வைத்துக் கொண்டு, இமான் இசையில் இனிமையான இரண்டு பாடல்களை வைத்துக் கொண்டு, நடிகர், நடிகைகள் என்ன பேசுகிறார்களோ, பேசட்டும், அப்படியே படத்தை முடித்து விடலாம் என இயக்குனர் எழில் நினைத்துவிட்டார் போலிருக்கிறது.

ஜாலியாக ஊரைச் சுற்றிக் கொண்டிருக்கும் உதயநிதி ஸ்டாலின், ஒரு தேசிய கட்சியின் மாநிலத் தலைவர் என்ற பொறுப்பை, சூரியிடமிருந்து தட்டிப் பறித்துக் கொள்கிறார். சிறு வயதில் ஊரை விட்டுப் போன அவர்களது குடும்ப நண்பரின் மகள் ரெஜினா மீண்டும் ஊருக்கு வருகிறார். சிறிய வயதில் எப்படி சண்டை போட்டுக் கொண்டார்களோ, அப்படியே மீண்டும் சண்டை போட்டுக் கொள்கிறார்கள் உதயநிதியும், ரெஜினாவும்.

ஆனால், உதயநிதிக்கு ரெஜினா மீது காதல். இருந்தாலும் ரெஜினாவுக்கும், அந்த ஊர் காமெடி பெரிய மனிதர் (?) மன்சூரலிகான் மகன் சாம்ஸ்-க்கும் திருமணம் நிச்சயிக்கிறார்கள். இந்த சந்தர்ப்பத்தில் உதயநிதியின் முன்னாள் கல்லூரித் தோழியான சிருஷ்டி டாங்கே, உதயநிதிக்கு ஆவியாக காட்சி தருகிறார். தன் தோழி ஆவியிடம் தன் காதலுக்கு உதவி கேட்கிறார் உதயநிதி. கதை சொன்னது போதும் என நீங்கள் கேட்பது புரிகிறது…இதன் பின் என்ன என்பதுதான் படத்தின் மீதிக் கதை.

உதயநிதி ஸ்டாலின், படத்தில் நடிக்க சம்மதித்துவிட்டோம், நடித்து முடித்து விடுவோம் என்ற ரீதியில் நடித்தது போலத்தான் தெரிகிறது. அவருடைய முந்தைய படங்களில் நடித்ததை விட இந்தப் படத்தில் சரிபாதி தான் நடித்திருக்கிறார். ஆனால், இரண்டு டூயட்களில் மட்டும் சானல்களில் அடிக்கடி பாடல்களைப் போடவார்களே என கவனமாக நடித்திருக்கிறார்.

ரெஜினா, வழக்கம் போல தமிழ் சினிமாவின் லூசுப் பெண் கதாநாயகியாகவே தெரிகிறார். இவருக்குள் சிருஷ்டியின் ஆவி புகுந்து கொள்வது எல்லாம் எந்த விதத்தில் சேர்ப்பது என்றே தெரியவில்லை.

ஒரு பாட்டு, நான்கைந்து காட்சிகள் அத்துடன் சிருஷ்டியின் வேலை முடிந்து விடுகிறது.

படத்தின் நகைச்சுவைப் பகுதிக்கு சூரி தான் பொறுப்பு என்று நீங்கள் நினைத்தால் அது தவறு. ஒரு காட்சியிலாவது சிரிக்க வைப்பார் என்று பார்த்தால் பொறுமையை சோதிக்கிறார். யோகி பாபு மட்டும் இல்லை என்றால் அந்த ஒரு சில காட்சிகளில் கூட சிரித்திருக்க மாட்டோம்.

ரவி மரியா, ரோபோ சங்கர் சிறப்புத் தோற்றமெல்லாம் ஐயகோ, ஆள விடுங்க சாமி என சொல்ல வைக்கிறது.

இமான் இசையில் ‘எம்புட்டு இருக்குது, லாலா கடை சாந்தி’ பாடல்கள்தான் படத்திற்கு அடையாளம். அந்தப் பாடல்களை அடிக்கடி டிவியில் போடப் போகிறார்கள்.

அப்புறம் என்ன ?, படம் பார்க்கலாமா என்று கேட்கிறீர்களா..?.

‘பாகுபலி 2’ பார்த்த கண்களால், இந்த ‘சரவணன் இருக்க பயமேன்’ படத்தையும் பார்க்க வைத்துவிட்டார்களே…

Movie Reviews

பப்பி – விமர்சனம்

Published

on

By

பப்பி விமர்சனம்

கதை

கல்லூரியில் படிக்கும் இளைஞர் வருண். ஆபாசப் படங்களைப் பார்க்கும் பழக்கம் கொண்டவர். கல்லூரி வகுப்பில் அதைப் பார்த்தால் சஸ்பென்ட் செய்யப்படுகிறார். திருமணத்திற்கு முன்பே பெண் சுகத்தை அனுபவிக்க வேண்டும் என்று நினைப்பவர். அவர்களது வீட்டு மாடிக்கு குடி வரும் சம்யுக்தாவிடம் பழகி காதலிக்கவும் செய்கிறார். ஒரு நாள் இருவரும் கட்டிலையும் பகிர்ந்து கொள்கிறார்கள். அதனால் கர்ப்பம் ஆகிறார் சம்யுக்தா. அந்தப் பிரச்சினையிலிருந்து விடுபட நினைக்கிறார் வருண். அதன் பின் என்ன நடக்கிறது என்பதுதான் படத்தின் கதை.

நடிப்பு

இப்படியான படங்களில் நடித்தால் பெயர் வாங்கிவிடலாம் என வருணுக்கு யார் சொன்னது எனத் தெரியவில்லை. இருந்தாலும் அப்படி பெண் சுகத்திற்காக அலையும் இளைஞன் கதாபாத்திரத்தில் பொருத்தமாகவே நடித்திருக்கிறார். அவருக்கு உதவி செய்யும் சீனியர் ஆக யோகிபாபு. இவர் இருப்பதால் படம் முழுவதும் கலகலப்பாக நகர்கிறது.

வருண் காதலியாக சம்யுக்தா. மதுரையிலிருந்து சென்னைக்கு வருபவர், உடனே வருணைக் காதலிப்பது நம்பும்படி இல்லை. இருந்தாலும் தான் கர்ப்பமடைந்ததை நினைத்து கலக்கமடைந்தாலும் அதைக் காப்பாற்ற வேண்டும் எனத் துடிக்கிறார்.

பப்பி என்ற நாயாக பிங்கி. அந்த நாய் கதாபாத்திரத்தை வைத்துதான் தாய்மையின் பெருமையை நாயகனுக்குப் புரிய வைக்கிறார்கள்.

இசை, மற்றவை

தரண்குமார் இசையில் பாடல்கள் ரசிக்க வைக்கின்றன. யுவன், அனிருத் உள்ளிட்ட பிரபலங்கள் பாடியிருக்கிறார்கள்.

+

கிளைமாக்ஸ் காட்சி மட்டுமே படத்துக்குப் பெருமை

இந்தக் காலத்தில் சில இளைஞர்கள் இப்படியும் இருக்கிறார்கள் என்பதை இப்படியா வெளிச்சம் போட்டுக் காட்டுவது ?.

Continue Reading

Movie Reviews

பெட்ரோமாக்ஸ் – விமர்சனம்

4 Tamil Cinema – Rating – 2.75/5

Published

on

By

பெட்ரோமாக்ஸ் விமர்சனம்

கதை

ஒரு வீட்டுக்குள் ஒரே குடும்பமாக வாழ்ந்த தமன்னா உள்ளிட்ட நான்கு பேய்கள் இருக்கின்றன. அந்த வீட்டில் பேய்கள் இருப்பது தெரிந்த வீட்டு உரிமையாளர் பிரேம் நான்கு பேரை அந்த வீட்டில் தங்க வைத்து பேய்கள் அங்கு இல்லை என்று தெரிய வைத்து வீட்டை விற்க நினைக்கிறார். வீட்டுக்கு வந்த நால்வரை நான்கு பேய்கள் விரட்டியதா, அந்த பேய்கள் அந்த வீட்டில் தங்கியிருக்க என்ன காரணம் என்பதுதான் பெட்ரோமாக்ஸ்.

நடிப்பு

தமன்னா தான் படத்தின் முதன்மைக் கதாபாத்திரம் என விளம்பரப்படுத்தப்பட்டுள்ளார். ஆனால், படம் முழுவதும் வருவது போன்று அவருக்கு காட்சிகளை அமைத்திருந்தாலும் அவர் சிறிது நேரமே வருவார். அழகான தமன்னாவைப் பேயாகப் பார்க்க யாருக்குத்தான் விருப்பம் இருக்கும். இருந்தாலும் அவருக்கு ஒரு சென்டிமென்ட்டை வைத்து அனுதாபப்பட வைத்துள்ளார்கள்.

