Connect with us

Movie Reviews

தடம் – விமர்சனம்

Published

on

தடம் விமர்சனம்

ஒரு திரைப்படத்தில் கதை மட்டும் வித்தியாசமாக இருந்தால் போதாது, கதாபாத்திரங்களும் வித்தியாசமாக இருக்க வேண்டும். அப்போதுதான் அந்தப் படத்தை வித்தியாசமான படம் என்று முழுமையாகச் சொல்ல முடியும்.

மகிழ் திருமேனி இயக்கத்தில் அருண் விஜய் இரண்டு வேடங்களில் நடித்துள்ள இந்தப் படம் ஒரு வித்தியாசமான க்ரைம் த்ரில்லர் படம்.

ஒரு அருண் விஜய், சிவில் இஞ்சினியர். மற்றொரு அருண் விஜய் திருடன். ஒரு நள்ளிரவில் ஒரு பணக்கார இளைஞன் கொல்லப்பட, யாரோ ஒருவர் எடுத்த செல்பியில் அந்த வீட்டு பால்கனியில் இருக்கும் அருண் விஜய்யின் புகைப்படம் சிக்குகிறது. இஞ்சினியர் அருண் விஜய் யாரென்று இன்ஸ்பெக்டருக்குத் தெரியும் என்பதால் அவரைக் கைது செய்து லாக்கப்பில் வைக்கிறார். அதே சமயம், திருடன் விஜய்யும் வேறொரு குடிபோதை தகராறில் சிக்கி இஞ்சினியர் அருண் விஜய் சிக்கியிருக்கும் காவல் நிலையத்திற்கே அனுப்பப்படுகிறார். ஒரே தோற்றத்தில் அச்சு அசலாக இருவர் சிக்குவதால் காவல் துறையினருக்கு அந்தக் கொலையை யார் செய்தது என்பதில் விசாரிக்க குழப்பம் வருகிறது. அந்தக் குழப்பம் தீர்ந்ததால், உண்மைக் குற்றவாளியை சரியாகக் கண்டுபிடித்தார்களா என்பதுதான் படத்தின் மீதிக் கதை.

‘குற்றம் 23’ படம் தந்த பெரிய வெற்றியால் மீண்டும் ஒரு க்ரைம் திரில்லர் படத்தைத் தேர்ந்தெடுத்திருக்கிறார் அருண் விஜய். ஆனால், இந்தப் படத்தில் அவர்தான் குற்றவாளி. ‘ஐடன்டிக்கல் டிவின்ஸ்’ ஆக அண்ணன் தம்பியாக இரு வேடங்களில் நடித்திருக்கிறார். இரண்டு வேடங்களுக்கும் ஆடை, பேச்சு இரண்டுதான் வித்தியாசம். இரண்டு கதாபாத்திரங்களிலும் அருண் விஜய்யின் நடிப்பு அற்புதம் என சொல்ல வைக்கிறது. அதிலும் கிளைமாக்சில் இருவரும் பேசிக் கொள்ளும் அந்தக் காட்சி சிம்ப்ளி சூப்பர்ப்.

படத்தின் நாயகி என்று கொலைக் குற்றத்தை விசாரிக்கும் சப் இன்ஸ்பெக்டர் வித்யா பிரதீப்பைத்தான் சொல்ல வேண்டும். இதற்கு முன் அவர் நடித்த படங்களில் அவருக்குக் கிடைக்காத முக்கியத்துவம் இந்தப் படத்தில் கிடைத்திருக்கிறது. அதைச் சரியாகப் பயன்படுத்திக் கொண்டிருக்கிறார். அருண் விஜய்யின் காதலிகளாக தன்யா ஹோப், ஸ்மிரிதி. இருவரும் சில காட்சிகளில் வந்து காதலித்து விட்டுப் போகிறார்கள்.

யோகி பாபு, திருடன் அருண் விஜய்யின் நண்பனாக நடித்திருக்கிறார். முதல் பாதியில் இவரை இன்னும் கூடுதலாக நகைச்சுவை செய்ய வைத்திருக்கலாமோ என்று தோன்றுகிறது. இன்ஸ்பெக்டர் ஆக பெப்சி விஜயன். அருண் விஜய்யின் மீதுள்ள முன்விரோதத்தை வில்லத்தனமாகக் காட்டியிருக்கிறார்.

இடைவேளைக்குப் பின் படம் அடுத்து என்ன, அடுத்து என்ன என்று திரைக்கதை விறுவிறுப்பாக நகர்கிறது. கிளைமாக்சுக்கு முன்பாக கதையில் வரும் திருப்பம் புத்திசாலித்தனமாக திரைக்கதை.

அறிமுக இசையமைப்பாளர் அருண்ராஜ் இசையமைப்பில் பின்னணி இசை பரபரக்க வைக்கிறது. முதல் படத்தில் முத்திரை பதித்திருக்கிறார். ‘இணையே…பாடலில் சித்ஸ்ரீராம், பம்லதா குரல் இழுக்கிறது.

கோபிநாத் ஒளிப்பதிவு படத்திற்கு பக்கபலம். த்ரில்லர் படத்திற்கான லைட்டிங், காமிரா ஆங்கிள் என விஷுவலாகவும் படத்தில் மிரட்டியிருக்கிறார். குழப்பமில்லாத படத் தொகுப்பைத் தந்திருக்கிறார் படத் தொகுப்பாளர் ஸ்ரீகாந்த்.

பிளாஷ்பேக்கில் அருண் விஜய்யின் பெற்றோர்களுக்கு இடையிலான சண்டை, பிரிவு, அம்மா சோனியா அகர்வாலின் சீட்டாட்டம் ஆகியவை கொஞ்சம் யதார்த்த மீறலாக அமைந்து நமக்கு ஒரு நெகிழ்ச்சியான உணர்வைத் தர மறுக்கிறது. அதை இன்னும் யதார்த்தமான காட்சிகளுடன் அமைத்திருந்தால் சிறப்பாக இருந்திருக்கும். இவை மட்டும்தான் படத்தில் குறையாகத் தெரிகிறது.

தடம் – வெற்றிப் பாதை…

Movie Reviews

மிக மிக அவசரம் – விமர்சனம்

4 Tamil Cinema Rating 3/5

Published

on

By

மிக மிக அவசரம் விமர்சனம் - 4 Tamil Cinema

கதை

விவிஐபிக்கள், விஐபிக்கள் ஒரு இடத்திற்கு வருகை தரும் போது, அவர்களது பாதுகாப்பிற்காக நிறுத்தப்படும் பெண் போலீசார், இயற்கை உபாதைகளைக் கூட செல்ல முடியாத ஒரு சூழலில் எப்படி சிரமப்படுகிறார்கள் என்பதைச் சொல்லும் கதை.

நடிப்பு

ஒரு பாலத்தின் நடுவின் இன்ஸ்பெக்டரால் பழி வாங்கும் நோக்கத்தில் தனி ஒரு பெண் போலீசாக நிறுத்தப்படுகிறார் ஸ்ரீபிரியங்கா. மண்டையைப் பிளக்கும் உச்சி வெயில், கடுமையான தாகம், அதோடு சிறுநீர் கூட கழிக்க முடியாமல் அவஸ்தைப்படும் ஒரு சூழ்நிலை. அதே சமயம், மேம்பாலத்தில் எந்த இடையூறும் ஏற்படாத வகையில் பணியாற்ற வேண்டும். போலீஸ் வேலை என்பதிலும் எவ்வளவு கஷ்ட, நஷ்டங்கள் இருக்கிறது என்பதை ஸ்ரீபிரியங்காவின் கதாபாத்திரமும், அதில் அவருடைய நடிப்பும் நம்மை மிகவும் நெகிழ வைக்கிறது.

பெண்களின் பிரச்சினைகளை வெளிப்படுத்திய எத்தனையோ படங்கள் வந்திருக்கின்றன. ஆனால், இப்படி ஒரு முக்கிய பிரச்சினையைப் பற்றி எந்தப் படமும் சொன்னதில்லை.

முத்துராமன், ஈ. ராமதாஸ், வி.கே. சுந்தர் அவரவர் கதாபாத்திரங்களாகவே மாறியிருக்கிறார்கள்.

இசை, மற்றவை

இஷான் தேவ் இசையமைப்பில் கதைக்கும், காட்சிகளுக்கும் என்ன தேவையோ அந்த இசையைக் கொடுத்திருக்கிறார். படத்தை வளவளவென்று நீட்டி முழக்காமல் ஒரு பகலில் நடக்கும் சம்பவங்களை அதன் யதார்த்தம் மீறாமல் மிகவும் இயல்பாக அமைத்திருக்கிறார்கள். அதற்கு ஒளிப்பதிவாளர், படத்தொகுப்பாளர் சரியான உதவி புரிந்திருக்கிறார்கள்.

+

சினிமாத்தனமில்லாத யதார்த்தமான கதை, கதாபாத்திரங்கள்

ஓரிரு, பரபரப்பான திருப்பங்களை வைத்திருக்கலாம்.

Continue Reading

Movie Reviews

கைதி – விமர்சனம்

4 Tamil Cinema Rating – 4/5

Published

on

By

கைதி விமர்சனம் - 4 Tamil Cinema

கதை

பத்து வருடங்கள் சிறையிலிருந்து விடுதலை ஆகி இதுவரை பார்க்காத மகளைப் பார்க்கச் செல்கிறார் கார்த்தி. போகும் வழியில் ஒரு போலீசிடம் சிக்கி, கைதி ஆக கைவிலங்குடன் ஜீப்பில் இருக்கிறார். அந்த சமயத்தில் ஐஜி வீட்டிற்கு விருந்துக்கு வந்த மற்ற போலீஸ் அதிகாரிகளில் நரேன் மற்றும் அவரது குழுவைச் சேர்ந்த நால்வரைக் கொல்ல போதைப் பொருள் கடத்தல்  கும்பல் களம் இறங்குகிறது. அதிலிருந்து தப்பிக்கிறார் நரேன். மற்ற போலீஸ் அதிகாரிகளைக் காப்பாற்றி அவர்களை மருத்துவமனையில் சேர்க்க கைதி கார்த்தியை லாரி ஒன்றை ஓட்ட வைக்கிறார். அதோடு, கமிஷனர் அலுவலகத்தில் உள்ள பல கோடி ரூபாய் போதைப் பொருளைக் காப்பாற்றும் வேலையிலும் இறங்குகிறார். நரேனுக்கு உதவி செய்து அவரையும், அவரது போலீஸ் டீமையும் கார்த்தி எப்படி காப்பாற்றுகிறார் என்பதுதான் படத்தின் கதை.

நடிப்பு

இந்தக் காலத்தில் உடன் நடிக்க ஜோடி இல்லாமல், டூயட் பாட பாடல்கள் இல்லாமல் ஒரு படத்தில் நடிக்க எந்த ஹீரோ சம்மதிப்பார். கார்த்தி அந்த ரிஸ்க்கையும் எடுத்து வெற்றியும் பெற்றிருக்கிறார். அவருடைய கதாபாத்திரமும் சரி, நடிப்பும் சரி அவரை ஒரு தனித்துவமான நடிகர் எனப் பாராட்ட வைக்கின்றன. ‘பருத்தி வீரன்’ படத்திற்குப் பிறகு அடுத்து பல வருடங்களுக்குப் பேசப்படக் கூடிய ‘டெல்லி’ கதாபாத்திரத்தில் நடிப்பில் ஆளுமை செய்திருக்கிறார் கார்த்தி. வாக்கு கொடுத்த பிறகு அதைக் காப்பாத்தாம போக மாட்டேன் எனப் பேசி கைதிக்குள்ளும் ஈரம் இருக்கும் என புரிய வைக்கிறார். இப்படி ஒரு படத்தில் நடித்ததற்கு கங்கிராட்ஸ் கார்த்தி.

நான்கு பேர் கொண்ட டீமை வழி நடத்தி 900 கிலோ போதைப் பொருளைக் கைப்பற்றி அதை கடத்தல் காரர்களிடமிருந்து காப்பாற்ற வேண்டும். விருந்தில் உடன் இருந்த 40, 50 போலீசின் உயிரையும் காப்பாற்ற வேண்டும். வலது கை வேறு அடிபட்டு கட்டுடன் இருக்கும் சூழ்நிலை. உடல்ரீதியாக இயங்க முடியவில்லை என்றாலும் புத்தி ரீதியாக இயங்கியாக வேண்டும். கார்த்தி ஒரு பக்கம் அமைதி என்றால் இவர் மறுபக்கம் உணர்ச்சி வேகத்தில் பரபரப்பு கூட்டுகிறார்.

கார்த்தி ஓட்டும் லாரி, தேர் என்றால் அதில் நரேன் கிருஷ்ணர், கார்த்தி அர்ஜுனர். இவர்களுக்கு அனுமாராய் இருந்து உதவுவதில் தீனா என மகாபாரதமும், இராமாயணமும் இணைந்த ஒரு கலவையாய் நகர்கிறது படம். சினிமாவில் அறிமுகமான கொஞ்ச நாட்களிலேயே குணச்சித்திர நடிப்பில் இந்தப் படம் மூலம் நல்ல பெயரைப் பெறுவார் தீனா.

கமிஷனல் அலுவலகத்தில் தனி ஒரு போலீஸ்காரராய் இருந்து கொண்டு 20, 30 ரவுடிகளை எதிர் கொள்கிறார் மரியம் ஜார்ஜ். அவருக்கு உதவியா ‘டிடி’ கேசில் வந்து சிக்கிய கல்லூரி மாணவர்கள். ஒருவர் உயிரையும் கொடுத்து கண்கலங்க வைக்கிறார்.

கார்த்தியின் மகளாய் பேபி மோனிகா. அப்பாவை முதன்முதலில் பார்க்கப் போகிறோம் என்ற தவிப்பைக் காட்டி கண்களில் கண்ணீர் வரவைக்கிறார்.

மெயின் வில்லனாக அர்ஜுன் தாஸ். கணீர் குரலிலேயே அழுத்தமான வில்லத்தனத்தைக் காட்டுகிறார். அவருக்கு அண்ணனாய் ஹரிஷ் உத்தமன், லாக்கப்பில் இருந்தாலும் மிரட்டுகிறார். அர்ஜுன் தாஸ் கூட்டணியில் ரமணா. லாரியில் இருந்தபடியே போட்டுக் கொடுக்கும் அந்த போலீஸ், அர்ஜுன் கூட்டணியில் இருக்கும் போலீஸ் ஆள், போலீசைக் காட்டிக் கொடுக்கும் நார்கோடிக்ஸ் அதிகாரி ஹரிஷ் பெரடி ஆகியோரும் பெயர் வாங்குகிறார்கள்.

இசை, மற்றவை

சாம் சி.எஸ் பின்னணி இசையில் காட்சிகளின் கனமும், அழுத்தமும் இன்னும் கூடுகிறது. ஒரே இரவில் மட்டுமே நகரும் கதை. சாலை, காட்டுப் பகுதி, கமிஷனர் அலுவலகம் என சேஸ் செய்து ஒளிப்பதிவு செய்திருக்கிறார் சூர்யன் சத்யன். எந்த இடத்திலும் தொய்வேயில்லாத வகையில் பிலோமின் ராஜ் படத் தொகுப்பு.

+

தமிழ் சினிமாவில் இதுவரை பார்க்காத ஒரு கதை, காட்சிகள், நாயகன் கதாபாத்திரம்.

சில இடங்களில் சில லாஜிக் மீறல்கள்.

 

Continue Reading

Movie Reviews

பிகில் – விமர்சனம்

4 Tamil Cinema Rating – 2.75/5

Published

on

By

பிகில் விமர்சனம் - 4 Tamil Cinema

கதை

தாதா அப்பா, கால்பந்து வீரர் மகன். இரண்டுமே விஜய். போட்டி தாதா அப்பாவைக் கொல்ல இந்திய அணிக்கு விளையாடத் தேர்வான மகன், கத்தியை எடுத்து உடனே அப்பாவைக் கொன்ற தாதாவைக் கொன்று அவரும் தாதாவாகிறார். ஏழு வருடங்களுக்குப் பிறகு தமிழ்நாடு பெண்கள் கால்பந்து அணிக்குக் கோச்சாக அவர் போக வேண்டிய சூழ்நிலை. அந்தப் பெண்கள் தாதா தங்களுக்குக் கோச்சா என எதிர்க்க, இன்னொரு புறம் கால்பந்து சங்கத் தலைவர் எதிர்க்க, மறுபக்கம் பழைய பகையும் சேர மகன் விஜய் அனைத்தையும் சமாளித்தாரா இல்லையா என்பதுதான் படத்தின் கதை.

நடிப்பு

அப்பா ராயப்பன், மகன் மைக்கேல் என இரண்டு கதாபாத்திரங்களில் விஜய். அப்பா ராயப்பன் கதாபாத்திரத்தில் காவி வேட்டி, கருப்பு சட்டை, நெற்றியில் சந்தனம் குங்குமம், கழுத்தில் சிலுவை செயின், வீட்டு பூஜை அறையில் இயேசு, அல்லா, இந்துக் கடவுள் இருக்க மூன்று மதத்து ரசிகர்களையும் கவர முயற்சிக்கிறார்கள். தோற்றத்தில் மட்டும்தான் வயதானவர் ஆக்ஷனில் இளைஞராக அதிரடி காட்டுகிறார்.

மகன் மைக்கேல் என்கிற பிகில். மைக்கேல் தாதா, பிகில் ஏழு வருடங்களுக்கு முன்பு இந்திய அணியில் இடம் பெற்ற கால்பந்து விளையாட்டு வீரர். பிகில் ஆக இளமைத் துள்ளலுடன் அப்பாவைக் கண்டால் பயந்து நடுங்கும் இளைஞராக இருக்கிறார். மைக்கேல் ஆக வழக்கமான விஜய். காமெடி, காதல், ஆக்ஷன், கோபம், நகைச்சுவை என கலந்துகட்டி அடிக்கிறார்.

விஜய்யின் காதலியாக நயன்தாரா அதிக வேலையில்லை. யோகிபாபு ஆங்காங்கே சிரிக்க வைக்கிறார். ஜாக்கி ஷெராப், டேனியல் பாலாஜி, ஐ.எம்.விஜயன் என மூன்று வில்லன்கள். ஆனால், மூவருமே ஸ்ட்ராங்கான வில்லன்கள் இல்லை.

பெண்கள் கால்பந்து அணியின் கேப்டனாக அம்ரிதா, மற்ற வீராங்கனைகளாக கோபக்காரப் பெண்ணாக இந்துஜா, ஆசீட் வீச்சில் முகம் பாதிக்கப்பட்ட பெண்ணாக ரெபா மோனிக்கா, திருமணமாகி மீண்டும் அணிக்கு வந்த வர்ஷா கிடைத்த நேரத்தில் தங்களை கவனத்தில் கொள்ள வைக்கிறார்கள்.

இசை, மற்றவை

ஏஆர் ரகுமான் இசையில் ‘சிங்கப்பெண்ணே, வெற்றித்தனம்’ பாடல்கள் மட்டுமே ரசிக்க வைக்கின்றன. பின்னணி இசையில் மிரட்டலாக எதுவுமில்லை. கடமைக்கு வாசித்தது போல வாசித்திருக்கிறார். ஒளிப்பதிவாளர் விஷ்ணுவுக்குத்தான் படத்தில் அதிக வேலை. கால்பந்தாட்டப் போட்டிகளை கூடவே ஓடி ஓடி எடுத்திருக்கிறார்.

பெண்கள் தங்களுக்கு வரும் தடைகளைத் தகர்த்தெறிந்து போராட வேண்டும் என்ற கருத்து.

பல படங்களில் பார்த்த பல காட்சிகள். ஏற்கெனவே சில படங்களில் வந்த கதைகள். புதிதாக, சுவாரசியமான காட்சிகள் எதுவும் இல்லாதது.

Continue Reading
Advertisement

Tamil Movies Database

Trending

error: