Connect with us

Reviews

என்னமோ நடக்குது – விமர்சனம்

Published

on

Yennamo Nadakkuthu_00010

எதிர்பார்ப்பு…. தமிழ் சினிமா ரசிகர்களால் அதிகம் பேசப்படும் ஒரு வார்த்தை. சில படங்களை எதிர்பார்த்து போய் பார்த்து ஏமாந்து விடுவோம். சில படங்களை எந்த எதிர்பார்ப்பும் இல்லாமல் போய் பார்த்து அதிகம் ரசிப்போம். இந்த ‘என்னமோ நடக்குது’ இதில் இரண்டாம் வகை.

‘என்னமோ நடக்குது’ என்ற தலைப்பே என்பதே ஏதோ ஒரு விறு விறுப்பான த்ரில்லர் படமாக இருக்கும் என்று மட்டுமே படம் பார்க்கச் செல்லும் முன் நம்மால் ஊகிக்க முடிந்த ஒரு விஷயமாக இருக்கும். மற்றபடி திரையரங்கிற்குள் நுழைந்து படத்தைப் பார்க்க ஆரம்பித்ததும், அடுத்து என்ன நடக்கப் போகிறது என்பது எந்த விதத்திலும் சொல்ல முடியாத ஒன்றாகவே அமைந்திருக்கிறது.

அறிமுக இயக்குனர் ராஜபாண்டி முதல் படத்திலேயே அவரைப் பற்றி பேச வைத்து விட்டார். சுவாரசியமான கதை, விறுவிறுப்பான திரைக்கதை, நடிகர்களுக்காக கதாபாத்திரங்களா, கதாபாத்திரங்களுக்காக நடிகர்களா என யோசிக்க வைக்கும் அளவிற்கு சரியான தேர்வு, தேவையற்ற காட்சிகள் இப்படி எதுவும் இல்லாமல் தெளிவான ஒரு படத்தைக் கொடுத்து நடப்பதை ‘என்னமோ’….என காட்டாமல் நன்றாகக் காட்டியிருக்கிறார்.

போஸ்டர் ஒட்டும் கான்டிராக்ட் வேலையைச் செய்பவர் விஜய் வசந்த். இவருக்கும் நர்ஸாக இருக்கும் மஹிமாவுக்கும் காதல். கனடாவிற்குச் சென்று மேல் படிப்பு படிக்க நினைக்கும் மஹிமாவுக்காக அவரது அப்பா வட்டிக்குக் கடனாக வாங்கி கட்டிய 5 லட்ச ரூபாய் பணம், ஏஜண்டால் ஏமாற்றப்படுகிறது. கடன் கொடுத்தவர் பணத்தைக் கேட்டு மிரட்டல் விடுக்கிறார். காதலிக்காக விஜய் வசந்த் பணத்தை புரட்டுவதற்காக, வில்லன் ரகுமானுக்காக சில பணப் பரிமாற்ற வேலைகளைச் செய்கிறார். அப்போது 10 கோடி ரூபாய் பணத்தை விஜய் வசந்திடமிருந்து யாரோ கொள்ளை அடித்து விட, விஜய் வசந்தை ரகுமான் மிரட்டுகிறார். காதலியைக் காப்பாற்றிக் கொள்ளவும், தன்னையும் காப்பாற்றிக் கொள்ளவும் விஜய் வசந்த் என்ன செய்கிறார் என்பதே படத்தின் மீதி கதை.

விஜய் வசந்த், இதற்கு முன் சில படங்களில் கதாநாயகனாக நடித்திருந்தாலும், இந்த படத்தின் கதையும், கதாபாத்திரமும் அவருக்காகவே உருவாக்கப்பட்டது போல தன்னை படத்துடன் ஐக்கியப்படுத்திக் கொண்டிருக்கிறார். பெரிய ஹீரோக்கள் பண்ண வேண்டிய ஒரு ஹீரோயிசமான கதையில் விஜய் வசந்தைப் பொருத்திப் பார்த்த இயக்குனரை அதிகம் பாராட்ட வேண்டும். இயக்குனரின் நம்பிக்கையை துளி கூட வீணாக்காமல் அந்த கதாபாத்திரத்திற்காக நியாயமான ஒரு நடிப்பை வெளிப்படுத்தியிருக்கிறார் விஜய் வசந்த்.

‘சாட்டை’ படத்தில் ஹீரோயினாக நடித்தவரா இவர் என ஆச்சரியப்பட வைக்கிறார். நடிப்பு, அழகு இரண்டிலுமே பெரிய முன்னேற்றம் தெரிகிறது. ஒரு ‘லோக்கல்’ பையனான விஜய் வசந்த், தன்னைச் சுற்றி வருவதை விரும்பாதவர், கொஞ்சம் கொஞ்சமாக அவர் மீது காதல் கொள்வது யதார்த்தமாக வெளிப்பட்டுள்ளது. தொடர்ந்து நல்ல படங்களையே தேர்வு செய்து நடித்தால் முன்னணி நடிகைகளில் ஒருவராக வருவார் மஹிமா.

விறுவிறுப்பான த்ரில்லர் படமாக இருந்தாலும் படத்தை இடைவேளை வரை தாங்கிப் பிடிப்பவர்களில் சரண்யா முக்கியமானவர். சென்னைத் தமிழைப் பேசி அப்படியே அந்த கதாபாத்திரத்தை நம் கண்முன் நிறுத்தி விடுகிறார். அது எப்படி அவர்களுக்கு மட்டும் எல்லாவிதமான அம்மா கதாபாத்திரங்களும் அம்சமாகப் பொருந்திப் போகிறது எனத் தெரியவில்லை. ஆனாலும், விஜய் வசந்த் அம்மாவான இவரை அடிப்பதும், எட்டி உதைப்பதும் ஜீரணித்துக் கொள்ள முடியவில்லை. யதார்த்தமாக சொல்கிறோம் என்பதற்காக இப்படிப்பட்ட காட்சிகளை வைத்திருப்பதை இயக்குனர் தவிர்த்திருக்கலாம்.

படத்தின் மெயின் வில்லனாக அடியாளாக இருந்து அரசியல்வாதியாக மாறும் ரகுமான். இவருக்கு உதவியாளராக தம்பி ராமையா. இவர்களது கூட்டாளியாக சுகன்யா. இவர்கள் செய்யும் வங்கி சம்பந்தமான பணப் பரிமாற்ற வித்தைகள் பலருக்குத் தெரியாத ஒன்று. அடப்பாவிகளா….? என ஆச்சரியப்பட வைக்கிறார்கள்.

இடைவேளைக்குப் பிறகே பிரபு வந்தாலும் அவர் சம்பந்தப்பட்ட காட்சிகள் படத்திற்கு மேலும் விறுவிறுப்பைக் கூட்டுகின்றன. ‘கும்கி’ அஸ்வின், நமோ நாராயணன், வின்சென்ட் அசோகன், அழகம்பெருமாள் இவர்களும் படத்தில் இருக்கிறார்கள்.

பிரேம்ஜி அமரன் பின்னணி இசையில் தனி கவனம் செலுத்தியிருக்கிறார். நல்ல படம் அமைந்தால்தான் நல்ல பெயரும் கிடைக்கும். இந்த படத்தில் பிரேஜிக்கு அந்தப் பெயர் கிடைத்திருக்கிறது. ‘ஓரக்கண்ண சாச்சு…நீ, மீச கொக்கு….’ பாடல்கள் ரசிக்க வைத்துள்ளன.

ஜி.ராதாகிருஷ்ணனின் வசனம் பல இடங்களில் கைதட்டலைப் பெறுகிறது. குறிப்பாக “என் கடனைக் கொடுக்கிறதுக்கு அஜித்தை ஏண்டா அடகு வைக்கிற” என நமோ நாராயணன் பேசும் காட்சியில் அரங்கம் அதிர்கிறது.

ஏ.வெங்கடேஷின் ஒளிப்பதிவும், பிரவீண் – ஸ்ரீகாந்தின் படத்தொகுப்பும் இயக்குனருக்கு பக்கபலமாக அமைந்துள்ளன.

இடைவேளைக்குப் பின்னர் வழக்கமான ‘பழி வாங்கும்’ கமர்ஷியல் சினிமாவாக பயணிக்க ஆரம்பித்ததை தவிர்த்திருக்கலாம். ஒரு சீரியசான த்ரில்லரில், கடைசி நேர ட்விஸ்ட்டுக்காக ‘சினிமா துப்பாக்கி’ என ‘என்னென்னமோ’ நடத்தி விட்டார்  இயக்குனர். இருந்தாலும் இயக்குனர் ராஜ பாண்டியை இந்த படம் தமிழ்த் திரையுலகில் ராஜ நடை போட வைக்கும்.

என்னமோ நடக்குது – நல்லதே நடக்கும்…

 

Movie Reviews

கொரில்லா – விமர்சனம்

4 Tamil Cinema – Rating 3/5

Published

on

By

தயாரிப்பு – ஆல் இன் பிக்சர்ஸ்
இயக்கம் – டான் சாண்டி
இசை – சாம் சி.எஸ்.
நடிப்பு – ஜீவா, ஷாலினி பாண்டே, யோகி பாபு, சதீஷ், விவேக் பிரசன்னா, ராதாரவி மற்றும் பலர்

கதை

ஜீவா, ஒரு ஏமாற்றுக்காரர். காலையில் பஸ்ஸில் பணத்தை அடிப்பது, அடுத்து மருந்துக் கடையில் வேலை செய்து பணம் அடிப்பது, இரவில் போலி மருத்துவராக பணம் சம்பாதிப்பது என இருக்கிறார். அவருக்கு வேலையை இழந்த சதீஷ், சினிமாவில் நடிக்கத் துடிக்கும் விவேக் பிரசன்னா ஆகியோர் நண்பர்களாக இருக்கிறார்கள். அவர்களுக்குத் தேவை பணம். அதை வங்கியில் கொள்ளையடித்து எடுக்க நினைக்கிறார்கள். அவர்களுடன் பக்கத்து அறையில் இருக்கும் ஒருவரும் சேர்ந்து கொள்கிறார். வங்கி ஒன்றிற்கு கொள்ளை அடிக்கச் சென்று அங்குள்ளவர்களை பணயக் கைதிகளாக பிடித்து வைத்து அரசாங்கத்திடம் 20 கோடி பணம், விவசாயக் கடன் தள்ளுபடி என கோரிக்கை வைக்கிறார்கள். அவர்கள் கேட்டது நடந்ததா இல்லையா என்பதுதான் படத்தின் மீதிக் கதை.

நடிப்பு

லோக்கலாக பேசிக் கொண்டு நடிப்பது ஜீவாவுக்கு கை வந்த கலை. அதை இந்தப் படத்திலும் இயல்பாக செய்திருக்கிறார். சதீஷ், விவேக் பிரசன்னா ஆகியோர் சிரிக்க வைப்பதை விட, சில காட்சிகளில் மட்டும் வரும் யோகி பாபு அதைச் செய்து விடுகிறார். ஜீவாவின் காதலியாக ஷாலினி பாண்டே. அதிக வேலையில்லை. காவல் துறை அதிகாரியாக ராதாரவி, வழக்கம் போல் அவருடைய அனுபவம் பேசுகிறது.

இசை, மற்றவை

இசை உள்ளிட்ட டெக்னிக்கல் விஷயங்கள் படத்திற்கு பலத்தைக் கொடுக்கவில்லை. சிம்பன்சி காங்கிற்கு டிரைனிங் கொடுத்த டிரைனரை மட்டும் பாராட்டியே ஆக வேண்டும்.

 

படத்தில் பல லாஜிக் மீறல்கள் இருந்தாலும் நகைச்சுவைப் படத்தில் அதையெல்லாம் கவனிக்க மாட்டார்கள் என இயக்குனர் நினைத்திருப்பார் போலிருக்கிறது. விவசாயக் கடன்களை தள்ளுபடி செய்யப் போராடுவதற்காக  இயக்குனரைப் பாராட்டலாம். குழந்தைகளுக்குப் பிடிக்கும் விதத்தில் படத்தை உருவாக்கியிருக்கிறார்கள்.

 

‘கொரில்லா’ எனப் பெயர் வைத்துவிட்டு அதைச் சுற்றி கதை நகராமல் வங்கிக் கொள்ளை, விவசாயக் கடன் என எங்கெங்கோ நகர்கிறது. சிம்பன்சி காங்-கிற்கு இன்னும் கூடுதல் முக்கியத்துவம் கொடுத்திருக்கலாம்.

Continue Reading

Movie Reviews

கூர்கா – விமர்சனம்

4 Tamil Cinema – Rating – 3/5

Published

on

By

கூர்கா விமர்சனம் - 4 Tamil Cinema

தயாரிப்பு – 4 மங்கிஸ் ஸ்டுடியோ
இயக்கம் – சாம் ஆண்டன்
இசை – ராஜ் ஆர்யன்
நடிப்பு – யோகி பாபு, எலிசா, சார்லி, ஆனந்தராஜ், மனோபாலா, ஆடுகளம் நரேன், ரவி மரியா மற்றும் பலர்

கதை

கூர்கா யோகி பாபுவுக்கு, போலீஸ் வேலையில் சேர வேண்டும். ஆனால், அது நடக்காமல் போக செக்யூரிட்டி வேலைக்குச் சேர்கிறார். ஒரு வீட்டில் அவருக்கு பணி கொடுக்கப்படுகிறது. அந்த வீட்டிற்குப் பக்கத்து வீட்டில் இருக்கும் அமெரிக்க தூதரக பெண் அதிகாரி மீது யோகி பாபு காதல் கொள்கிறார். பின்னர் யோகி பாபு ஒரு ஷாப்பிங் மாலில் பணி மாற்றப்படுகிறார். அங்கு சிலர் புகுந்து கொண்டு தியேட்டரில் படம் பார்ப்பவர்களை பணயக் கைதிகளாக பிடித்து வைக்கிறார்கள். அவர்களிடம் அந்த பெண் அதிகாரியும் மாட்டிக் கொள்கிறார். அவர்களைக் காப்பாற்ற யோகி பாபு களம் இறங்குகிறார். அதில் அவர் வெற்றி பெற்றாரா இல்லையா என்பதுதான் படத்தின் கதை.

நடிப்பு

‘தர்ம பிரபு’ படத்திற்குப் பிறகு யோகி பாபு நாயகனாக நடித்து வந்திருக்கும் படம். தனக்குப் பொருத்தமான கதாபாத்திரத்தைத் தேர்வு செய்தாலும், நகைச்சுவை நாயகனாக நடிக்கும் போது கூடுதல் நகைச்சுவைக் காட்சிகளை அவர் சேர்த்துக் கொள்வது நல்லது. அமெரிக்கத் தூதரக பெண் அதிகாரியாக எலிசா. அதிக வேலையில்லை. மற்ற நடிகர்களில் ஆனந்தராஜ் தான் கலக்குகிறார். அவருக்கும், யோகி பாபுவுக்கும் இடையிலான காட்சிகள்தான் படத்தின் ஹைலைட். ரவி மரியா எரிச்சலூட்டுகிறார்.

இசை, மற்றவை

‘கூர்கா’ பற்றிய கதை என்பதால் இரவு நேரத்தில் மட்டுமே காட்சிகள் நகர்கின்றன. ஒளிப்பதிவாளர் கடுமையாக உழைத்திருக்கிறார். இசையமைப்பாளர் ராஜ் ஆர்யன் இன்னும் கொஞ்சம் உழைத்திருக்கலாம்.

 

நகைச்சுவை படம் என்பது மட்டும்தான் படத்திற்கு பிளஸ். யோகி பாபு முடிந்தவரையில் படத்தைக் காப்பாற்றுகிறார். அவருக்கு உறுதுணையாக ஆனந்தராஜ் இருக்கிறார்.

 

காமெடி என்ற பெயரில் ரவி மரியா, மனோபாலா, மயில்சாமி, நமோ நாராயணன் ஆகியோர் செய்வது கடுப்பேத்துகிறது.

Continue Reading

Movie Reviews

வெண்ணிலா கபடி குழு 2 – விமர்சனம்

4 Tamil Cinema – Rating – 2.75/5

Published

on

By

வெண்ணிலா கபடி குழு 2 விமர்சனம்

தயாரிப்பு – ஆல் இன் பிக்சர்ஸ்
இயக்கம் – செல்வ சேகரன்
இசை – செல்வ கணேஷ்
நடிப்பு – விக்ராந்த், அர்த்தனா பினு, பசுபதி, கிஷோர், அனுபமா குமார், சூரி மற்றும் பலர்

கதை

மியூசிக்கல் கடை வைத்திருப்பவர் விக்ராந்த். அவருடைய அப்பா கபடி மீது அதிக ஆர்வம் உள்ளார். அந்த ஆர்வத்தால், அவர் பார்த்த அரசு டிரைவர் வேலையிலிருந்து சஸ்பென்ட் ஆகிறார். கபடியே பிடிக்காத விக்ராந்த் இதனால், அப்பா மீது கோபம் கொள்கிறார். ஆனால், பசுபதி யார் என்று பிளாஷ் பேக் சொல்கிறார் அம்மா அனுபமா குமார். அதன் பின் பெற்றோர்களுக்குத் தெரியாமல் அப்பாவின் சொந்த ஊருக்குச் சென்று கபடி பயிற்சி எடுக்கிறார். அப்பா மீதான பழியைப் போக்க நினைக்கிறார். அது நடந்ததா இல்லையா என்பதுதான் படத்தின் கதை.

நடிப்பு

கிராமத்து இளைஞராக பொருத்தமான நடிப்பை வெளிப்படுத்தியிருக்கிறார் விக்ராந்த். அவருடைய காதலியாக அர்த்தனா பினு, பாவாடை தாவணியில் அழகாக வந்து போகிறார். விக்ராந்த் அப்பாவாக பசுபதிக்கு, கனமான கதாபாத்திரம். கண்களை நனைக்கிறார். கபடி பயிற்சியாளர் கிஷோர், கபடி ஆடும் சூரி ஆகியோரும் இயல்பாய் நடித்திருக்கிறார்கள்.

இசை, மற்றவை

செல்வகணேஷ் இசையில் பாடல்கள் பரவாயில்லை. ஒளிப்பதிவாளர் கிராமத்து அழகை அருமையாய் படமாக்கியிருக்கிறார்.

 

நம் மண்ணின் கதை, நம் மண்ணின் விளையாட்டு. அதற்காக முக்கியத்துவம் கொடுத்து யதார்த்தமாய் படமாக்கியிருக்கிறார் இயக்குனர். நடித்திருப்பவர்கள் அனைவருமே இயல்பாய் நடித்திருப்பது கூடுதல் பலம்.

 

படத்தின் திரைக்கதையில் திருப்பங்கள் அதிகமில்லை. இப்படித்தான் படம் முடியப் போகிறது என்பதை முன்னரே கணிக்க முடிகிறது.

Continue Reading
Advertisement

Tamil Movies Database

Trending

error: Content is protected !!