முனிஷ்காந்த், காளி வெங்கட், சத்யன், திருச்சி சரவணகுமார் ஆகிய நால்வர்தான் பணத்துக்கு ஆசைப்பட்டு பேய் வீட்டை பிக் பாஸ் வீடு போல நினைத்து தங்குகிறார்கள். அவர்கள் ஒவ்வொருவரும் பேய்களிடம் சிக்கிக் கொண்டு ஒவ்வொரு விதத்தில் நம்மை சிரிக்க வைக்கிறார்கள்.

இசை, மற்றவை

இப்படத்திற்கு ஜிப்ரான் இசையமைத்திருக்கிறார். பேய் படத்திற்கு என்ன வேண்டுமோ அது உள்ளது. பெயருக்கு ஒரே ஒரு சிறிய பாடல், தமன்னாவுக்காக. ஒரு வீட்டுக்குள் இரவு நேரங்களில் வரும் காட்சிகள் அதிகம். ஒளிப்பதிவாளர் பேய் வீட்டையும் அழகாகக் காட்டியிருக்கிறார்.

+

இடைவேளைக்குப் பின் வரும் நகைச்சுவைக் காட்சிகள்

இடைவேளை வரை இழுக்கும் முன்பாதி

Continue Reading

Movie Reviews

அசுரன் – விமர்சனம்

4 Tamil Cinema Rating – 4/5

Published

on

By

அசுரன் விமர்சனம் - 4 Tamil Cinema

கதை

1980களில் நடக்கும் கதை. மனைவி இரண்டு மகன்கள், ஒரு மகள் என கிராமத்தில் வசிப்பவர் தனுஷ். அவருடைய குடும்பத்து சொத்தாக இருக்கும் 3 ஏக்கர் நிலத்தைக் கைப்பற்ற நினைக்கிறார் பக்கத்து ஊர் பெரிய மனிதர் ஆடுகளம் நரேன். அதனால் தொடரும் தகராறில் தனுஷின் மூத்த மகன் கொல்லப்படுகிறான். பதிலுக்கு நரேனை தனுஷின் சிறுவனாக இருக்கும் இளைய மகன் கென் கருணாஸ் கொலை செய்கிறார். அவர்களிடம் சிக்காமல் இருக்க தனுஷ் குடும்பத்தினர் ஊரை விட்டு வெளியேறுகிறார்கள். நீதிமன்றத்தில் சரணடைய விரும்புகிறார் தனுஷ். அதைச் செய்ய விடாமல் தனுஷ் மற்றும் குடும்பத்தினரைக் கொல்லத் துடிக்கிறது நரேன் குடும்பம். இவர்களது போட்டியில் யார் வென்றார்கள் என்பதுதான் படத்தின் மீதிக் கதை.

நடிப்பு

40, 50 வயதுள்ள நடுத்தரக் குடும்பத்து ஏழை, விவசாயி ஆக தனுஷ். ஒல்லியான தேகம், கத்தையான மீசை, லேசாக நரைத்த தாடி, கொஞ்சம் தளர்ந்த நடை, அனுபவப் பேச்சு, குடும்பத்தினர் மீது அதிக பாசம் என சிவசாமி கதாபாத்திரத்தில் தன்னை அப்படியே ஐக்கியப்படுத்திக் கொண்டிருக்கிறார். இன்றைய முன்னணி நடிகர்கள் ஏற்று நடிக்கத் தயங்கும் ஒரு கதாபாத்திரம். அதில் நடித்ததோடு மட்டுமல்லாமல், இதுவரையிலும் அவர் இப்படி நடித்ததில்லை என்று சொல்லுமளவிற்கு அப்படி ஒரு நடிப்பை வாரி வழங்கியிருக்கிறார். இந்த வருட தேசிய விருதுக்கான போட்டியில் வெல்வதில் தனுஷைத் தவிர வேறு யாரையும் நினைத்துக் கூடப் பார்க்க முடியாது.

மிகவும் தாமதமாக தமிழ் சினிமாவில் அறிமுகமானாலும் எப்போதும் ஞாபகம் வைத்துக் கொள்ளக் கூடிய பேச்சியம்மாள் கதாபாத்திரத்தில் மஞ்சு வாரியர். வேறு எந்த நடிகையரும் கோடி ரூபாய்க்கு மேல் சம்பளம் வாங்கலாம். ஆனாலும், மஞ்சு வாரியர் போல அவர்களால் இத்தனை நேர்த்தியாக ஒரு கிராமத்துக் கதாபாத்திரத்தில் நடித்துவிட முடியாது என்று தாராளமாகச் சொல்லலாம். சொந்தக் குரலில் வேறு பேசியிருக்கிறாராம் மஞ்சு.

