Connect with us

Tamil Cinema News

சூப்பர் டீலக்ஸ், டிங் டாங் புரோமோ – வசந்தபாலன் பாராட்டு

சினிமா டிரைலர்களைப் பற்றிய சுவாரசியப் பதிவு

Published

on

தியாகராஜன் குமாரராஜா இயக்கத்தில், யுவன்ஷங்கர் ராஜா இசையமைப்பில், விஜய் சேதுபதி, பகத் பாசில், சமந்தா, ரம்யா கிருஷ்ணன் மற்றும் பலர் நடித்துள்ள சூப்பர் டீலக்ஸ் படத்தின் ‘டிங் டாங் புரோமோ’ இன்று வெளியிடப்பட்டது.

மிகவும் வித்தியாசமான முறையில் எடிட் செய்யப்பட்டுள்ள அந்த புரோமோ ரசிகர்களை மட்டுமல்லாது, திரையுலகத்தினரையும் வெகுவாகக் கவர்ந்துள்ளது.

அந்த புரோமோ குறித்தும் சினிமா டிரைலர்கள் பற்றிய தனது அனுபவத்தையும் ‘வெயில், காவியத் தலைவன், ஜெயில்’ படங்களின் இயக்குனர் வசந்தபாலன் முகப்புத்தகத்தில் சுவாரசியமாக பதிவிட்டுள்ளார்…..

“எண்பதுகளின் இறுதியில் எனக்கு நினைவு தெரிந்து திரைப்படத்தின் முன்னோட்டம் (டிரைலர்) திரையரங்குகளில் ஓடிக் கொண்டிருக்கிற படத்தின் இடைவேளையின் போது திரையிடப்படும்.

இப்போதும் அப்படி தானே காட்டப்படுகிறது என்று திட்டாதீங்க. அப்போது டிரைலர் காட்ட திரையரங்கு ஒன்று தான் வழி.

திரைப்படத்தின் போஸ்டர் ஒட்டப்பட்ட விளம்பர டயர் வண்டி மேளதாளத்துடன் மாலை நேரங்களில் ஊர் முழுக்க சுற்றி வரும். அதில் இரு வல்லவர்கள் திரைப்படத்தின் இடைவேளையில் சென்னை திரைப்படக்கல்லூரி மாணவர்கள் இயக்கிய புரட்சி கலைஞர் விஜயகாந்த் அவர்கள் நடித்துள்ள ஊமை விழிகள் டிரைலர் காட்டப்படும் என்று எழுதப்பட்டிருக்கும்.

அப்போது திரையரங்குகளில் ஓடுகிற 35 எம்எம் திரைப்படங்களுக்கு நடுவே சினிமாஸ்கோப் டிரைலர் காட்டப்பட்டது. எங்களூரில் அது மிக பெரிய அதிசயம். திருவிழா கொண்டாட்டம் என்றே சொல்லலாம். அந்த டிரைலரை பார்க்கவே அப்போதெல்லாம் மக்கள் திரையரங்குக்கு செல்வார்கள். டிரைலர் முடிந்தவுடன் எழுந்து வந்துவிடுவார்கள்.

சூப்பர் டீலக்ஸ், டிங் டாங் புரோமோ - வசந்தபாலன் பாராட்டு

வசந்தபாலன்

என் சித்தப்பா தியேட்டரில் வேலை பார்த்ததால் இடைவேளைக்கு மட்டும் திரையரங்குக்கு சென்று விட்டு திரும்புவேன். தினமும் டிரைலர் பார்க்க போவேன். அதுவும் ஊமைவிழிகள் திரைப்படத்தில் வருகிற அந்த கிளைமாக்ஸ் கார் ஷாட் திரையில் புது அனுபவம்.

ஊமை விழிகள் திரைப்படத்தின் மாபெரும் வெற்றிக்கு பிறகு திரைப்பட கல்லூரி மாணவர்கள் இயக்கிய படங்கள் மீது பெரும் கவர்ச்சி உண்டானது. ஆபாவாணன் அவர்கள், ஆர்கே செல்வமணி அவர்கள் இயக்கிய புலன் விசாரணை,கேப்டன் பிரபாகரன் டிரைலர் ரசிகர்களை பித்து பிடிக்க வைத்தது.

உழவன் மகன், இணைந்த கைகள் டிரைலரை நான் எத்தனை தடவை திரையரங்குக்கு சென்று பார்த்தேன் என்றே தெரியவில்லை. மூங்கில் கோட்டை திரைப்படத்தின் டிரைலர் ஹாலிவுட் படம் பார்ப்பதை போல இருக்கும், அந்த திரைப்படம் பொருளாதாரக் காரணங்களால் வெளிவரவேயில்லை. சிறுநகரங்களில் உள்ள தேநீர் கடைகள் முழுக்க அந்த பேச்சாக இருக்கும். எப்படி நம்ம ஆளுங்க இங்கிலீஷ் படம் மாதிரி எடுக்குறானுங்க அந்த பிலிமை திருடி நமக்கு காமிக்கிறானுங்களா நம்பவே முடியல… இப்படி பல்வேறு பேச்சுகள் உலவும்.

சாட்டிலைட் சேனல்கள் வந்த பிறகு மின்சாரக் கனவு திரைப்படத்தின் டிரைலர் ஒரு புதுவிதமான அலையை உருவாக்கியது. ஆன்டனி என்ற விளம்பர பட எடிட்டரின் வரவு அந்த மேஜிக்கை நிகழ்த்தியது.

இன்று டீசர் மற்றும் டிரைலர் நன்றாக இருந்தால் தான் திரையரங்குக்கே மக்கள் வருகிறார்கள். அதனால் டிரைலர் படத்தை விட மிக முக்கியமாக பார்க்கப்படுகிறது.

you tube டிரைலருக்கு சென்சார் இல்லாததால் கற்பனை கரைபுரண்டு ஓடுகிறது. பரபரப்பாக இருக்க வேண்டும். இந்தியா trending ஆக மாற வேண்டும் என்பது தான் விதி. எத்தனை views and likes என்பது கணக்கிடப்பட்டு டிரைலர் சக்ஸஸ் பார்ட்டிகள் கூட அங்கங்கு நடக்கிறது. அதனால் டீசர் மட்டும் எடிட் செய்யும் எடிட்டர்கள் பெருவாரியாக முளைத்துவிட்டனர்.

படத்தை எடிட் செய்பவர் ஒருவர் டிரைலர் எடிட் செய்பவர் ஒருவர் என்ற நிலமை வந்து விட்டது. செக்க செவந்த வானத்தின் டிரைலர் படத்தின் வெற்றிக்கு மிக உறுதுணையாக இருந்தது.

சூப்பர் டீலக்ஸ் படத்தின் டிரைலர் ஏற்கனவே பெரிய வெற்றி பெற்று விட்டது. இப்போது வந்துள்ள டிங்டாங் புரோமோ வீடியோ மிக கவர்ச்சிகரமாக உள்ளது. மீண்டும் மீண்டும் பார்க்க தூண்டும் வகையில் உள்ளது.

இதை எடிட் செய்துள்ள பிரேமம் திரைப்படத்தின் இயக்குநர் அல்போன்ஸ் புத்திரனுக்கு வாழ்த்துகள்.

பிரேமம் திரைப்படமே எடிட்டிங்கில் மிக புதுமையாக இருந்தது. கவர்ச்சியான டிரெண்ட் செட்டிங் எடிட். படத்தின் இயக்குநர் தியாகராஜன் குமாரராஜாவுக்கும் என் வாழ்த்துகள்.

திரைமொழியை நன்றாக உள்வாங்கி திரைப்படம் இயக்கும் தமிழின் மிக முக்கியமான இயக்குநர். வெற்றி பெற வாழ்த்துகள்,” என வசந்தபாலன் பதிவிட்டுள்ளார்.

Tamil Cinema News

சென்னை, உத்தண்டியில் பிவிஆர் சினிமாஸ் திறப்பு

Published

on

By

சென்னை, உத்தண்டியில் பிவிஆர் சினிமாஸ் திறப்பு

இந்தியா முழுவதிலும் பல நகரங்களில் தியேட்டர்களை நடத்தி வரும் பிவிஆர் சினிமாஸ் சென்னை, பழைய மகாபாலிபுரம் சாலையில் உள்ள உத்தண்டியில் 10 தியேட்டர்கள் கொண்ட புதிய மல்டி பிளக்ஸ் வளாகம் ஒன்றை இன்று திறந்துள்ளது.

குழந்தைகளுக்கென்றே பிரத்யேகமாக வடிவமைக்கப்பட்டிருக்கும் ‘பிளே ஹவுஸ்’ வகை திரையரங்கு சென்னையிலேயே இங்கு மட்டும் தான் உண்டு என்பது இதன் சிறப்பம்சம்.

இந்த பிவிஆர் திரையரங்கை பிரசன்னா, சினேகா தம்பதியினர் ரிப்பன் கத்தரித்து, குத்து விளக்கேற்றி திறந்து வைத்தனர். திரையரங்கை திறந்து வைத்து அவர்கள் பேசியதாவது,

“பிவிஆர் இந்தியாவின் மிக முக்கியமான ஒரு அங்கம். அவர்கள் சென்னையில் திறந்திருக்கும் 6வது மல்ட்டிபிளெக்ஸ் இது என்பது சிறப்பான அம்சம். சென்னையின் சத்யம் திரையரங்கம் எங்கள் மனதுக்கு மிகவும் நெருக்கமான திரையரங்கு. சத்யம் திரையரங்கையும் பிவிஆர் தான் வாங்கி, நிர்வகிக்கிறது என்பதால் பிவிஆர் இன்னும் மனதுக்கு நெருக்கம். ஏற்கனவே கேம் ஓவர் திரைப்படத்தை இங்கு பார்த்தேன்.

மிகச்சிறந்த ஒளி, ஒலி வடிவமைப்பை கொண்டிருக்கிறது. இருக்கைகளும் மிகவும் வசதியாக இருக்கிறது. உலகிலேயே இந்தியர்கள் போல சினிமா விரும்பிகளை எங்கேயும் பார்க்க முடியாது. இந்தியா மாதிரி சினிமாவை கொண்டாடும் ஒரு நாடு உலகிலேயே இல்லை. வெளிநாடுகளில் கூட இந்தியா அளவுக்கு வசதிகளை தரும் திரையரங்குகள் அதிகம் இல்லை. ஆனால் படம் பார்க்கும் ரசிகர்களை மதித்து புதுப்புது அம்சங்களை பிவிஆர் தொடர்ந்து கொடுத்துக் கொண்டே இருக்கிறது.

சிங்கிள் திரையரங்குகள் பலவும் மூடப்பட்டு, திருமண மண்டபங்களாக மாறி வரும் நிலையில் பிவிஆர் போன்றோர் தொடர்ந்து பெரிய பெரிய மல்ட்டிபிளெக்ஸ் திரையரங்குகளை துவக்குவது சினிமாவுக்கு ஊக்கம் அளிக்கிறது.

10 திரைகள் இருக்கிறது, பெரிய படங்களுக்கு மட்டும் திரையரங்குகளை ஒதுக்காமல் சின்ன படங்களுக்கும் நீங்கள் ஆதரவு தர வேண்டும். எங்கள் வீட்டுக்கு அருகிலேயே இருப்பதால், தொடர்ந்து இங்குதான் படங்களை பார்ப்போம்,” என்றார் நடிகர் பிரசன்னா.

“நான், பிரசன்னா இருவருமே சினிமா பைத்தியம். எந்த ஒரு படத்தையும் முதல் நாளே பார்த்து விடும் அளவுக்கு சினிமா எங்களுக்கு பிடிக்கும். நகருக்குள் இருந்து வெளியே ஈசிஆருக்கு குடிபெயர்ந்தபோது, ஒவ்வொரு சினிமா பார்க்கவும் 40 கிலோமீட்டர் பயணிக்க வேண்டுமே என்ற ஒரு வருத்தம் இருந்தது. நல்ல வேளையாக எங்கள் வீட்டுக்கு அருகிலேயே PVR திரையரங்கை திறந்திருப்பது எங்களுக்கு மிகவும் மகிழ்ச்சியான விஷயம். சென்னையிலேயே எங்கும் இல்லாமல் முதன்முறையாக குழந்தைகளுக்காகவே பிரத்யேகமாக ‘பிளே ஹவுஸ்’ என்ற திரையரங்கும் வடிவமைக்கப்பட்டிருக்கிறது. அதை பார்க்கவும் மிகவும் ஆவலாக இருக்கிறேன்,” என்றார் நடிகை சினேகா.

Continue Reading

Tamil Cinema News

பிக் பாஸ் 3 – போட்டியாளர்கள் முழு விவரம்

Published

on

By

பிக் பாஸ் 3 - போட்டியாளர்கள் முழு விவரம்

விஜய் டிவியில் நேற்று முதல் ஆரம்பமாகியுள்ள, கமல்ஹாசன் தொகுத்து வழங்கும் பிக் பாஸ் 3 நிகழ்ச்சியில் போட்டியாளர்களாக கலந்து கொண்டு வீட்டுக்குள் ஒவ்வொருவராக நுழைந்தவர்கள் விவரம்…

பாத்திமா பாபு – செய்தி வாசிப்பாளர்
லாஸ்லியா – இலங்கை டிவி செய்தி வாசிப்பாளர்
சாக்ஷி அகர்வால் – நடிகை
மதுமிதா – நடிகை
கவின் – நடிகர்
அபிராமி – மாடல் மற்றும் நடிகை
சரவணன் – நடிகர்
வனிதா விஜயகுமார் – நடிகை
சேரன் – இயக்குனர், நடிகர்
ஷெரின் – நடிகை
மோகன் வைத்யா – கர்நாடக இசைப் பாடகர்
தர்ஷன் – இலங்கை மாடல்
சாண்டி – நடன இயக்குனர்
முகின் – மலேசியா பாடகர்
ரேஷ்மா – நடிகை

கடந்த 2 சீசன்களில் முதல் சீசனில் 16 போட்டியாளர்களும், இரண்டாவது சீசனில் 15 போட்டியாளர்களும் நுழைந்திருக்கிறார்கள். இந்த 3வது சீசனில் 15 போட்டியாளர்கள் நுழைந்திருக்கிறார்கள்.

கடந்த 2 சீசன்களில் வெளிநாட்டைச் சேர்ந்த போட்டியாளர்கள் இல்லை. ஆனால், இந்த சீசனில் இலங்கையிலிருந்து இருவரும், மலேசியாவிலிருந்து ஒருவரும் கலந்து கொள்கிறார்கள்.

இந்நிகழ்ச்சி இன்று திங்கள் முதல் தினமும் இரவு 9.30 மணிக்கு ஒளிபரப்பாகும்.

Continue Reading

Tamil Cinema News

பிகில் – இரு வேடங்களில் விஜய் ?

Published

on

By

பிகில் - இரு வேடங்களில் விஜய் ?

எஜிஎஸ் என்டர்டெயின்மென்ட் தயாரிப்பில், அட்லீ இயக்கத்தில், ஏஆர் ரகுமான் இசையமைப்பில், விஜய், நயன்தாரா மற்றும் பலர் நடிக்கும் படத்தின் பெயர் ‘பிகில்’ என அறிவிக்கப்பட்டு, அதன் முதல் பார்வை சற்று முன் வெளியிடப்பட்டது.

அட்லீ, விஜய் இதற்கு முன்பு கூட்டணி சேர்ந்த ‘தெறி, மெர்சல்’ படங்களின் தலைப்பைப் போன்றே இந்தப் படத்திற்கும் லோக்கலாக பிகில் எனப் பெயர் வைக்கப்பட்டுள்ளது.

இந்தப் படத்தில் கதிர், ஜாக்கி ஷெராப், விவேக், டேனியல் பாலாஜி, ஆனந்தராஜ், இந்துஜா, ரெபா மோனிக்கா ஜான், வர்ஷா பொல்லம்மா, ராஜ்குமார், தேவதர்ஷினி, யோகிபாபு மற்றும் பலர் இந்தப் படத்தில் நடிக்கிறார்கள்.

கால்பந்தாட்டத்தை மையமாக வைத்து இந்தப் படத்தின் கதை அமைக்கப்பட்டுள்ளது. சென்னையில் உள்ள ஈவிபி ஸ்டுடியோவில் பெரும்பாலான காட்சிகள் மிகப் பெரும் கால்பந்தாட்ட மைதான செட்டில் படமாக்கப்பட்டுள்ளன.

முதல் பார்வை வெளியான பிறகு படத்தில் விஜய் இரு வேடங்களில் நடிக்கிறார் என்பது தெரிய வந்துள்ளது.

‘பிகில்’ முதல் பார்வை வெளியான உடனேயே டிவிட்டரில் உலக அளவிலும், இந்திய அளவிலும் முதலிடத்தில் டிரென்டிங்கில் உள்ளது.

இரண்டாவது பார்வை நள்ளிரவு 12 மணிக்கு வெளியாக உள்ளது.

இப்படத்தை வரும் தீபாவளி தினமான அக்டோபர் 27ம் தேதி வெளியிட உள்ளார்கள்.

Continue Reading
Advertisement

Tamil Movies Database

Trending

error: Content is protected !!