தனுஷ், மஞ்சு வாரியர் பெயரை இப்போதே தேசிய விருதுப் பட்டியலில் சிறந்த நடிகர், சிறந்த நடிகை என எழுதி வைத்துவிடுங்கள். அது மட்டுமல்லாமல் பல விருதுகள் அவர்களுக்குக் காத்துக் கொண்டிருக்கிறது-

தனுஷ் கூடவே படம் முழுவதும் இருக்கும் அவருடைய இளைய மகன் கதாபாத்திரத்தில் கென் கருணாஸ். அப்பா செய்வது தவறு என்று சுட்டிக் காட்டி அப்பாவையே விமர்சிக்கும் ஒரு கதாபாத்திரம். தன் அண்ணன் இழப்பைத் தாங்க முடியாமல், அம்மா தவிப்பதைப் பார்க்க முடியாமல் திட்டம் போட்டு, உருண்டை (கிராமத்து வெடிகுண்டு) உருட்டி, ஆடுகளம் நரேனை ஒரே வெட்டில் சாய்த்து கொலை செய்கிறார். தன்னைக் காப்பாற்றிக் கொள்ள தனக்குத் தெரியும் என அப்பா தனுஷிடமே சவால் விடுபவர், நடிப்பிலும் சாதித்திருக்கிறார். தமிழ் சினிமாவில் கென்னுக்கு சிறந்த எதிர்காலம் காத்திருக்கிறது.

தனுஷ் மச்சான் ஆக பசுபதி, வக்கீலாக பிரகாஷ் ராஜ். அவர்கள் இருவரின் நடிப்பிலும் அனுபவம் பேசுகிறது. அவர்கள் வரும் காட்சிகளில் வழக்கம் போல தனி முத்திரை பதித்துவிடுகிறார்கள்.

தனுஷ் மூத்த மகனாக டீஜே அருணாச்சலம். எதற்கும் பயப்படாத துணிச்சலான கதாபாத்திரம். நரேனை செருப்பால் அடித்து அவமானப்படுத்தியதால், கொடூரமாகக் கொலை செய்யப்படுகிறார். கொஞ்ச நேரமே வந்தாலும் அவருடைய கதாபாத்திரத்தை நமக்குள் புகுத்தி விடுகிறார்.

சிறிய கதாபாத்திரங்களில் நடித்திருந்தாலும் அம்மு அபிராமி, பாலாஜி சக்திவேல், சுப்பிரமணிய சிவா, நரேன், பவன் அவர்களது நடிப்பைப் பேச வைக்கிறார்கள்.

படத்தில் ஒவ்வொருவரின் நடிப்பைப் பற்றியும், படத்தில் உள்ள பல நுணுக்கங்கள் பற்றியும் எழுதினால் எழுதிக் கொண்டே போகலாம். அது ‘அசுரன்’ திரைக்கதை, வசனம் புத்தகத்தை விடவும் அதிகமாக வரும்.

நீண்ட வருடங்களுக்குப் பிறகு தமிழ் சினிமாவில் ஒரு தரமான படைப்பு இந்தப் படம். வெற்றிமாறன், தனுஷ் கூட்டணியிடமிருந்து இன்னும் பல வித்தியாசமான படங்கள் வரும் என்பதற்கு இந்தப் படம் அதீத நம்பிக்கை அளித்துள்ளது.

இசை, மற்றவை

ஜி.வி.பிரகாஷ் படத்தின் முதல் காட்சியிலேயே தன் திறமையை வெளிப்படுத்தி விடுகிறார். நல்ல கூட்டணி இணையும் போது எப்படியான தரமான படைப்பு வெளிப்படுகிறது என்பதற்கு வெற்றிமாறன், தனுஷ், ஜிவி பிரகாஷ் கூட்டணி ஒரு உதாரணம். ஒளிப்பதிவாளர் வேல்ராஜ், கலை இயக்குனர் ஜாக்கி, படத் தொகுப்பாளர் ராமர் அசுரனுக்கு நல்ல கூட்டாளிகளாக இருந்து சிறப்பு சேர்த்திருக்கிறார்கள். சுகா, வெற்றிமாறனின் வசனங்கள் பல இடங்களில் ரசிகர்களின் கைத்தட்டலைப் பெறுகிறது.

+

படிப்பை மட்டுமே யாரும் பறிக்க முடியாது என்ற உயர்ந்த கருத்தைச் சொன்னதும், சாதீய கொடுமைகளை தெளிவாக விளக்கியதும், அனைவரின் நடிப்பும், உழைப்பும்.

கத்தி, வெட்டு, ரத்தம், கொலைகள்

 

Continue Reading
Advertisement

Tamil Movies Database

Trending

error: